قازاقستانعا تاۋىق جۇمىرتقاسىن اكەلۋگە تىيىم سالىندى
استانا. KAZINFORM - قازاقستان اۋماعىنا تاۋىق جۇمىرتقاسىن اكەلۋگە ۋاقىتشا تىيىم سالىندى. اۋىل شارۋاشىلىعى مينيسترلىگى وسىعان بايلانىستى مالىمدەمە جاسادى.
قاشانعا دەيىن تىيىم سالىندى؟
ۆەدومستۆو مالىمەتىنشە، قازاقستان اۋماعىنا بارلىق كولىك تۇرىمەن باسقا ەلدەردەن جانە ەۋرازيالىق ەكونوميكالىق وداق ەلدەرىنەن تاۋىق جۇمىرتقاسىن اكەلۋگە التى اي مەرزىمگە تىيىم سالىندى.
«بۇل تىيىم قازاقستان اۋماعى ارقىلى وتەتىن تاۋىق جۇمىرتقاسىنىڭ ترانزيتىنە قولدانىلمايدى. وعان قوسا ەۋرازيالىق ەكونوميكالىق وداققا مۇشە ءبىر مەملەكەت اۋماعىنان ەۋرازيالىق ەكونوميكالىق وداققا مۇشە ەكىنشى مەملەكەت اۋماعىنا قازاقستان ارقىلى جەتكىزىلۋىنە قاتىستى دا قولدانىلمايدى»، - دەپ جازىلعان حابارلامادا.
نە ماقساتپەن تىيىم سالىندى؟
مينيسترلىك جۇمىرتقا يمپورتىنا ۋاقىتشا تىيىم كوكتەم جانە جازعى كەزەڭدە وتاندىق تاۋار وندىرۋشىلەردى قولداۋ ماقساتىندا ەنگىزىلگەنىن مالىمدەدى.
«وسى كەزەڭدەردە جۇمىرتقاعا سۇرانىس تومەندەگەنى بايقالادى. بۇل فاكتور قۇس فابريكالارىنىڭ قىزمەتىنە تەرىس اسەر ەتەدى، جۇمىرتقا باعاسى تومەندەيدى. سونداي-اق، بۇل كەزەڭدە جۇمىرتقانى ساقتاۋ مەرزىمى قىسقارادى، دەگەنمەن تەحنولوگيالىق ەرەكشەلىكتەرگە بايلانىستى جۇمىرتقا ءوندىرۋ كولەمى ازايمايدى، ال بۇل قويمالاردا تاۋار ارتىق جينالۋىنا اكەپ سوعادى»، - دەپ ءتۇسىندىردى مينيسترلىك وكىلدەرى.
ايتا كەتەيىك، بۇيرىق بۇگىننەن باستاپ كۇشىنە ەندى.
