قازاقستانعا ءتورت ەلدىڭ اسكەرى كەلە جاتىر: قورعانىس مينيسترلىگى ەل تۇرعىندارىنا ەسكەرتۋ جاسادى
استانا. قازاقپارات - 2024-جىلعى 26-قىركۇيەك پەن 7-قازان ارالىعىندا الماتى وبلىسىنىڭ «جاعالاۋ» وقۋ پوليگونى بازاسىندا ۇ ق ش ۇ ۇجىمدىق بىتىمگەرلىك كۇشتەرىنىڭ «مىزعىماس باۋىرلاستىق-2024» كوماندالىق-شتابتىق وقۋ-جاتتىعۋىن وتكىزۋ جوسپارلانعان.
ق ر قورعانىس مينيسترلىگى باسپا ءسوز قىزمەتىنىڭ حابارلاۋىنشا، وقۋ-جاۋىنگەرلىك تاپسىرمالاردى پىسىقتاۋ ماقساتىندا وقۋ-جاتتىعۋ وتەتىن جەرگە 18-قىركۇيەكتەن باستاپ بەلارۋس، قازاقستان، قىرعىزستان، رەسەي جانە تاجىكستاننىڭ اسكەري كونتينگەنتتەرى ارالاس تاسىلمەن كەلە باستايدى. الماتى جانە جەتىسۋ وبلىستارىنىڭ اۋماعى ارقىلى اسكەري قىزمەتشىلەردىڭ قوزعالىسى تەمىر جول جانە اۆتوموبيل كولىگىمەن جۇزەگە اسىرىلاتىن بولادى.
«وسىعان بايلانىستى، ازاماتتار مەن ب ا ق وكىلدەرىنەن الەۋمەتتىك جەلىلەردە تاراتىلاتىن قاۋەسەتتەرگە ءمان بەرمەي، تەك رەسمي اقپارات كوزدەرىنە سەنۋىن سۇرايمىز»، - دەلىنگەن حابارلامادا.
وسىعان دەيىن سەناتور اندرەي لۋكيننىڭ اسكەري قىزمەتشىلەرگە ارنالعان جەڭىلدىكتەردى قايتارۋدى ۇسىنعانى تۋرالى جازدىق.
