قازاقستانعا 7 جىلدان اسقان كولىكتەردى اكەلۋگە تىيىم سالىنۋى مۇمكىن
استانا. KAZINFORM - قازاقستان ەۋرازيالىق ەكونوميكالىق وداق ەلدەرىنە 7 جىلدان اسقان اۆتوموبيلدەردى اكەلۋگە تىيىم سالۋدى ۇسىنعالى وتىر.
بۇل تۋرالى ق ر ونەركاسىپ جانە قۇرىلىس مينيسترلىگى ينتەگراتسيا جانە حالىقارالىق ىنتىماقتاستىق دەپارتامەنتىنىڭ ديرەكتورى ادىلبەك بەكتىبايەۆ ۋتيلسبوردىڭ كۇشىن جويۋ جونىندەگى پەتيتسيانىڭ قوعامدىق تالقىلاۋىندا مالىمدەدى.
ونىڭ ايتۋىنشا، 2020-2021-جىلدارى ەلگە ەاەو ەلدەرىنەن كولىك قۇرالدارى اكەلىنە باستاعان. ولاردى زاڭداستىرۋ بويىنشا ءبىر رەتتىك اكتسيا وتكىزىلدى، ونىڭ قورىتىندىسى بويىنشا 2023-جىلى 330 مىڭنان استام اۆتوكولىك تىركەلدى. ولاردىڭ ورتاشا مەرزىمى 17 جىلدى قۇراعان.
«بۇل كولىك قۇرالدارىنىڭ كوپشىلىگى قاۋىپسىزدىك جونىندەگى تەحنيكالىق رەگلامەنت تالاپتارىنا، ەكولوگيالىق ساناتقا ساي كەلمەيدى. حالىقتىڭ كەم دەگەندە %80 ىندا كولىك جوق ەكەنىن جانە ولاردىڭ قالىپتى ورتادا ءومىر سۇرۋگە جانە تازا اۋامەن دەم الۋعا قۇقىعى بار ەكەنىن اتاپ وتكىم كەلەدى»، - دەدى ادىلبەك بەكتىبايەۆ.
ول ونەركاسىپ جانە قۇرىلىس مينيسترلىگى كەز كەلگەن جاعدايدا نورماتيۆتى-قۇقىقتىق اكتىلەرگە ازاماتتارعا جەكە پايدالانبايتىن كولىك قۇرالدارىن اكەلۋگە مۇمكىندىك بەرمەيتىن وزگەرىستەر ەنگىزەتىنىن جەتكىزدى. سەبەبى، ازاماتتار كوبىنەسە وسى نورما بويىنشا تسەمەنت تاسيتىن كولىكتەر مەن ءىرى جۇك كولىكتەرىن اكەلۋمەن اينالىسادى.
«جۇمىس توبىنىڭ مۇشەلەرىنەن ەلگە 7 جىلدان اسقان كولىك اكەلۋدى شەكتەۋ تۋرالى ۇسىنىس بولدى. ءبىز مۇنى قۋانىشپەن اتقارامىز جانە تيىسىنشە تەحرەگلامەنتكە وسىنداي وزگەرىستەر ەنگىزۋ ءۇشىن ەۋرازيالىق ەكونوميكالىق كوميسسيا كەڭەسىنىڭ وتىرىسىنا ماتەريالدار ەنگىزۋگە تىرىسامىز. ەگەر بارلىق بەس ەل ءبىزدى ءبىراۋىزدان قولدايتىن بولسا، وندا تۇتاستاي العاندا وداق اۋماعىنا مۇنداي اۆتوموبيلدەر اكەلىنبەيدى. بۇل بولىمدە ءبىز جۇمىس ىستەۋ مىندەتىن موينىمىزعا الامىز»، - دەدى ادىلبەك بەكتىبايەۆ.
