قازاقستان زاماناۋي گاز وڭدەۋ ونەركاسىبىن قۇرادى
استانا. KAZINFORM - قازاقستان پرەمەر-ءمينيسترى ولجاس بەكتەنوۆتىڭ توراعالىعىمەن ەنەرگەتيكا مينيسترلىگى جانە «قازمۇنايگاز»، QazaqGaz، «سامۇرىق-ەنەرگو»، KEGOC، «سامۇرىق- قازىنا» ۇ ءا ق كومپانيالارى باسشىلىعىنىڭ قاتىسۋىمەن ەنەرگەتيكالىق كەڭەس وتىرىسى ءوتتى.
كۇن تارتىبىندە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن قاتار مەملەكەتىنىڭ ءامىرى شەيح ءتاميم بەن حاماد ءال ءتاني اراسىندا بيىلعى اقپان ايىندا قول جەتكىزىلگەن ۋاعدالاستىقتاردىڭ ورىندالۋىن باقىلاۋ ماسەلەسى قارالدى، دەپ حابارلايدى ۇكىمەتتىڭ باسپا ءسوز قىزمەتى.
«QazaqGaz» ۇ ك» ا ق باسقارما ءتوراعاسى سانجار جاركەشوۆ بىرلەسكەن گاز جوبالارىن ىسكە اسىرۋ بارىسى تۋرالى باياندادى. قاتاردىڭ UCC Holding كومپانياسىمەن بىرگە قۋاتى جىلىنا 1 ميلليارد تەكشە مەتر جانە 2,5 ميلليارد تەكشە مەتر بولاتىن ەكى گاز وڭدەۋ زاۋىتى، جاڭا ك س-14 كومپرەسسورلىق ستانساسى جانە «ك س-14-قوستاناي- اقتوبە» ماگيسترالدى گاز قۇبىرى، سونداي-اق «بەينەۋ- بوزوي- شىمكەنت» م گ ق ەكىنشى جەلىسى سالىنادى.
گ ا ز قۇرىلىسى وڭدەۋ قۋاتىن ارتتىرۋ ارقىلى شيكى گازدى ءتيىمدى پايدالانۋعا باعىتتالعان. «بەينەۋ- بوزوي- شىمكەنت» ماگيسترالدى گاز قۇبىرىنىڭ ەكىنشى جەلىسىن سالۋ وڭتۇستىك، ورتالىق جانە سولتۇستىك وڭىرلەردى گازبەن جابدىقتاۋدىڭ، سونداي-اق ەكسپورت كولەمىن ساقتاۋدىڭ ارقاسىندا قازاقستاننىڭ ەنەرگەتيكالىق قاۋىپسىزدىگىن قامتاماسىز ەتەدى.
جاڭا كومپرەسسورلىق ستانسا مەن «اقتوبە- قوستاناي» ماگيسترالدى گاز قۇبىرىن ىسكە قوسۋ قوستاناي وبلىسىنىڭ حالقى مەن ءوڭىردىڭ ونەركاسىپ كاسىپورىندارىن كوگىلدىر وتىنمەن قامتاماسىز ەتۋگە مۇمكىندىك بەرەدى.
جيىنعا قاتىسۋشىلار مامىلەنىڭ نەگىزگى شارتتارىن بەكىتتى. QazaqGaz جانە UCC Holding جالپى ماڭىزدى ءتورت جوبا بويىنشا ورتاق كەلىسىمگە كەلگەنى اتاپ ءوتىلدى. الداعى ۋاقىتتا ولاردى بىرلەسىپ جۇزەگە اسىرۋ جۇمىستارى باستالادى.
پرەمەر-مينيستر جوبالاردى ىسكە اسىرۋ كەزىندە QazaqGaz ۇلتتىق كومپانياسى توبىنىڭ ىشكى قۇزىرەتتەرىن جانە وتاندىق وندىرۋشىلەردىڭ ونىمدەرىن بارىنشا پايدالانۋدى تاپسىردى. سونىمەن قاتار ەنەرگەتيكا مينيسترلىگىنە گاز سالاسىنىڭ تابىستىلىعىن ءارى قاراي ارتتىرۋ جونىندە تاپسىرمالار بەرىلدى.
«قازاقستان پرەزيدەنتى مەن قاتار ءامىرى اراسىنداعى ۋاعدالاستىقتار ەلىمىزدىڭ ەكونوميكاسى ءۇشىن اسا ماڭىزى بار ءبىرقاتار مەگا-جوبالاردى بىرلەسىپ ىسكە اسىرۋعا مۇمكىندىك بەرەدى. ءبىز قازاقستاندا زاماناۋي قۋاتتى گاز ونەركاسىبىن قۇرۋ جولىندا ورنىقتى تۇردە العا جىلجىپ كەلەمىز. جوبالاردى ىسكە اسىرۋدا ەشقانداي ىركىلىستەر بولماۋى كەرەك. بارلىق ماسەلە مەنىڭ جەكە باقىلاۋىمدا»، - دەپ اتاپ ءوتتى ولجاس بەكتەنوۆ.
