قازاقستان پويىزدارىندا ينتەرنەت قاشان پايدا بولادى
استانا. KAZINFORM - ەلىمىزدىڭ پويىزدارىندا ينتەرنەت قامتۋ ماقساتىندا پيلوتتىق جوبا ىسكە قوسىلدى.

«قازاقستان تەمىر جولى» ۇلتتىق كومپانياسى اگەنتتىكتىڭ رەسمي ساۋالىنا سپۋتنيكتىك بايلانىس تەحنولوگيالارىن تەستىلەۋ «استانا - الماتى» باعىتىنداعى № ¾ پويىزدا جۇرگىزىلىپ جاتقانىن حابارلادى.
جوبا OneWeb سپۋتنيكتىك جۇيەسى ارقىلى جەلىگە قوسىلۋعا بەيىمدەلگەن ۆاگونداردىڭ قولدانىستاعى مۋلتيمەديالىق جابدىقتى پايدالانادى.
— OneWeb - موبيلدى سپۋتنيكتىك بايلانىسقا نەگىزدەلگەن جوعارى جىلدامدىقتى ينتەرنەت جۇيەسى. قازاقستانداعى تەحنولوگيانىڭ رەسمي ديستريبيۋتورى Jusan Mobile ا ق تەلەكوم- وپەراتورى، - دەپ ءتۇسىندىردى ق ت ج.
تەستىلەۋ بارىسىندا بۇكىل مارشرۋت بويىنشا ينتەرنەتتىڭ تۇراقتىلىعى مەن ورتاشا جىلدامدىعى تەكسەرىلەدى. سونىمەن قاتار جولسەرىكتەردىڭ موبيلدى تەرمينالدارىنىڭ، قولما-قول اقشاسىز تولەمدەرگە ارنالعان POS- تەرمينالداردىڭ، پويىز باستىقتارىنىڭ كەۋدەگە ىلەتىن ۆيدەوتىركەگىشتەر مەن بەينەباقىلاۋ جۇيەلەرىنىڭ جۇمىسى باعالانادى.
پويىزداردا ينتەرنەتتى قوسۋدىڭ ناقتى ۋاقىتى تەست ناتيجەلەرىنە بايلانىستى بولماق.
- پيلوتتىق جوبا اياسىندا ينتەرنەت جەلىسىنە قوسىلۋدىڭ تەحنيكالىق مۇمكىندىگى عانا تەكسەرىلەدى. ينتەرنەتتى قوسۋدىڭ مەرزىمى مەن ەكونوميكالىق قۇرامداس بولىكتەر بويىنشا شەشىم پيلوتتىق جوبانىڭ ناتيجەلەرى بويىنشا قابىلدانادى، - دەيدى كومپانيادان.
ودان بولەك، قازاقستان تەمىر جولى كومپانياسى وتاندىق جانە شەتەلدىك باسقا جەتكىزۋشىلەردىڭ ۇسىنىستارىن قاراستىرادى. قورىتىندى شەشىم قىزمەتتىڭ ساپاسىن، تيىمدىلىگىن جانە قۇنىن ەسكەرە وتىرىپ قابىلدانادى.
ەگەر جوبا ءساتتى بولسا، ينتەرنەت بارلىق پويىزدا قوسىلۋى مۇمكىن.
ايتا كەتەيىك، بىلتىر قازاقستان ينتەرنەتى ەڭ ارزان ەلدەر تىزىمىنە ەندى.
اۆتور
داۋلەت ىزتىلەۋ