قازاقستان ورتالىق ازيا ەلدەرىنىڭ تۋريستىك وپەراتورلارى ءتىزىلىمىن جاساۋدى ۇسىندى
قازاقستان كورەيلىك ساياحاتشىلار ءۇشىن ورتالىق ازيا ەلدەرىنىڭ تۋريستىك وپەراتورلارى ءتىزىلىمىن جاساۋدى ۇسىندى.
مۇنداي ۇسىنىستى «ورتالىق ازيا - كورەيا رەسپۋبليكاسى» 16-ىنتىماقتاستىق فورۋمىندا پرەمەر-ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋ جاسادى، دەپ حابارلايدى Kazinform ءتىلشىسى اشحابادتان.
«ورتالىق ازيانىڭ باي تاريحى، ادەمى تابيعاتى جانە كورەي تۋريستەرىن قىزىقتىراتىن ەرەكشە كورىكتى جەرلەرى بار. سوڭعى جىلدارى قازاقستان ءوزىنىڭ تۋريستىك سەكتورىن دامىتۋعا 4 ميلليارد دوللاردان استام ينۆەستيتسيا سالدى. الەمدىك دەڭگەيدەگى تاۋ شاڭعىسى كۋرورتتارىنىڭ، قوناق ۇيلەردىڭ جانە كولىك جۇيەسىنىڭ قۇرىلىسىن قوسا العاندا، 400 دەن استام تۋريستىك نىسان پايدالانۋعا بەرىلدى. وسى سالانىڭ الەۋەتىن اشۋ ماقساتىندا فورۋم حاتشىلىعىنا ورتالىق ازيا ەلدەرىنە توپتىق ساپارلاردى ۇيىمداستىرۋ ءۇشىن تۋريستىك وپەراتورلار ءتىزىلىمىن قۇرۋ ماسەلەسىن زەردەلەۋدى ۇسىنامىز»، - دەدى مۇرات نۇرتىلەۋ.
