قازاقستان قىتايعا مال شارۋاشىلىعى ونىمدەرىن قايتا ەكسپورتتايدى
ق ر اۋىل شارۋاشىلىعى ءمينيسترى ايداربەك ساپاروۆ قىتاي حالىق رەسپۋبليكاسى باس كەدەن باسقارماسىنىڭ ءتوراعاسى يۋي جيانحۋا مىرزامەن كەزدەستى، دەپ حابارلايدى Kazinform مينيسترلىكتىڭ باسپا ءسوز قىزمەتىنە سىلتەمە جاساپ.
كەزدەسۋدە قازاقستان مەن قىتاي اراسىنداعى اۋىل شارۋاشىلىعى ونىمدەرىنىڭ تاۋار اينالىمىن ارتتىرۋ ماسەلەلەرى تالقىلاندى. ايداربەك ساپاروۆتىڭ ايتۋىنشا، ەكى مەملەكەت ساۋدا ىنتىماقتاستىعىن دامىتۋدىڭ، اسىرەسە اۋىل شارۋاشىلىعى ساۋداسىنىڭ زور الەۋەتىنە يە.
ق ر اۋىل شارۋاشىلىعى ءمينيسترى سونداي-اق مۇزداتىلعان ەت، قۇس شارۋاشىلىعى ونىمدەرى مەن مالعا، مايلى جانە ءداندى داقىلدارعا قوسىمشا قىتايعا سالقىنداتىلعان سيىر ەتى مەن شوشقا ەتىن جەتكىزۋدە رەسپۋبليكانىڭ مۇمكىندىگى مول ەكەنىن اتاپ ءوتتى. بۇل ەكى ەل اراسىنداعى تاۋار اينالىمى كولەمىنىڭ ەداۋىر ۇلعايۋىنا ىقپال ەتەدى. بۇل ءۇشىن اۋىل شارۋاشىلىعى مينيسترلىگى جانۋارلار مەن قۇستاردىڭ اسا قاۋىپتى اۋرۋلارىن بولدىرماۋ ماقساتىنداعى جۇمىستاردى ەل اۋماعىندا بەلسەندى تۇردە جالعاستىرۋدا. سوندىقتان قىتايلىق تاراپقا قولايلى ايماقتاردان ەت ەكسپورتىن باستاۋ ۇسىنىلدى.
يۋي جيانحۋا مىرزا ايداربەك ساپاروۆقا تاۋەكەلدەردى باعالاۋدىڭ جانە قازاقستاندىق سيىر ەتىن، شوشقا ەتى مەن قۇس ەتىن جەتكىزۋدى قايتا باستاۋ ءۇشىن شەكتەۋلەردى الىپ تاستاۋدىڭ سوڭعى كەزەڭى جونىندە ايتتى. ق ح ر باس كەدەن باسقارماسى ماماندارىنىڭ قازاقستانعا ساپارى بيىلعى جەلتوقسان ايىنا جوسپارلانعان.
قازاقستاننىڭ ۆەتەرينارلىق قىزمەتتى باعالاۋ قورىتىندىسى بويىنشا قىتاي تاراپى قولدانىستاعى شەكتەۋلەردى الىپ تاستاۋ مۇمكىندىگىن قاراستىرىپ، قىتايعا مال شارۋاشىلىعى ونىمدەرىن ەكسپورتتاۋدى قايتا باستاۋعا دايىن. بۇدان بولەك ىنتىماقتاستىقتى ودان ءارى دامىتۋ ءۇشىن يۋي تسزيانحۋا ايداربەك ساپاروۆتى قىتايعا شاقىردى.
ايتا كەتەيىك، 27-قاراشادا قازاقستان- قىتاي ىنتىماقتاستىق كوميتەتىنىڭ وتىرىسى اياسىندا ق ر اۋىل شارۋاشىلىعى مينيسترلىگى مەن ق ح ر باس كەدەن باسقارماسى قازاقستاننان قىتايعا سۇيەكتى داقىلداردىڭ (شابدالى جانە ورىك) ەكسپورتتىق پارتيالارىنا قويىلاتىن فيتوسانيتارلىق تالاپتار جونىندەگى حاتتاماعا قول قويدى.
ەستەرىڭىزگە سالا كەتەيىك، 2023 -جىلدىڭ 10 ايىندا ق ر مەن ق ح ر اراسىنداعى ا و ك سالاسىنداعى ءوزارا ساۋدا كولەمى %70 عا ءوسىپ، 1 ميلليارد دوللاردان استى. ەكسپورت 811,1 ميلليون دوللار، يمپورت 197,4 ميلليون دوللار بولعان.
