قازاقستان نەگىزسىز بايىعانداردى جازالاپ، جەمقورلىق جايلى حابارلاعانداردى قورعاۋ تاسىلدەرىن كۇشەيتەدى

استانا. KAZINFORM - مەملەكەتتىك كەڭەسشىنىڭ توراعالىعىمەن سىبايلاس جەمقورلىققا قارسى ءىس-قيمىل جونىندەگى كوميسسيانىڭ كەزەكتى وتىرىسى ءوتتى.

باسقوسۋدا مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا ايتىلعان سىبايلاس جەمقورلىقتى ازايتۋعا ىقپال ەتەتىن شارالار تالقىلاندى.

ەرلان قارين جيىندا پرەزيدەنتتىڭ سالىق سالاسىن جاپپاي سيفرلاندىرۋعا جانە شارۋالارعا نەسيە بەرۋ ءۇشىن بانكتەردى سۋبسيديالاۋ تاجىريبەسىن قولعا الۋعا، سالىق رەجيمدەرىن وڭتايلاندىرۋعا جانە باسقا دا باستامالارعا قاتىستى جولداۋدا ايتىلعان تاپسىرمالارىن ءتيىمدى ورىنداۋ سىبايلاس جەمقورلىققا قاتىستى سىن-قاتەرلەردى بارىنشا تومەندەتۋگە مۇمكىندىك بەرەتىنىن ايتتى.

سونىمەن قاتار كوميسسيا وتىرىسىندا قازاقستان رەسپۋبليكاسىنىڭ سىبايلاس جەمقورلىققا قارسى ساياساتىنىڭ 2022-2026 -جىلدارعا ارنالعان تۇجىرىمداماسىن جۇزەگە اسىرۋ ماسەلەسى قارالدى.

سىبايلاس جەمقورلىققا قارسى ءىس-قيمىل اگەنتتىگى، وقۋ-اعارتۋ، عىلىم جانە جوعارى ءبىلىم مينيسترلىكتەرى، «اتامەكەن» ۇلتتىق كاسىپكەرلەر پالاتاسى باسشىلارىنىڭ ەسەبى تىڭدالدى.

تۇجىرىمدامانى ىسكە اسىرۋ اياسىندا ءبىرقاتار كەشەندى شارا قابىلداندى. ونىڭ ىشىندە نەگىزسىز بايۋ ءۇشىن جاۋاپكەرشىلىك ەنگىزۋ، سىبايلاس جەمقورلىق تۋرالى حابارلايتىن ادامداردى قورعاۋ تاسىلدەرىن كۇشەيتۋ، قوعامدىق كەڭەستەردىڭ ءرولىن ارتتىرۋ جانە باسقا دا ماسەلەلەر بار.

پارلامەنتكە سىبايلاس جەمقورلىققا قارسى قوسىمشا شارالار قاراستىرۋدى كوزدەيتىن تۇزەتۋلەردىڭ كەزەكتى توپتاماسى ەنگىزىلدى.

جيىن سوڭىندا مەملەكەتتىك كەڭەسشى كوميسسيا مۇشەلەرىنە ءبىرقاتار تاپسىرما بەردى.

ەرلان قارين ەلىمىزدە سىبايلاس جەمقورلىقتى ازايتۋعا باعىتتالعان تەتىكتەردى جان- جاقتى جانە جۇيەلى تۇردە پىسىقتاۋدىڭ ماڭىزدى ەكەنىن تاعى دا اتاپ ءوتتى.