قازاقستان نەگە رەسەيدەن استىق الىپ وتىر؟

Фото: Freepik
Фото: из открытых источников

ساۋدا جانە ينتەگراتسيا ءمينيسترى ارمان شاققاليەۆ نەگە رەسەيدەن استىق تاسىمالدانىپ وتىرعانىن ءتۇسىندىردى، - دەپ حابارلايدى Massaget.kz ءتىلشىسى.

ب ا ق وكىلى مينيسترگە «ءبىز استىق وندىرۋدەن الەمدە الدىڭعى قاتاردامىز، نەگە كورشىنىڭ استىعىنا مۇقتاجبىز؟ سونىڭ سەبەبىن تۇسىندىرەسىز بە؟» دەگەن سۇراق قويدى.

«بىلتىر قازاقستان رەسەيدەن 3 ميلليون توننا ءبيداي ساتىپ الدى. بيىل بولجام بويىنشا 2 ميلليون تونناعا جەتپەك. ءبىز اۋا رايىنىڭ قولايسىزدىعىنان تاپشىلىق بولماۋى ءۇشىن كورشى ەلدەن الۋعا ءماجبۇرمىز. بۇل جەردە استىقتى ارزانعا الىپ، قىمباتقا ساتپاقپىز، بۇل ساۋدا... ونداي دا بولادى. ءيا، ءوزىمىز شىعارىپ، قامتاماسىز ەتەمىز، ءبىراق تاپشىلىق پەن باعانى تۇراقتاندىرۋ ءۇشىن رەسەيدەن الىپ كەلەمىز»، - دەدى مينيستر.

ساۋدا كوميتەتىنىڭ ءتوراعاسى ايدار ابىلدابەكوۆ مۇنداي ءادىس نە ءۇشىن جاسالىپ وتىرعانىن ايتتى.

«ۇن وندىرەتىن كومبيناتتار جىلدىڭ سوڭعى ءۇش ايىندا 650 مىڭ توننا ۇن وندىرەدى. ونىڭ 30 پايىزى عانا ىشكى نارىققا كەرەك. قالعانىنىڭ ءبارى شەتەلگە ەكسپورتتالادى. سول كەزدە ءبىزدىڭ ۇن قازىرگى جاعدايداعى رەسەيدىڭ ۇنىنان قىمبات بولۋى مۇمكىن. كومبيناتتار كونكۋرەنتسياعا شىداي الماي قالادى. سول سەبەپتى كومبيناتتار كورشى ەلدەن تىكەلەي وزدەرى ۇن ساتىپ الىپ، ءارى قاراي وزبەكستان، اۋعانستان جانە تاجىكستان ەلدەرىنە ساتۋعا مۇمكىندىك بولادى»، - دەدى ايدار ابىلدابەكوۆ.

ەسكە سالايىق، بۇعان دەيىن قازاقستاندا قانشالىق استىق تاپشىلىعى بولۋى مۇمكىن ەكەنى تۋرالى جازىلدى.

سوڭعى جاڭالىقتار