قازاقستان مەن وزبەكستان بيرجالارى جەمىس، كوكونىس ونىمدەرىن بىرلەسىپ ساتۋعا كەلىستى
استانا. KAZINFORM - قازاقستان مەن وزبەكستاننىڭ تاۋار بيرجالارى اراسىنداعى كەلىسىم كوكونىستەر مەن جەمىستەردىڭ ساۋداسىن جەڭىلدەتۋگە، ونىڭ جىلدامدىعى مەن اشىقتىعىن ارتتىرۋعا باعىتتالعان، دەپ جازادى Kazinform اگەنتتىگىنىڭ مەنشىكتى ءتىلشىسى.
بۇل حالىقتى تۇراقتى باعا جانە ساپالى ونىممەن سەنىمدى قامتاماسىز ەتۋگە كومەكتەسەدى.
«بيرجالىق تاۋار نارىعى-2025» حالىقارالىق فورۋمىنىڭ قورىتىندىسى بويىنشا «كاسپي» تاۋار بيرجاسى» ا ق مەن «وزبەك رەسپۋبليكالىق تاۋار-شيكىزات بيرجاسى» ا ق اراسىندا ىنتىماقتاستىق جانە بىرلەسكەن قىزمەت تۋرالى كەلىسىمگە قول قويىلدى.
قول قويىلعان كەلىسىم ەلەكتروندىق ساۋدا پلاتفورمالارىن ينتەگراتسيالاۋمەن قاتار، جەمىس-كوكونىس جانە وزگە دە ونىمدەردىڭ بيرجالىق ساۋداسى سالاسىنداعى ورنىقتى جانە ءوزارا ءتيىمدى ارىپتەستىكتى قالىپتاستىرۋعا باعىتتالعان. بۇل اسىرەسە اۋىل شارۋاشىلىعى ءوندىرىسىنىڭ جوعارى كولەمى بەلسەندى ترانسشەكارالىق ساۋدامەن ۇشتاستىرىلعان ورتالىق ازيا ءوڭىرى ءۇشىن ماڭىزدى.
سەرىكتەستىكتىڭ نەگىزگى ماقساتتارىنىڭ قاتارىندا قازاقستان مەن وزبەكستان اراسىنداعى ەكىجاقتى ساۋدانى جانداندىرۋ، ساۋدا وپەراتسيالارىنىڭ اشىقتىعى مەن سەنىمدىلىگىن ارتتىرۋ، ەكسپورتتىق-يمپورتتىق مامىلەلەر ءۇشىن قولايلى جاعدايلار جاساۋ، سونداي-اق ەكى تاراپتىڭ حالىقارالىق اگروازىق-تۇلىك نارىقتارىنداعى ۇستانىمدارىن نىعايتۋ بار.
تاراپتار ساۋدا راسىمدەرىن جەڭىلدەتۋگە جانە ترانزاكتسيالىق شىعىنداردى تومەندەتۋگە ىقپال ەتەتىن بىرلەسكەن تەتىكتەردى ازىرلەۋگە جانە ەنگىزۋگە نيەتتى.
- ءبىز ءۇشىن وزبەك تاراپىمەن ىنتىماقتاستىق - ءبىرىڭعاي جانە ءتيىمدى ساۋدا كەڭىستىگىن قۇرۋ بويىنشا جاڭا مۇمكىندىكتەردى اشادى. ءبىز حالىقارالىق نارىقتاردا تاۋارلاردى ىلگەرىلەتۋ ستراتەگيالارىن بىرلەسىپ ازىرلەۋدى، جەمىس-كوكونىس ونىمدەرىنىڭ ساۋدا ديناميكاسىن جاقسى ءتۇسىنۋ ءۇشىن تالداۋ مەن زەرتتەۋلەر جۇرگىزۋدى جوسپارلاپ وتىرمىز.
ماڭىزدى باعىت - بۇل ساپا ستاندارتتارى، سەرتيفيكاتتاۋ جانە ءونىمنىڭ قاۋىپسىزدىگى. ءبىز سونداي-اق جەتكىزىلىمگە قولايلى جاعداي جاساۋ ءۇشىن لوگيستيكا سالاسىنداعى ىنتىماقتاستىق تۋرالى جانە سيفرلىق شەشىمدەر مەن بيرجالىق تەحنولوگيالار سالاسىندا تاجىريبە الماسۋ تۋرالى كەلىستىك، - دەپ اتاپ ءوتتى «كاسپي» تاۋار بيرجاسى» ا ق پرەزيدەنتى مۇرات قاديسوۆ.
كەلىسىم ناتيجەسىندە وقۋ كۋرستارىن ۇيىمداستىرۋدى، تالدامالىق زەرتتەۋلەر جۇرگىزۋدى جانە بيرجالىق ساۋداعا اسەر ەتەتىن شارالار تۋرالى اقپارات الماسۋدى قوسا العاندا، بيزنەس ءۇشىن تۇراقتى ۇيلەستىرۋ كەزدەسۋلەرى مەن ءىس-شارالارىن وتكىزۋ جوسپارلانۋدا.
العاشقى بىرلەسكەن پيلوتتىق ساۋدا-ساتتىق 2025-جىلى باستالادى دەپ كۇتىلۋدە.
ايتا كەتەيىك، وزبەكستان قازاقستانمەن شەكاراداعى وتكىزۋ پۋنكتتەرىنە «جاسىل» جانە «قىزىل» ءدالىز جۇيەسىن ەنگىزبەك.
