قازاقستان مەن وزبەكستان اراسىنداعى «تاجەن» وتكىزۋ بەكەتى 3 ايعا جابىلادى
اقتاۋ. KAZINFORM - ماڭعىستاۋ وبلىسى اۋماعىندا ورنالاسقان «تاجەن» وتكىزۋ بەكەتىنىڭ جۇمىسى ءۇش ايعا توقتاتىلادى. بۇل تۋرالى ماڭعىستاۋ وبلىسى بويىنشا مەملەكەتتىك كىرىستەر دەپارتامەنتى حابارلادى.

- وزبەكستان تاراپىمەن كەلىسىم بويىنشا 2025-جىلعى 1-اقپاننان باستاپ «تاجەن» كەدەن بەكەتى (قازاقستان-وزبەكستان مەملەكەتتىك شەكاراسىندا ورنالاسقان) وتكىزۋ پۋنكتى ارقىلى جەكە تۇلعالار، جەڭىل اۆتوكولىكتەر، اۆتوبۋستار جانە 3,5 تونناعا دەيىن جۇكتەمەسى بار اۆتوكولىك قۇرالدارىن وتكىزۋ ءۇش ايعا توقتاتىلادى، - دەلىنگەن حابارلامادا.
«تاجەن» كەدەن بەكەتىنىڭ ۋاقىتشا جابىلۋىنا بايلانىستى جەكە تۇلعالار مەن كولىك جۇرگىزۋشىلەرگە «ب. قونىسبايەۆ»، «قاپلانبەك»، «سىرداريا» جانە «تسەليننىي» وتكىزۋ بەكەتتەرى ارقىلى وتۋگە كەڭەس بەرىلدى.
«تاجەن» وتكىزۋ پۋنكتى ماڭعىستاۋ وبلىسىنداعى «بەينەۋ» تەمىرجول ستانسياسىنا جاقىن ورنالاسقان. سوندىقتان شەكارادان پوەزدار ارقىلى دا وتۋگە بولادى.
ايتا كەتەيىك، «تاجەن» كەدەن بەكەتىندە قايتا جاڭعىرتۋ جۇمىستارى جۇرگىزىلىپ جاتىر. سوعان بايلانىستى وتكىزۋ پۋنكتىنىڭ قىزمەتىن ۋاقىتشا توقتاتۋعا تۋرا كەلگەن.
- وسى كەزگە دەيىن بەكەت ارقىلى تاۋلىگىنە شامامەن 150 كولىك كەلىپ، وسىنشاسى شەتەلگە كەتەتىن. مودەرنيتسازيا جۇرگىزىلگەننەن كەيىن وتكىزۋ قۋاتى 2 ەسە ارتادى، - دەيدى دەپارتامەنت وكىلى ماقسات اقمۇراتوۆ.
بۇعان دەيىن، ماڭعىستاۋدا وقۋشىلار استان ۋلانعان اسحانانىڭ 4 قىزمەتكەرىنە قاتىستى سوت ۇكىمى شىققانى تۋرالى جازعان بولاتىنبىز.