قازاقستان مەن گەرمانيا جەراستى سۋىن باسقارۋعا ارنالعان اقپاراتتىق جۇيە ەنگىزۋگە كەلىستى
استانا. KAZINFORM - «قازگيدروگەولوگيا» ۇلتتىق گيدروگەولوگيالىق قىزمەتىنىڭ باسقارما ءتوراعاسى بولات بەكنياز گەرمانيانىڭ حالىقارالىق ىنتىماقتاستىق قوعامىنىڭ (GIZ) وكىلدەرىمەن كەزدەستى.
بۇل تۋرالى سۋ رەسۋرستارى جانە يرريگاتسيا مينيسترلىگى حابارلادى.
كەزدەسۋدە قازاقستاندا Water Base اقپاراتتىق جۇيەسىن ەنگىزۋ ماسەلەسى تالقىلاندى. بۇل جۇيە جەراستى سۋىنىڭ جاعدايىن باقىلاۋدى، سۋ رەسۋرستارىنىڭ ءتىزىمىن جاساۋدى، كارتوگرافيالىق ۆيزۋاليزاتسيانى، تالدامالىق اقپارات قۇراستىرۋدى، قاشىقتاعى دەرەككوزدەردەن، ونىڭ ىشىندە باقىلاۋ داتچيكتەرىنەن جەدەل دەرەكتەر الۋدى، سونداي-اق باسقا ۇيىمدارمەن جانە باعىنىستى مەكەمەلەرمەن اقپارات الماسۋدى قامتاماسىز ەتەدى.
Water Base جۇيەسىن ەنگىزۋ اياسىندا كومپيۋتەرلىك جانە سەرۆەرلىك جابدىقتار بەرىلەدى، سونداي-اق جۇيەنى بەيىمدەۋ قىزمەتتەرى كورسەتىلەدى.
GIZ وكىلدەرى سۋ رەسۋرستارى جانە يرريگاتسيا مينيسترلىگىنىڭ ماماندارىن تاشكەنت قالاسىنداعى اقپاراتتىق جۇيەنىڭ جۇمىسىمەن تانىستىرۋدى ۇيىمداستىرۋعا دايىن ەكەنىن ءبىلدىردى.
- سيفرلاندىرۋ تەك جەرۇستى ەمەس، جەراستى سۋ رەسۋرستارىن دا قامتۋى قاجەت. ۇلتتىق گيدروگەولوگيالىق قىزمەت وزبەكستانداعى ارىپتەستەرىمەن جانە گەرمانيانىڭ حالىقارالىق ىنتىماقتاستىق قوعامىمەن بىرلەسىپ، جەراستى سۋىن باسقارۋ جۇيەسىن جاڭعىرتۋ باعىتىندا بەلسەندى جۇمىس جۇرگىزىپ كەلەدى. Water Base جۇيەسىن ەنگىزۋ جەراستى سۋ قورىن باقىلاۋ مەن باسقارۋدى جاقسارتۋعا مۇمكىندىك بەرەدى، - دەدى «قازگيدروگەولوگيا» ۇلتتىق گيدروگەولوگيالىق قىزمەتىنىڭ باسقارما ءتوراعاسى بولات بەكنياز.
ايتا كەتەيىك، استانا حالقى جەراستى سۋىن دا تۇتىنا باستايدى.
