قازاقستان مەن قىتاي كارباميد زاۋىتىنىڭ قۇرىلىسىن بىرلەسىپ سالادى
استانا. KAZINFORM - قىتاي حالىق رەسپۋبليكاسىنىڭ ءتوراعاسى شي جينپيڭنىڭ قازاقستانعا رەسمي ساپارى اياسىندا قازاقستان ەنەرگەتيكا مينيسترلىگى، قىتايدىڭ CNPC كورپوراتسياسى، «قازمۇنايگاز» ۇلتتىق كومپانياسى» ا ق جانە اقتوبە وبلىسىنىڭ اكىمدىگى اراسىندا كارباميد زاۋىتىنىڭ قۇرىلىسىن كوزدەيتىن ينۆەستيتسيالىق جوبانى ىسكە اسىرۋ جونىندە نەگىزدەمەلىك كەلىسىمگە قول قويىلدى.
ەنەرگەتيكا مينيسترلىگى مالىمەتىنشە، اتالعان جوبا مۇناي-گاز حيمياسى سالاسىنداعى قازاقستان مەن قىتاي اراسىنداعى ەڭ ءىرى بىرلەسكەن كاسىپورىنداردىڭ ءبىرى بولماق. بۇل ستراتەگيالىق ارىپتەستىكتىڭ جارقىن ۇلگىسى رەتىندە ەل ەكونوميكاسىن ءارتاراپتاندىرۋعا، اگروونەركاسىپتىك كەشەندى دامىتۋعا جانە ازىق-تۇلىك قاۋىپسىزدىگىن نىعايتۋعا باعىتتالعان.
قۇجاتقا قول قويۋ - جوبانى ىسكە اسىرۋعا قاتىستى نەگىزگى ماسەلەلەر بويىنشا قول جەتكىزىلگەن ۋاعدالاستىقتاردىڭ زاڭدى جالعاسى: شيكىزاتپەن قامتاماسىز ەتۋ، جوبالىق الدىنداعى كەزەڭدى اياقتاۋ، تەحنيكالىق-ەكونوميكالىق نەگىزدەمەنى ازىرلەۋدى باستاۋ جانە «اقتوبە» ا ە ا اياسىندا جەر تەلىمىن ءبولۋ.
زاۋىت اقتوبە وبلىسىندا، جاڭاجول گاز وڭدەۋ زاۋىتىنىڭ (ج گ و ز) ماڭىندا سالىنادى. شيكىزاتپەن قامتۋ وسى جگوز بازاسىندا جۇرگىزىلەدى جانە جىلىنا 600 ميلليون كۋپمەترگە دەيىن تاۋارلىق گاز جەتكىزىلەدى دەپ جوسپارلانىپ وتىر.
زاۋىتتىڭ جوبالىق قۋاتى - جىلىنا 800 مىڭ تونناعا دەيىن كارباميد ءوندىرۋ. جالپى ينۆەستيتسيا كولەمى - 1,25 ميلليارد ا ق ش دوللارى. جوبانى ىسكە اسىرۋ مەرزىمى - 2024-2029-جىلدار.
قۇرىلىس كەزەڭىندە 3000 عا دەيىن، ال پايدالانۋ كەزەڭىندە 400 گە جۋىق جۇمىس ورنى اشىلادى دەپ جوسپارلانعان.
جوبا «اقتوبە» ا ە ا قۇرامىنا ەنگىزىلگەن. بيىل قازاقستان پرەزيدەنتى جانىنداعى ۇلتتىق عىلىم اكادەمياسىمەن بىرلەسىپ تىڭايتقىشتىڭ اگروتەكسەرىستەرى ەلىمىزدىڭ ءتورت وڭىرىندە جۇرگىزىلدى.
«كارباميد» جوباسىن ىسكە اسىرۋ - وتاندىق گاز حيمياسىن دامىتۋعا، ازىق-تۇلىك قاۋىپسىزدىگىن ارتتىرۋعا جانە قازاقستاننىڭ ەكسپورتتىق الەۋەتىن كەڭەيتۋگە ەلەۋلى ۇلەس بولماق.
ايتا كەتەيىك، اقتوبەدە قوي ءجۇنىن وڭدەيتىن زاۋىت سالىنادى.
