قازاقستان مەن كانادا ەنەرگەتيكاداعى تەحنولوگيا بويىنشا ىنتىماقتاستىقتى نىعايتپاق

استانا. KAZINFORM - بۇگىن «استانا» حالىقارالىق قارجى ورتالىعىندا ءبىرقاتار ەنەرگەتيكالىق كومپانيانىڭ قىزمەتكەرلەرى قازاقستاننىڭ سالالىق ۆەدومستۆولارى مەن كۆازيمەملەكەتتىك سەكتور وكىلدەرىمەن كەزدەستى.

ءىس-شاراعا كانادادان كەلگەن دەلەگاتسيا قاتىستى.

ق ر ەنەرگەتيكا ۆيتسە-ءمينيسترى ەرلان اقكەنجەنوۆتىڭ ايتۋىنشا، بۇگىنگى جيىندا قازاقستان مەن كانادا اراسىنداعى ىنتىماقتاستىقتىڭ كەڭەيۋىنە ەرەكشە ءمان بەرىلدى.

«البەرتا پروۆينتسياسىندا (كانادا) مۇناي مەن گازدىڭ ەڭ باي قورى شوعىرلانعان. ولار كۇنىنە شامامەن ءتورت ميلليون باررەل شاماسىندا وندىرەدى. بۇل كورسەتكىش قازاقستان وندىرەتىن دەڭگەيدەن ءسال ارتىق. سوندىقتان ەنەگەتيكا سالاسىنداعى ءبىزدىڭ قارىم-قاتىناس نىعايا تۇسەدى دەگەن ويدامىز»، - دەدى ۆيتسە-مينيستر.

بۇگىنگى كەلىسسوز ميسسياسى قۇرامىنا البەرتانىڭ ەنەرگيا ءوندىرۋ، يننوۆاتسيا جانە ەكولوگيالىق قاۋىپسىزدىك سالاسىنداعى بيزنەس وكىلدەرى، سونداي-اق كانادالىق كوممەرتسيالىق كورپوراتسيانىڭ (Canadian Commercial Corporation) دەلەگاتتارى كىردى. سونداي-اق، ميسسياعا كانادا ەنەرگەتيكالىق فورۋمىنىڭ، وڭتۇستىك البەرتا پوليتەحنيكالىق ينستيتۋتىنىڭ جانە «De Havilland» اۆياوندىرۋشىسىنىڭ وكىلدەرى قوسىلدى. ولار استانا قالاسىندا الەۋەتتى قازاقستاندىق سەرىكتەستەرمەن ءبىرقاتار كەلىسسوزگە قاتىستى.

كانادالىق البەرتا پروۆينتسياسىنىڭ ەڭبەك، ەكونوميكا جانە ساۋدا ءمينيسترى ااريدج باشير قازاقستاننىڭ ەنەرگەتيكا سالاسى بويىنشا الەمدىك نارىقتاعى ءرولىن اتاپ ءوتتى.

ونىڭ پايىمىنشا، قازاقستان مەن كانادانى قورشاعان ورتا مەن كليماتقا قاتىستى ۇقساستىعى عانا ەمەس، سونداي-اق ەنەرگەتيكالىق سەكتوردىڭ ءوسۋ الەۋەتى مەن ونىڭ تۇراقتىلىعى بايلانىستىرىپ تۇر.

«ەنەرگەتيكالىق سەكتوردا كانادا پارنيكتىك گاز شىعارىندىلارىن ازايتۋعا، ءوندىرىس ادىستەرىن نەعۇرلىم تۇراقتى ەتۋگە كوپ كوڭىل ءبولدى. البەرتا پروۆينتسياسى كانادادا وسى تەحنولوگيالاردىڭ كوپشىلىگىن دامىتۋ جولىندا شىنىمەن الدىڭعى ورىندا كەلە جاتىر. مەنىڭ ويىمشا، بۇل تەحنولوگيالاردى قازاقستاندا قولدانۋدىڭ الەۋەتى جوعارى»، - دەدى ااريدج باشير.

ءوز كەزەگىندە «بولاشاق» قاۋىمداستىعى كەڭەسىنىڭ ءتوراعاسى جانىبەك كاترەنوۆ بۇگىنگى جيىن بارىسىندا ەنەرگەتيكا، تەحنولوگيا، ەكولوگياعا قاتىستى ماڭىزدى ۇسىنىستار بولاتىنىن ايتتى.

«كانادانىڭ ەنەرگەتيكا سالاسىنداعى تەحنولوگيالىق تاجىريبەسى بار ەكەنىن بىلەمىز. وسىدان بىرنەشە اي بۇرىن مەتاللۋرگيا فورۋمى كەزىندە قازاقستانعا كانادالىق دەلەگاتسيا دا كەلدى. سول كەزدە جاڭارتىلاتىن ەنەرگيا كوزدەرى، ونىڭ ىشىندە (يادرولىق) ەنەرگيا تۋرالى تاقىرىپتار دا تالقىلاندى»، - دەدى ج. كاترەنوۆ.