قازاقستان مەن دۇنيەجۇزىلىك ەتنوسپورت كونفەدەراتسياسى مادەني مۇرانى ساقتاۋدا كۇش بىرىكتىرمەك
استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ 5- دۇنيەجۇزىلىك كوشپەندىلەر ويىندارى اياسىندا دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعانمەن كەزدەستى.
كەزدەسۋ بارىسىندا ەربول مىرزابوسىنوۆ كوشپەندىلەر ويىندارىنىڭ ەتنوسپورت قوزعالىسىن دامىتۋدا جانە تاريحي مادەني مۇرانى ساقتاۋدا ماڭىزى زور ەكەنىن اتاپ ءوتتى. سونىمەن قاتار مينيستر دۇنيەجۇزىلىك ەتنوسپورت كونفەدەراتسياسى مادەني جانە زاماناۋي سپورتتىق باعدارلامالارعا بىرىكتىرۋگە ىقپال ەتەتىن ەتنوسپورت ءىس-شارالارىن وتكىزۋ جونىندەگى باستامالاردى قولدايتىنىن جەتكىزدى.
«دۇنيەجۇزىلىك كوشپەندىلەر ويىندارى - تۇركى الەمىنىڭ ماڭىزدى سپورتتىق وقيعاسى. ويتكەنى بۇل باسەكە سپورتشىلاردىڭ جىلدار بويعى قاجىرلى ەڭبەگىنىڭ جەمىسىن كورسەتەدى. ەتنوسپورت كونفەدەراتسياسىنىڭ باستى مىندەتتەرىنىڭ ءبىرى - الەم حالىقتارىنىڭ ءداستۇرلى سپورت تۇرلەرىن جاڭعىرتۋ جانە ناسيحاتتاۋ»، - دەدى مينيستر.
تاراپتار ەتنوسپورت ءىس-شارالارىن ۇيىمداستىرۋ سالاسىنداعى ودان ءارى ىنتىماقتاستىق پەن تاجىريبە الماسۋ الەۋەتىن، سونداي-اق جاستار اراسىندا ەتنيكالىق سپورت تۇرلەرىن تانىمال ەتۋگە باعىتتالعان بىرلەسكەن جوبالاردى دامىتۋدى تالقىلادى.
كەزدەسۋ سوڭىندا مينيستر ەردوعانعا ساپارى ءۇشىن العىس ايتىپ، قازاقستان مەن دۇنيەجۇزىلىك ەتنوسپورت كونفەدەراتسياسى اراسىنداعى تىعىز ىنتىماقتاستىق ەتنيكالىق سپورتتى ودان ءارى دامىتۋ، مادەني بايلانىستاردى نىعايتۋ جانە بولاشاق ۇرپاق ءۇشىن تاريحي مۇرانى ساقتاۋ ءۇشىن بەرىك نەگىز بولاتىنىن ايتتى.
اۆتور
كۇنسۇلتان وتارباي
