قازاقستان مال سانىن نيدەرلاند ادىسىمەن رەتتەۋى مۇمكىن
استانا. KAZINFORM - استانادا نيدەرلاند كورولدىگىنىڭ اۋىل شارۋاشىلىعى، بالىق شارۋاشىلىعى، ازىق-تۇلىك قاۋىپسىزدىگى جانە تابيعاتتى پايدالانۋ مينيسترلىگىنىڭ باس حاتشىسى (ۆيتسە-ءمينيسترى) يان-كەيس حۋد ءجۇر.
ۆيتسە-مينيستر باستاعان دەلەگاتسيانىڭ ماقساتى - ەكىجاقتى جۇمىس توبىنىڭ اياسىندا قولعا الىنعان اگروونەركاسىپ جوبالارىن العا جىلجىتىپ، جاڭالارىنا جول اشۋ. وسى ساپار اياسىندا ۆيتسە-مينيسترلەر دەڭگەيىندە كەلىسسوزدەر جوسپارلانعان.
اۋىل شارۋاشىلىعى ءمينيسترىنىڭ ورىنباسارى ازات سۇلتانوۆ ەكىجاقتى جۇمىس توبىنىڭ ارقاسىندا قولعا الىنعان جوبالار ءساتتى جۇمىس ىستەي باستاعانىن ايتادى.
- ءۇش جىل بۇرىن نيدەرلاند كورولدىگى مەن قازاقستان اراسىندا اۋىل شارۋاشىلىعىن بىرلەسىپ دامىتۋعا باعىتتالعان ەكىجاقتى جۇمىس توبى قۇرىلعان بولاتىن. جالپى نيدەرلاند تاۋەلسىز قازاقستان تاريحىندا ەڭ كوپ ينۆەستيتسيا سالعان مەملەكەت ەكەنىن بىلەسىزدەر.
نيدەرلاندتا تۇقىم شارۋاشىلىعى، جىلىجايدا كارتوپ ءوسىرۋ جاقسى دامىعان. اقتوبە، الماتى سياقتى قالالاردا، تۇركىستان وبلىسىندا نيدەرلاند تەحنولوگياسىمەن جۇمىس ىستەيتىن بىرنەشە جىلىجاي بار. ۆەتەريناريا سالاسى بويىنشا دا بىرلەسىپ جۇمىس ىستەپ جاتىرمىز. نيدەرلاند تاراپىنان بىرنەشە ۇسىنىس ايتىلعان. Wageningen ۋنيۆەرسيتەتى مەن الماتىداعى قازاق ۇلتتىق اگرارلىق ۋنيۆەرسيتەتى اراسىندا ستۋدەنتتەردى، ماگيسترانتتار مەن عالىمداردى دايىنداۋ باعىتىندا مەموراندۋم بار. سول مەموراندۋم اياسىندا نيدەرلاند عالىمدارى ونلاين رەجيمدە الماتىداعى ستۋدەنتتەرگە ساباق بەرەدى، - دەدى ول.
ۆيتسە-ءمينيستردىڭ ايتۋىنا قاراعاندا، قازاقستانعا نيدەرلاند ەلىنىڭ ۆەتەريناريالىق رەتتەۋ جانە قاداعالاۋ جۇيەسى قىزىقتى بولىپ وتىر.
- ويتكەنى بۇل مەملەكەت ۆەتەريناريالىق احۋالى تۇراقتى ەل بولىپ ەسەپتەلەدى. ۆاكسينا ءوندىرىسى دە جاقسى دامىعان. مالدى تىركەۋ، ەسەپكە الۋ، ەسەپتەن شىعارۋ جۇيەسى جەتىلگەن. وسى سالالارداعى تاجىريبەسىن مۇقيات زەرتتەدىك. تاجىريبە الماسۋ جۇمىستارىنا ۆەتەرينارلار دا، اگرارلىق ءبىلىم بەرۋ ورتالىقتارى دا قاتىسىپ جاتىر. بۇل نيدەرلاند ەلىنىڭ وزىق تاجىريبەلەرىن سول قالپىندا ەنگىزە سالامىز دەگەن ءسوز ەمەس. ولاردىڭ جەر اۋماعى شاعىن بولسا، بىزدە القاپ كوپ. مال سانى بويىنشا دا ايىرماشىلىقتار بار. سونىڭ ءبارىن ەسكەرىپ، ەڭ وڭتايلى دەگەن تاسىلدەردى بەيىمدەپ ەنگىزۋدى ويلاستىرىپ وتىرمىز. اسىرەسە مالدىڭ ناقتى سانىن ءبىلۋ، تىركەۋگە الۋ، ەتكە جىبەرىلگەن مالدى ەسەپتەن شىعارۋ، جالعان ستاتيستيكانى بولدىرماۋ سياقتى باعىتتاردا تاجىريبە الماسۋ كەرەك. مال سانىن قۇجاتقا قولدان قوسىپ جازۋ دەيتىن ماسەلە بار ەكەنىن پرەزيدەنت تە ايتقانىن بىلەسىز. نيدەرلاند ءتاسىلى بويىنشا ۆەتەرينارلاردى «ءتورت تۇلىك» اقپارات جۇيەسىنە پلانشەت، سمارتفوندار ارقىلى قوستىق، ارنايى پلانشەتتەر بەرىلدى. بۇل مامانداردى كومپيۋتەرگە كىرىپتارلىقتان، ءار فاكتىنى كەڭسەگە بارىپ جۇرمەي، وقيعا ورنىندا تىركەپ وتىرۋعا مۇمكىندىك بەرەدى، - دەيدى ازات سۇلتانوۆ.
سونداي-اق، ول قازاقتان نيدەرلاند فەرمەرلەرىنەن كارتوپتىڭ جوعارى ءونىمدى تۇقىمدارىن، ءتۇرلى داقىلداردىڭ كوشەتتەرىن كوپ الا باستاعانىن ايتتى.
ال نيدەرلاند ەلىنىڭ وكىلى روبوت كومەگىمەن جەر وڭدەۋ سياقتى وزىق تەحنولوگيالار قازىردىڭ وزىندە ازىق-تۇلىك قاۋىپسىزدىگىنىڭ ماڭىزدى بولشەگىنە اينالعانىن ايتتى.
- قازاقستان مەن نيدەرلاند جىلىجاي شارۋاشىلىعى، تەحنولوگيالار مەن تۇقىم شارۋاشىلىعى، باۋ- باقشا شارۋاشىلىعى سالالارىندا ورنىقتى ارىپتەستىك قارىم-قاتىناس ورناتىپ وتىر. وسى ماقساتقا قول جەتكىزۋ ءۇشىن ەكى تاراپ تا بىردەي ۇلەس قوسۋ كەرەك دەپ ەسەپتەيمىن.
ءبىز بيزنەس دەڭگەيىندە دە، مەملەكەت دەڭگەيىندە دە، اكادەميالىق سالادا دا كوپجاقتى ارىپتەستىكتى دامىتامىز دەپ ۇمىتتەنەمىز.
ازىق-تۇلىك ءوندىرىسىن دامىتۋدا يننوۆاتسيالار جەتەكشى ماڭىزعا يە بولىپ وتىر. روبوت كومەگىمەن جەر وڭدەۋگە، سيفرلاندىرۋعا، جەر باسقارۋدىڭ ورنىقتى تاسىلدەرىنە ۇزاق مەرزىمدى ينۆەستيتسيا تارتۋ وزەكتى ماسەلەگە اينالدى.
وسى اپتانىڭ ىشىندە مەن قازاقستاندا بىرنەشە ماڭىزدى كەزدەسۋ وتكىزەمىن. وسىنىڭ ءبارى ەكىجاقتى ىنتىماقتى دامىتادى دەپ ۇمىتتەنەمىن، - دەدى ول.
نيدەرلاند دەلەگاتسياسىنىڭ قۇرامىندا GroenPact ،Aires ،Lentis جانە Has قولدانبالى اگرارلىق ينستيتۋتتارى، نيدەرلاند ءبىلىم بەرۋ مەكەمەلەرىنىڭ وكىلدەرى بار.
سونداي-اق، دەلەگاتسيا قۇرامىنا گۇل ەكسپورتتايتىن 40 تان استام نيدەرلاند كومپانياسى كىرىپتى. ولار ەكسپو ورتالىعىندا 8-10-ءساۋىر ارالىعىندا ءوتىپ جاتقان Grow Expo Flora Expo حالىقارالىق اگرارلىق كورمەسىنە قاتىسۋدا.
ەسكە سالساق، وتكەن جىلدىڭ التى ايىندا قازاقستان مەن نيدەرلاند اراسىنداعى تاۋار اينالىمى 2,5 ميلليارد دوللارعا جەتكەن ەدى.
