قازاقستان ەلشىلىگى رەسەي س ءى م- ىنە نوتا جولدادى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ءماجىلىس دەپۋتاتتارىنىڭ ساۋالىنا جولداعان جاۋاپتا رەسەي تارابى قازاقستانعا ەۋروپادان ترانزيتتەلەتىن تاۋارلاردىڭ نەگە كەشىگىپ جاتقانىن ءتۇسىندىردى.

елшілік
Фото: kazgazeta.kz

- رەسەيلىك كەدەن قىزمەتتەرىنىڭ قازاقستاندىق تاسىمالداۋشىلاردى ۇستاۋى رەسەي فەدەراتسياسى ۇكىمەتىنىڭ 2022-جىلعى 9-ناۋرىزداعى 313-قاۋلىسىنىڭ 2024-جىلعى 15-قازانداعى تۇزەتۋلەرىنىڭ قولدانىلۋىنا بايلانىستى جۇرگىزىلەدى. بۇعان دەيىن تىزبەگە سايكەس جەكەلەگەن تاۋار تۇرلەرىن ەلدەرگە (ە و ەلدەرى جانە ت. ب.) اكەتۋگە تىيىم سالۋ قوسىمشا تاۋارلارعا تاراتىلعان. اتالعان وزگەرىستەر ءبىرقاتار تاۋارلاردى (ۇشقىشسىز ۇشۋ اپپاراتتارى، اسكەري كيىم، ەلەكتر گەنەراتورلارى، اككۋمۋلياتورلار جانە ت. ب.) رەسەي اۋماعىنان بەلگىلى ءبىر مەملەكەتتەر مەن اۋماقتارعا (ەۋروپا، ا ق ش، ۋكراينا جانە ت. ب.) اكەتۋگە قوسىمشا شەكتەۋلەر ەنگىزەدى. بۇل رەتتە رەسەي تاراپى وسى تۇزەتۋلەر ەنگىزىلگەنگە دەيىن قازاقستاندىق تاراپتى حاباردار ەتپەي، وسى شەكتەۋلەردى ءبىرجاقتى تارتىپپەن ەنگىزدى، - دەپ جازادى ۆيتسە-پرەمەر.

شەكتەۋ سالدارىنان قىتايدان ەۋروپالىق وداق ەلدەرىنە قازاقستان مەن رەسەي فەدەراتسياسىنىڭ اۋماقتارى ارقىلى ترانزيتپەن وتەتىن 20 كولىك شەكارادا قاڭتارىلعان.

- بۇل تاۋارلار وتكەن جىلدىڭ قازان ايىندا اكەتۋگە تىيىم سالىنعان تاۋارلار تىزىمىنە قوسىلدى. ايتا كەتۋ كەرەك، رەسەي فەدەراتسياسىنىڭ اۋماعىنان تاۋارلاردى اكەتۋگە سالىنعان تىيىمدار مەن شەكتەۋلەردى ساقتاماۋ رەسەي زاڭناماسىنا سايكەس 50 مىڭنان 300 مىڭ رۋبلگە دەيىن اكىمشىلىك ايىپپۇل تۇرىندە، تاۋارلاردى تاركىلەۋمەن نەمەسە ونسىز اكىمشىلىك جاۋاپكەرشىلىككە اكەپ سوعادى. وسى جاعدايدى شەشۋ ءۇشىن قازاقستاننىڭ ساۋدا جانە ينتەگراتسيا، سىرتقى ىستەر مينيسترلىكتەرى رەسەي فەدەراتسياسىنىڭ ۋاكىلەتتى ورگاندارىمەن كەلىسسوزدەر جۇرگىزۋدە. ساۋدا جانە ينتەگراتسيا مينيسترلىگى رەسەي فەدەراتسياسىنىڭ ەكونوميكالىق دامۋ مينيسترلىگىنە اتالعان كولىك قۇرالدارىن مەجەلى جەرگە شىعارۋ نەمەسە ولاردى قازاقستانعا قايتارۋ ماسەلەلەرىن شەشۋ تۋرالى حات جولدادى. ەاەو كەدەندىك اۋماعىنان كەتكەن كەزدە ۇستالعان تاۋارلار دەكلارانتقا نەمەسە وزگە دە تۇلعالارعا قايتارىلادى، - دەپ جازىلعان جاۋاپتا.

ماسكەۋ بۇل ماسەلەنى رەسەيدىڭ وزىنە سانكسيا سالعان ەلدەرگە قارىمتا جاۋابى دەپ ءتۇسىندىرىپ وتىر.

- سونداي-اق، قازاقستاننىڭ رەسەيدەگى ەلشىلىگى وسى ماسەلەنى شەشۋ تۋرالى ر ف سىرتقى ىستەر مينيسترلىگىنە ءتيىستى نوتا جولدادى. رەسەي تاراپىنىڭ اقپاراتىنا سايكەس، قازاقستان رەسپۋبليكاسىنىڭ اۋماعىنان تۇسەتىن جۇكتەرگە قاتىستى كورسەتىلگەن شارالار ەكسپورتتىق باقىلاۋ شارالارىنا سايكەس قولدانىلادى جانە ۇلتتىق قۇزىرەتكە جاتادى. بۇدان باسقا، تاۋارلاردىڭ جەكەلەگەن تۇرلەرىن اكەتۋگە تىيىم سالۋ ولاردى رەسەي فەدەراتسياسى ءۇشىن «دوستىق ەمەس» ەلدەردىڭ پايدالانۋىنا جول بەرمەۋ ءۇشىن ەنگىزىلدى. جالپى، بۇل ماسەلەلەر ۇكىمەتتىڭ تۇراقتى باقىلاۋىندا، جاقىن ارادا بۇل ماسەلەنى ەكىجاقتى فورماتتا دا، ەۋرازيالىق ەكونوميكالىق كوميسسيا الاڭىندا دا تالقىلاۋ جوسپارلانۋدا، - دەيدى سەرىك جۇمانعارين.

ەسكە سالساق، 1-اقپاننان باستاپ قازاقستانداعى الىمبەت پەن سىرىم وتكىزۋ پۋنكتەرىنىڭ جابىلۋىنا بايلانىستى رەسەيدىڭ ورىنبور وبلىسىنداعى قازاقستانمەن شەكاراداعى وتكىزۋ پۋنكتىنىڭ جۇمىسى ۋاقىتشا توقتاتىلادى.

سوڭعى جاڭالىقتار