قازاقستان كورشى ەلدەرگە سۋ ءۇشىن اقى تولەمەيدى

Нуржан Нуржигитов
Фото: gov.kz

استانا. KAZINFORM – ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ كورشى ەلدەرگە سۋ ءۇشىن اقى تولەۋ قاجەت بولۋى مۇمكىندىگىنە قاتىستى پىكىر ءبىلدىردى.

«ءبىز باسقا مەملەكەتتەرگە سۋ ءۇشىن ەشتەڭە تولەمەيمىز. قازىر ترانسشەكارالىق وزەندەر ءۇشىن تولەم جوق»، - دەدى نۇرجان نۇرجىگىتوۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، بۇل كەلىسىمدەر كەڭەس وداعىنان قالعان.

«1992-جىلى مەملەكەت باسشىلارى كەڭەس وداعى كەزىندە بولعان كەلىسىمدەردى ساقتاپ قالدى. ياعني، بۇرىنعى ۋاعدالاستىقتار قالادى جانە ءبىز وسى كەلىسىمدەر اياسىندا جۇمىستى جالعاستىرامىز»، - دەپ ناقتىلادى مينيستر.

ايتا كەتەيىك، بۇگىن ءماجىلىستىڭ جالپى وتىرىسىندا «حالىقارالىق سۋ اعىندارىن كەمە جۇرمەيتىن پايدالانۋ تۇرلەرىنىڭ قۇقىعى تۋرالى كونۆەنتسيانى راتيفيكاتسيالاۋ تۋرالى» زاڭى قابىلداندى.

قۇجات ترانسشەكارالىق وزەندەردى حالىقارالىق قۇقىق نەگىزىندە پايدالانۋعا ارنالعان.

سوڭعى جاڭالىقتار