قازاقستان كولىك سالاسىندا ەۋرازيانىڭ ءبىرىڭعاي اقپاراتتىق كارتاسىن قۇرۋعا باستاماشى بولادى

استانا. KAZINFORM – ق ر كولىك ءمينيسترى نۇرلان ساۋرانبايەۆ ەۋرازيانىڭ ءبىرىڭعاي اقپاراتتىق كارتاسىن جاساۋدى ۇسىندى، دەپ حابارلايدى Kazinform اگەنتتىگىنىڭ ءتىلشىسى.

نۇرلان ساۋرانبايەۆ الماتىدا وتكەن «جاڭا جىبەك جولى» VII حالىقارالىق كولىك-لوگيستيكالىق بيزنەس-فورۋمىندا سويلەگەن سوزىندە كولىك ينفراقۇرىلىمى سالاسىنداعى حالىقارالىق ىنتىماقتاستىق پەن اقپارات الماسۋدىڭ ماڭىزدىلىعىن اتاپ ءوتتى.

مينيستر سوڭعى كەزدەرى تۇركيا، پاكىستان، قىتاي، قىرعىزستان، تۇرىكمەنستان جانە رەسەيگە جاساعان ساپارلارىن، وندا ءتۇرلى فورۋمدارعا قاتىسقانىن تىلگە تيەك ەتتى.

- فورۋم - بۇل كەزدەسۋ عانا ەمەس، پىكىر، وي، تاجىريبە الماسۋ. ساپار بارىسىندا ءبىز ەلدەر اراسىندا بايلانىس پەن اقپارات الماسۋدىڭ از ەكەنىن كورىپ وتىرمىز. ماسەلەن، تۇرىكمەنستان قازاقستانعا زاماناۋي بەتون جول سالىپ جاتىر. ءبىزدىڭ جەكە جوبالارىمىز بار، جولدارىمىزدىڭ وتكىزۋ مۇمكىندىگى دە ءارتۇرلى. قىرعىزستاندا دا، رەسەيدە دە جاعداي وسىعان ۇقساس. سوندىقتان فورۋمدار ءبىزدىڭ جوسپارلارىمىزدى ۇندەستىرۋگە جانە اقپارات الماسۋعا بىرەگەي مۇمكىندىك بەرەدى، - دەپ اتاپ ءوتتى نۇرلان ساۋرانبايەۆ.

ول قازاقستاننىڭ كولىك سالاسىنداعى نەگىزگى باستامالارىن اتاپ ءوتتى. قازاقستان تاراپى ەۋرازيانىڭ ءبىرىڭعاي اقپاراتتىق كارتاسىن قۇرۋعا باستاماشىلىق ەتەدى.

- ءبىز ەۋرازيانىڭ ءبىرىڭعاي ۇلكەن كارتاسىن جاساعىمىز كەلەدى، سوندا ءىرى ستراتەگيالىق باعىتتاردا ورنالاسقان بارلىق ەلدەر وزدەرىنىڭ بولاشاق جوسپارى مەن دامۋى تۋرالى اقپارات الماسا الادى. جالپى، تەمىرجولعا قاتىستى بىزدە ناقتى تۇسىنىستىك بار، اقپارات الماسۋ بار. ال اۆتوموبيل جولدارىنا كەلەر بولساق، ءبىرىڭعاي ءىرى باعدارلاما جوق، - دەدى مينيستر.

مينيستر سونداي-اق شىعىس-باتىس جانە سولتۇستىك-وڭتۇستىك باعىتتارىندا تۇراقتىلىق پەن ينۆەستيتسيالاردى قورعاۋدى قامتاماسىز ەتەتىن لوگيستيكالىق جوبالار بويىنشا ءوزارا سالالىق ۇكىمەتارالىق كەلىسىمدەر قاجەتتىگىن اتاپ ءوتتى.

- لوگيستيكالىق ونىمدەر ناقتى مەرزىمدەردى، باعالاردى جانە قىزمەت كورسەتۋ ساپاسىن تالاپ ەتەدى. مارشرۋت بىرنەشە ەل ارقىلى وتكەندە شارتتار، باعالار مەن مەرزىمدەر وزگەرۋى مۇمكىن. ءىرى لوگيستيكالىق جوبانى جۇزەگە اسىرۋ كەزىندە، ءبىزدىڭ پىكىرىمىزشە، ۇكىمەتارالىق كەلىسىمدەر وتە ماڭىزدى. بۇل يدەيانى قازاقستان پرەزيدەنتى قاسىم-جومارت توقايەۆ تۇركياعا ساپارى كەزىندە العا تارتىپ، ءوزارا كەلىسىمدى قايتا باستاۋ قاجەتتىگىن باسا ايتتى. بارلىق ەلدەردى قامتيتىن ترانسكاۆكازدىق كولىك جولى (ك ت ر) قازاقستاننىڭ باستاماسىمەن جاسالعان. بۇل ۇكىمەتارالىق كەلىسىمگە ەكى تاراپ قول قويادى، سودان كەيىن باعىت بويىنشا باسقا ەلدەر دە قوسىلا الادى، - دەپ قوستى ول.

مينيستر ءار ەل لوگيستيكالىق ونىمگە قوماقتى ينۆەستيتسيا سالىپ جاتقانىن اتاپ ءوتتى. جاقىندا قازاقستان شامامەن 35 ميلليارد دوللار ينۆەستيتسيالادى، تاعى 15 ميلليارد دوللار ينۆەستيتسيالاۋدى جوسپارلاپ وتىر، بۇل ينۆەستيتسيانىڭ جالپى كولەمىن 50 ميلليارد دوللارعا جەتكىزۋ كەرەك. بۇل ينۆەستيتسيالار ۇزاق مەرزىمدى ناتيجە بەرۋى ءتيىس.

قورىتىندىلاي كەلە، مينيستر ارىپتەستەرى مەن سەرىكتەستەرىنە ىنتىماقتاستىعى ءۇشىن العىس ايتىپ، الداعى حالىقارالىق كورمەلەردىڭ ماڭىزدىلىعىنا توقتالدى.

- جاقىن ارادا گرۋزيا، وزبەكستان جانە پاكىستاندا ءىرى كورمەلەر وتەدى دەپ كۇتىپ وتىرمىز. قازاقستان وسى شارالاردىڭ بارلىعىنا قاتىسىپ، ەۋرازيانىڭ دامۋىنا ءوز ۇلەسىن قوسادى، - دەدى نۇرلان ساۋرانبايەۆ.

ەستەرىڭىزگە سالا كەتەيىك، ءدال قازىر الماتىدا «New Silk Way» VII حالىقارالىق كولىك-لوگيستيكالىق بيزنەس فورۋمى ءوتىپ جاتىر.

مەملەكەت باسشىسى قاسىم-جومارت توقايەۆ تەلەكوپىر ارقىلى «New Silk Way» بيزنەس- فورۋمىنا قاتىسىپ، دوستىق-مويىنتى تەمىرجول ۋچاسكەسىنىڭ ەكىنشى جولىن ىسكە قوستى. بۇل جوبانىڭ قازاقستان ەكونوميكاسىنا تيگىزەر پايداسىن ق ر پرەزيدەنتىنىڭ كومەكشىسى - باسپا ءسوز حاتشىسى رۋسلان جەلدىباي تالقىلادى.