قازاقستان جاساندى ينتەللەكتتى كۇندەلىكتى ومىردە قولدانۋ ءۇشىن 1 ميلليون ادامدى وقىتپاق

الماتى. KAZINFORM - ولجاس بەكتەنوۆ alem.ai ورتالىعىنىڭ بازاسىندا جاساندى ينتەللەكت سالاسىنداعى بىرلەسكەن جوبالاردى ىسكە اسىرۋ ءۇشىن ە ا ە و ەلدەرىنىڭ كۇش-جىگەرىن بىرىكتىرۋدى ۇسىندى.

Жасанды интеллект
Фото: Александр Павский / Kazinform

- مەملەكەت باسشىسى قاسىم-جومارت توقايەۆ alem.ai حالىقارالىق جاساندى ينتەللەكت ورتالىعىنىڭ نەگىزىندە قۇزىرەتتىلىكتەر ەكوجۇيەسىن قۇرۋ باستاماسىن كوتەردى. ول بيىل اشىلاتىن بولادى. بۇل ءبىر الاڭدا شەشىمدەردى بىرلەسىپ ازىرلەۋ ءۇشىن جەتەكشى IT- كومپانيالاردى، زەرتتەۋ زەرتحانالارىن، ستارتاپتار مەن ءبىلىم بەرۋ باعدارلامالارىن بىرىكتىرۋگە مۇمكىندىك بەرەدى. ءبىز alem.ai ورتالىعىنىڭ بازاسىندا جاساندى ينتەللەكت سالاسىنداعى بىرلەسكەن جوبالاردى ىسكە اسىرۋ ءۇشىن ە ا ە و ەلدەرىنىڭ كۇش-جىگەرىن بىرىكتىرۋدى ۇسىنامىز، - دەدى ۇكىمەت باسشىسى «Digital Almaty 2025» فورۋمىندا.

سونداي-اق ول تەك IT- مامانداردى وقىتۋدا عانا ەمەس، جاساندى ينتەللەكتتى كۇندەلىكتى ومىردە ءتيىمدى قولدانۋدا كەشەندى ءتاسىلدى قامتاماسىز ەتۋدىڭ ماڭىزى زور ەكەنىن جەتكىزدى.

- سوندىقتان ءبىز بەس جىل ىشىندە قازاقستاندا اتالعان سالادا 1 ميلليون ادامدى وقىتۋعا قاتىستى الدىمىزعا ۇلكەن ماقسات قويىپ وتىرمىز.

وتكەن جىلى فرانسۋز پەداگوگى نيكوليا ساديراكپەن (Ecole42 مەكتەبىنىڭ نەگىزىن قالاۋشى) بىرلەسىپ، قازاقستاندا Tomorrow School جاساندى ينتەللەكت مەكتەبى اشىلدى. ونداعى ءبىلىم بەرۋ باعدارلاماسى وقىتۋشىلاردى قاجەت ەتپەيدى، جاساندى ينتەللەكتتىڭ ءوزى جاڭا داعدىلاردى مەڭگەرۋگە كومەكتەسەدى.

سونداي-اق مەكتەپتە وقىتۋدىڭ يننوۆاتسيالىق ويىن ادىستەرى قولدانىلادى. ءبىز وسىنداي ەرەكشە ءتاسىل تاجىريبەسىمەن بولىسۋگە ءازىرمىز، - دەدى ولجاس بەكتەنوۆ.

وسىعان دەيىن مەملەكەت باسشىسى قاسىم-جومارت توقايەۆ Alem.ai حالىقارالىق جاساندى ينتەللەكت ورتالىعىنىڭ جۇمىسىمەن تانىسقان بولاتىن.

ايتا كەتەيىك، Digital Almaty فورۋمىندا بەلارۋس، قازاقستان، قىرعىزستان، رەسەي جانە ارمەنياننىڭ ۇكىمەت باسشىلارى سيفرلىق جوبالار كورمەسىمەن تانىسىپ، پلەنارلىق سەسسياعا قاتىسىپ جاتىر.

سوڭعى جاڭالىقتار