قازاقستان بالالارى قانداي كىتاپتاردى جاتا-جاستانا وقىپ ءجۇر

استانا. KAZINFORM - قازاقستانداعى جاس وقىرماندار فانتاستيكا، كوميكستەر مەن كوركەم ادەبيەت وقىعاندى ۇناتادى.

بالالاردى قورعاۋ كۇنىنە وراي مادەنيەت جانە اقپارات مينيسترلىگى 249 بالالار كىتاپحاناسى اراسىندا وقىرماندار سۇرانىسى بويىنشا تالداۋ جۇرگىزدى.

بيىل جاس وقىرماندار سانى 1733686 ادامعا جەتتى.

ساۋالناما ناتيجەسى بويىنشا بالالاردىڭ كىتاپحاناعا دەگەن قىزىعۋشىلىعى ارتىپ كەلەدى، ولار اسىرەسە فانتاستيكا، كوميكستەر مەن كوركەم ادەبيەت وقىعاندى ۇناتادى.

ەڭ كوپ وقىلاتىن كىتاپتار - بەردىبەك سوقپاقبايەۆتىڭ «بالالىق شاققا ساياحات»، «مەنىڭ اتىم قوجا»، سايىن مۇراتبەكوۆتىڭ «جابايى الما»، جوان روۋليڭنىڭ «حارري پوتتەر» جانە مارك تۆەننىڭ «توم سويەر» شىعارمالارى بولدى.

بايانعالي ءالىمجانوۆ، تولىمبەك ءابدىرايىم، زيرا ناۋرىزبايەۆا، سەرىكبول حاسان، زاۋرە تورەحان جانە باسقا اۆتورلاردىڭ شىعارمالارىن بالالار قىزىعۋشىلىقپەن وقىعان.

بالالار ءسۇيىپ وقيتىن باسىلىمنىڭ ءبىرى - كوميكستەر.

جاس وقىرماندار ۇلاربەك نۇرعالىم ۇلىنىڭ «ءىلياس پەن زاڭعاردىڭ پلانشەتى»، ورازحان جاقىپتىڭ «ەركەتاي»، ءىلياس يۋسۋفتىڭ «كەرەي مەن جانىبەك» شىعارمالارىن، سونداي-اق مايك بارفيلدتىڭ «كوميكستەگى الەم تاريحى»، «كوميكستەگى جاراتىلىستانۋ» اۋدارماسىن ۇناتادى.

قازاق ەرتەگىلەرى مەن الەم حالىقتارىنىڭ ەرتەگىلەرى بويىنشا «قازاق جانە الەم حالقىنىڭ ەرتەگىلەرى»، «اۆتورلىق ەرتەگىلەر»، «الاتاۋ ەرتەگىلەرى»، «تاڭداۋلى ەرتەگىلەر»، چارلز پەررو مەن اعايىندى گريممدەردىڭ ەرتەگىلەرى كوپ سۇرالادى.

ايتا كەتەيىك، قازاقستانداعى بالالار كىتاپحانالارىنىڭ قىزمەتى بالانى تاربيەلەۋگە، ءبىلىم بەرۋگە، اقپاراتتاندىرۋعا جانە تۇلعالىق دامىتۋعا باعىتتالعان.

اۆتور
جانات قاپالبايەۆا