قازاقستان العاش رەت بىتىمگەرلىك مىندەتىن دەربەس ورىنداۋعا كىرىستى - پرەزيدەنت
استانا. KAZINFORM - مەملەكەت باسشىسى ۇلتتىق بىتىمگەرلىك كونتينگەنتىنىڭ اسكەري قىزمەتشىلەرىمەن كەزدەستى. بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆ ۇلتتىق بىتىمگەرلىك قۇرام ساپىندا تابىستى قىزمەت اتقارىپ، حالىقارالىق قاۋىپسىزدىكتى نىعايتۋعا زور ۇلەس قوسقان وفيتسەرلەرمەن جانە ساربازدارمەن كەزدەستى. پرەزيدەنت ەلىمىزگە جۇكتەلگەن جاۋاپتى مىندەتتى جوعارى دەڭگەيدە اتقارىپ كەلگەن اسكەريلەر ەرلىك پەن باتىلدىقتىڭ وزىق ۇلگىسىن كورسەتكەنىن، سول ارقىلى ۇلتتىق ارميامىزدىڭ، تۇتاس مەملەكەتىمىزدىڭ بەدەلى كوتەرىلگەنىن اتاپ ءوتتى.
- بىتىمگەر بولۋ - بەيبىتشىلىكتىڭ ەلشىسى بولۋ دەگەن ءسوز. بۇل - ۇلكەن ابىروي ءارى زور جاۋاپكەرشىلىك، ناعىز ەرجۇرەك جاۋىنگەرلەردىڭ قولىنان كەلەتىن ءىس. بارشاڭىزعا شىنايى ريزاشىلىعىمدى بىلدىرەمىن. قازىر الەمدەگى جاعداي اسا كۇردەلى ەكەنىن بىلەسىزدەر. ءتۇرلى قاقتىعىستار بولىپ جاتىر. وكىنىشكە قاراي، ونىڭ ءبارىن كەلىسسوز ارقىلى شەشۋ مۇمكىن بولماي تۇر. مۇنداي كەزدە بىتىمگەرلىك ميسسيالارى ايرىقشا ءرول اتقارادى. قازاقستان - بەيبىت ەل. ءبىز الەمدە تۇراقتىلىق ورناتۋدى كوزدەيتىن بارلىق باستامانى قولدايمىز، - دەدى جوعارعى باس قولباسشى.
پرەزيدەنتتىڭ ايتۋىنشا، ەلىمىزدىڭ قارۋلى كۇشتەرى 2014 -جىلدان بەرى بىرىككەن ۇلتتار ۇيىمىنىڭ بىتىمگەرلىك قىزمەتىنە ءوز ۇلەسىن قوسىپ كەلەدى. 80 ازامات بايقاۋشى جانە شتاب وفيتسەرى رەتىندە بىرنەشە ميسسياعا اتسالىسىپ، 700 گە جۋىق اسكەري قىزمەتشى ب ۇ ۇ-نىڭ ارنايى وپەراتسيالارىنا قاتىسقان. مەملەكەت باسشىسى ولاردىڭ ىشىندە ءاليا مەن مانشۇكتىڭ، حيۋازدىڭ جولىن جالعاعان جاۋجۇرەك ارۋلار دا بار ەكەنىن اتاپ ءوتتى.
قاسىم-جومارت توقايەۆ كوپتەگەن ەل بىتىمگەرلىك كۇشتەرگە قوسىلۋعا ۇمتىلاتىنىنا، ءبىراق بارىنە بىردەي سەنىم ارتىلا بەرمەيتىنىنە نازار اۋداردى. قازاقستانعا وسىنداي مۇمكىندىك بەرىلىپ وتىرعانىن، بۇل رەتتە ۇلتتىق ارميامىز بىلتىر تاعى ءبىر تاريحي قادام جاساعانىن ايتتى.
- قازاقستان العاش رەت بىتىمگەرلىك مىندەتىن دەربەس ورىنداۋعا كىرىستى. گولان جوتالارىنداعى وپەراتسيا اياسىندا بىرىككەن ۇلتتار ۇيىمىمەن قارىم- قاتىناسىمىز مۇلدە جاڭا دەڭگەيگە كوتەرىلدى. ءبىز تولىققاندى بىتىمگەرلىك كۇشتەرى بار ەلدەردىڭ قاتارىنا قوسىلدىق. قازاقستان - وسى سالادا مول تاجىريبە جيناقتاعان ورتالىق ازياداعى بىردەن- ءبىر مەملەكەت، - دەدى پرەزيدەنت.
جوعارعى باس قولباسشى ساربازداردى ماڭىزدى ميسسيالارعا دايارلاۋ ىسىنە ايرىقشا نازار اۋداردى. ونىڭ ايتۋىنشا، از ۋاقىت ىشىندە اسكەري قىزمەتشىلەردى ءتۇرلى داعدىلارعا بەيىمدەپ، ولاردى حالىقارالىق ستاندارتتارعا ساي قۇرال-جابدىقتارمەن تۇگەل قامتاماسىز ەتۋ ءۇشىن ساپالى جۇمىس اتقارىلدى.
- بۇل اسكەرىمىزدىڭ اسا كۇردەلى مىندەتتەردى ورىنداۋعا قابىلەتتى ەكەنىن كورسەتەدى. سىزدەر سيريا داعدارىسىنىڭ شەشۋشى ساتىندە ۇتىمدى ءارى باتىل ارەكەت جاسادىڭىزدار. قازاقستان ارمياسىنىڭ كاسىبي دەڭگەيى جوعارى ەكەنىن دالەلدەپ بەردىڭىزدەر. سول كۇندەرى قازاق جاۋىنگەرىنىڭ اسقاق رۋحى مەن قايسارلىعىنا بۇكىل الەم كۋا بولدى. سىزدەر قاۋىپتى ايماقتاردا جۇمىس ىستەپ، ەرەن ەرلىك كورسەتىپ، مول تاجىريبە جيناپ كەلدىڭىزدەر. ەندى وسى تاجىريبەنى ءبولىسىپ، باسقا دا اسكەري قىزمەتشىلەردى ۇيرەتۋ قاجەت. بىتىمگەرلىك ميسسيا كەزىندە مەڭگەرگەن جاڭا داعدىلاردى ەلىمىزدىڭ اسكەر دايارلاۋ جۇيەسىنە ەنگىزۋ وتە ماڭىزدى، - دەدى مەملەكەت باسشىسى.
قازىر ەلىمىزدىڭ 158 ازاماتى افريكا جانە تاياۋ شىعىس ايماعىندا بىتىمگەرلىك قىزمەتتە ءجۇر. بولاشاقتا بىرىككەن ۇلتتار ۇيىمى اياسىندا ءوتىپ جاتقان باسقا دا ميسسيالارعا قاتىسۋدى جوسپارلاپ وتىرمىز. وسىلايشا، قازاقستان جەر جۇزىندەگى بەيبىتشىلىك پەن كەلىسىمدى نىعايتۋعا بەلسەندى تۇردە اتسالىسا بەرمەك.
- قارۋلى كۇشتەر - ەلىمىزدىڭ ەگەمەندىگى مەن تاۋەلسىزدىگىنىڭ باستى تىرەكتەرىنىڭ ءبىرى. ەڭ الدىمەن، ساربازدارى مەن وفيتسەرلەرىنىڭ رۋحى اسقاق، كاسىبي دەڭگەيى جوعارى، جاۋىنگەرلىك ماشىعى ءمىنسىز، ءتارتىپ پەن تازالىقتى مۇلتىكسىز ساقتايتىن اسكەر قۋاتتى بولادى. ارميا - قايسارلىققا باۋليتىن، جىگەردى جانيتىن ناعىز مەكتەپ. سىزدەر ازاماتتىق بورىش پەن اسكەري انتقا ادالدىق تانىتىپ، شىنايى پاتريوتيزمنىڭ ۇلگىسىن كورسەتتىڭىزدەر. ءمىنسىز قىزمەتتەرىڭىز وسكەلەڭ ۇرپاققا ونەگە. مەملەكەت باسشىسى رەتىندە مەن قاۋىپسىزدىك جانە قۇقىق قورعاۋ سالاسىنا ءاردايىم ايرىقشا كوڭىل بولەمىن. جاقىندا اقوردادا ارناۋلى جاساقتار اراسىنداعى بەدەلدى حالىقارالىق جارىستان جۇلدەمەن ورالعان كۇشتىك قۇرىلىم قىزمەتكەرلەرىن ماراپاتتادىق. جالپى، اسكەري بولىمدەر مەن كۇشتىك قۇرىلىمداردىڭ بەدەلى مەن دايارلىق دەڭگەيى ەداۋىر ءوستى. قۇقىق قورعاۋ جانە ارناۋلى ورگاندار قىلمىسپەن كۇرەستە، تەرروريزم مەن ەسىرتكى بيزنەسىنىڭ جولىنا توسقاۋىل قويۋدا تيىمدىلىگىن كورسەتىپ كەلەدى. الايدا بوساڭسۋعا مۇلدە بولمايدى. الدىمىزدا مەملەكەتىمىزدىڭ قورعانىس قابىلەتىن نىعايتۋ مىندەتى تۇر، - دەدى مەملەكەت باسشىسى.
پرەزيدەنت قازاقستان ءومىر سۇرۋگە قولايلى جانە قاۋىپسىز ەل بولۋعا ءتيىس دەپ سانايدى. بۇل ءۇشىن مەملەكەت تاراپىنان بارلىق قاجەتتى شارا قابىلدانىپ جاتىر.
- «زاڭ مەن ءتارتىپ»، وتانشىلدىق پەن جاۋاپكەرشىلىك - اسكەري قىزمەتشىلەرگە عانا ەمەس، ەلىمىزدىڭ بارلىق ازاماتتارىنا ورتاق اسا ماڭىزدى قۇندىلىقتار. وسى جاسامپاز قاسيەتتەر قوعامدا جان-جاقتى دارىپتەلۋگە ءتيىس. سەبەبى ءبىز قازىر ءبارىمىز ءبىر ەل بولىپ ادىلەتتى، قاۋىپسىز جانە قۋاتتى قازاقستاندى قۇرىپ جاتىرمىز، - دەدى مەملەكەت باسشىسى.
ءسوز سوڭىندا قاسىم-جومارت توقايەۆ اسكەري قىزمەتشىلەرگە جاۋىنگەرلىك مىندەتتەرىن ءمىنسىز اتقارعانى ءۇشىن تاعى دا العىس ايتىپ، ولارعا تىلەكشى بولعان جاقىندارى مەن وتباسىلارىنا ريزاشىلىعىن ءبىلدىردى.
- قازاقتا «ەردىڭ ءىسى - ەلدىڭ ءىسى» دەگەن ءسوز بار. سىزدەر ەلدىك پەن ەرلىكتىڭ تۋىن بيىك ۇستاپ جۇرسىزدەر. الداعى ۋاقىتتا دا قاسيەتتى وتانىمىزدى قورعاپ، تاباندى ەڭبەك ەتەسىزدەر دەپ سەنەمىن. ارميامىزدىڭ ايبىنى ارتا بەرسىن! ەلىمىز امان، اسكەرىمىز قۋاتتى بولسىن! - دەدى پرەزيدەنت.
بۇدان كەيىن مەملەكەت باسشىسى اسكەري بورىشىن ۇلگىلى اتقارعانى، بىرىككەن ۇلتتار ۇيىمىنىڭ گولان جوتالارىنداعى بىتىمگەرلىك ميسسياسىن جۇزەگە اسىرۋ بارىسىندا كورسەتكەن ەرلىگى مەن جانقيارلىعى ءۇشىن ءبىر توپ اسكەري قىزمەتشىنى مەملەكەتتىك ناگرادالارمەن ماراپاتتادى.
ايتا كەتەلىك قازاقستاندىق بىتىمگەرلەر سيريادان ەلگە ورالعان ەدى. قازاقستاندىق بىتىمگەرلەر ب ۇ ۇ-نىڭ 24 قىزمەتكەرىن ەۆاكۋاتسيالادى. سونداي-اق سيرياعا بارعان بىتىمگەر جەرگىلىكتى حالىقتىڭ ارمانى تۋرالى ايتقان ەدى. سونىمەن قاتار پرەزيدەنت ءبىر توپ بىتىمگەر اسكەري قىزمەتشىنى مەملەكەتتىك ناگرادالارمەن ماراپاتتاعان ەدى.
