قازاقستاندا جول ەرەجەلەرى جاڭاردى: جۇرگىزۋشىلەر نەنى ءبىلۋى كەرەك؟

نەگىزگى وزگەرىستەر 11-مامىردان باستاپ قولدانىسقا ەنگىزىلسە، قالعانى 12-شىلدەدەن باستاپ ىسكە اسادى. جاڭاشىلدىقتار جۇرگىزۋشىلەرگە دە، جاياۋ جۇرگىنشىلەرگە دە تىكەلەي اسەر ەتەدى.

ورتاشا جىلدامدىق قالاي ەسەپتەلەدى؟

جاڭا وزگەرىستەردىڭ ەڭ ماڭىزدىسى - ورتاشا جىلدامدىققا قاتىستى. بۇل - كولىكتىڭ بەلگىلى ءبىر جول ۋچاسكەسىن قانشا ۋاقىتتا ءجۇرىپ وتكەنىنە قاراي ەسەپتەلەتىن كورسەتكىش.

ياعني جىلدامدىق ءبىر نۇكتەدە عانا ولشەنبەيدى، جۇرگىزۋشىنىڭ ەكى ارالىقتاعى تولىق قوزعالىسى ەسكەرىلەدى.

جۇرگىزۋشى ءبىر جەردە باياۋلاپ، كەيىن قاتتى جىلدامدىق قوسسا دا، جۇيە بۇكىل جولداعى ورتاشا كورسەتكىشتى شىعارادى. بۇل ءتاسىل قازاقستاندا 2023-جىلدان بەرى بار، ەندى ونى قولدانۋ اۋقىمى كەڭەيىپ وتىر. اسىرەسە قالاارالىق تراسسالاردا باقىلاۋ كۇشەيەدى.

ايىپپۇل قانشا بولادى؟

ورتاشا جىلدامدىقتى اسىرعانى ءۇشىن جازا اكىمشىلىك قۇقىق بۇزۋشىلىق تۋرالى كودەكستىڭ 592-بابى بويىنشا بەلگىلەنەدى. ايىپپۇل ايلىق ەسەپتىك كورسەتكىشكە بايلانىستى ەسەپتەلەدى. 2026-جىلى 1 ا ە ك - 4325 تەڭگە.

جىلدامدىقتى اسىرۋ دەڭگەيىنە قاراي:

- 10-20 ك م/ساعات - 5 ا ە ك (21625 تەڭگە)؛

- 20-40 ك م/ساعات - 10 ا ە ك (43250 تەڭگە)؛

- 40 ك م/ساعات جانە ودان جوعارى - 20 ا ە ك (86500 تەڭگە)؛

- ءبىر جىل ىشىندە قايتا بۇزسا - 30 ا ە ك (129750 تەڭگە)؛

- 60 ك م/ساعات جانە ودان جوعارى - 40 ا ە ك (173000 تەڭگە).

قاي جولداردا ەنگىزىلدى؟

قازىر ورتاشا جىلدامدىقتى باقىلاۋ اقىلى جولداردىڭ بىرنەشە ۋچاسكەسىندە جۇمىس ىستەپ تۇر. ولاردىڭ قاتارىندا:

- استانا - شۋچينسك؛

- استانا - پاۆلودار؛

- شىمكەنت - قىزىلوردا؛

- شىمكەنت - تاراز؛

- پاۆلودار - سەمەي - قالباتاۋ؛

- ورال - رەسەي شەكاراسى (ساراتوۆ باعىتى)؛

- پاۆلودار - رەسەي شەكاراسى (ومبى باعىتى)؛

- جىبەك جولى - تەمىرتاۋ.

بۇل باعىتتاردا جۇرگىزۋشىلەرگە جىلدامدىق رەجيمىن ساقتاۋ بۇرىنعىدان دا ماڭىزدى.

ج ك و- دان كەيىن تەحنيكالىق تەكسەرىس كۇشەيەدى

قۇجاتتا بۇرىننان بار كەيبىر تالاپتار ناقتىلانىپ، باقىلاۋ كۇشەيتىلگەن. سونىڭ ءبىرى - جول- كولىك وقيعاسىنان كەيىنگى تەحنيكالىق بايقاۋ.

ەگەر اپاتتان كەيىن كولىكتە پايدالانۋعا بولمايتىن اقاۋلار انىقتالسا، ونىڭ دياگنوستيكالىق كارتاسى جارامسىز دەپ تانىلادى. مۇنداي جاعدايدا كولىك يەسى تەحنيكالىق تەكسەرىستەن قايتا وتۋگە مىندەتتى. بۇل تالاپ بۇرىن دا بولعان، ءبىراق ەندى سيفرلىق جۇيەلەر ارقىلى قاتاڭ قاداعالانادى.

ەلەكتروساموكاتتارعا جاڭا شەكتەۋ

شىلدە ايىنان باستاپ ەلەكتروساموكاتتارعا قاتىستى تالاپتار دا وزگەرەدى. بۇعان دەيىن ولار تروتۋارمەن ساعاتىنا 6 ك م جىلدامدىقپەن جۇرۋگە رۇقسات ەتىلگەن بولسا، ەندى بۇل مۇمكىندىك الىنىپ تاستالادى.

ەندى ساموكاتتار:

- ۆەلوجولداردا؛

- ۆەلوجولاقتاردا؛

- جول جيەگىندە؛

- جولدىڭ وڭ جاق شەتىندە عانا قوزعالا الادى.

تەك ارنايى ورتاق ايماقتاردا، جاياۋ جۇرگىنشىلەرگە باسىمدىق بەرىلگەن جاعدايدا جانە جىلدامدىق 6 ك م/ساعاتتان اسپاسا، بىرگە جۇرۋگە رۇقسات ەتىلەدى. تۇنگى ۋاقىتتا ساموكات مىندەتتى تۇردە جارىق قۇرالدارىمەن جابدىقتالۋى ءتيىس.

ارنايى كولىكتەرگە جول بەرۋ تالابى

ءى ءى م تاعى ءبىر ماڭىزدى ەرەجەنى ەسكە سالدى. جارقىلداۋىق شامدارى قوسىلعان ارنايى كولىك جاقىنداعاندا:

- جاياۋ جۇرگىنشىلەر جولعا شىقپاۋى كەرەك؛

- ال جولدا كەلە جاتقان جۇرگىزۋشىلەر ارنايى كولىككە بىردەن جول بەرۋى ءتيىس.

بۇل تالاپ بۇرىننان بار بولعانىمەن، جيى ساقتالا بەرمەيدى.

كامەرالار ەسكەرتۋسىز جۇمىس ىستەي الادى

جاڭاشىلدىقتاردىڭ ءبىرى - جولداعى كامەرالارعا قاتىستى. ەندى ولار مىندەتتى تۇردە الدىن الا ەسكەرتۋ بەلگىلەرىنسىز دە جۇمىس ىستەي الادى. بۇل جۇرگىزۋشىلەر ءۇشىن كۇتپەگەن وزگەرىس بولۋى مۇمكىن.

پوليتسيا توقتاتسا، جۇرگىزۋشىنىڭ قۇقىعى قانداي؟

پوليتسيا قىزمەتكەرى كولىكتى توقتاتقان جاعدايدا بۇرىنعى ءتارتىپ ساقتالادى. ول ءوزىن تانىستىرىپ، قىزمەتتىك كۋالىگىن كورسەتۋى ءتيىس.

سونىمەن قاتار جاڭا وزگەرىسكە سايكەس، جۇرگىزۋشى وزىنە تاعىلعان قۇقىق بۇزۋشىلىقتىڭ بەينەجازباسىن سول جەردە كورسەتۋدى تالاپ ەتە الادى.