«قازاقمىس» كەنىشىندە تاعى ەكى ادام قازا بولدى

«قازاقمىس» كومپانياسىنىڭ جامبىل وبلىسىنداعى «جايسان» كەنىشىندە ەكى جۇمىسشى قازا بولدى. قازاقپارات بۇل تۋرالى كومپانيانىڭ رەسمي سايتىنا سىلتەمە جاساپ حابارلايدى.

«قازاقمىس» كومپانياسى 27 -قاراشادا جامبىل وبلىسىنداعى «جايسان» كەنىشىندە بولعان جازاتايىم وقيعا تۋرالى وكىنىشپەن حابارلايدى.

تاۋ- كەن جۇمىستارىن جۇرگىزۋ كەزىندە ع. وماروۆ اتىنداعى شاحتا پروحودكالاۋ ترەستىنىڭ 1981 جانە 2002 -جىلى تۋعان قىزمەتكەرلەرى (ۇڭگۋشىلەر) اۋىر جاراقات سالدارىنان قازا بولدى.

ارنايى كوميسسيا جازاتايىم وقيعانىڭ ءمان- جايى مەن سەبەپتەرىن انىقتاپ جاتىر.

«قازاقمىس» كومپانياسىنىڭ باسشىلىعى مەن ەڭبەك ۇجىمى قازا تاپقانداردىڭ تۋىستارى مەن جاقىندارىنا قايعىرىپ كوڭىل ايتادى»، - دەلىنگەن حابارلامادا.

كەنىشكە جامبىل وبلىستىق ەڭبەك ينسپەكسياسىندا قۇرىلعان ارنايى توپ باراتىنى بەلگىلى بولدى.

«بۇگىن قايعىلى وقيعا ورىن العان جەرگە جامبىل وبلىستىق ەڭبەك ينسپەكسياسىنىڭ ارنايى قۇرىلعان كوميسسيا توبى بارادى. باسقا اقپاراتتار ارنايى كوميسسيانىڭ شەشىمىنەن سوڭ بەلگىلى بولادى. ازىرگە تەرگەپ- تەكسەرۋ جۇرگىزىلىپ، وقيعانىڭ ءمان- جايى انىقتالۋدا»، - دەيدى جامبىل وبلىستىق توتەنشە جاعدايلار قىزمەتى باسپا ءسوز حاتشىسى ساۋلە مۇناتايەۆا.

ايتا كەتەيىك، «قازاقمىسقا» تيەسىلى كەنىشتەردە سوڭعى ۋاقىتتا جازاتايىم وقيعالار كوبەيدى. ماسەلەن، وسىدان ءبىر اپتا بۇرىن «قازاقمىس» كومپانياسىنىڭ جەزقازعان بايىتۋ فابريكاسىندا ماشينيست مەرت بولدى.

ال 6 -قاراشادا شىعىس جەزقازعان كەنىشىنىڭ №57 شاحتاسىندا جۇمىسشى قازا تاۋىپ، «جىلاندى» كەنىشىندە 6 قىزمەتكەر جاراقات العانى حابارلانعان ەدى.

«قازاقمىس» - قازاقستانداعى ەڭ ءىرى مىس ءوندىرۋشى. كومپانيانىڭ قۇرامىندا 10 كەنىش، بەس تاۋ-كەن بايىتۋ فابريكاسى، ەكى مىس بالقىتۋ زاۋىتى، ەكى كومىر رازرەزى بار. «قازاقمىس» كەندى ءوندىرۋدى جانە ونى تاۋارلىق مەتالعا وڭدەۋدى جۇرگىزەتىن وندىرىستىك وبەكتىلەردى باسقارادى.

ال «جايساڭ» كەنىشىندەگى جۇمىس 2020-جىلى باستالعان.

اۆتور

ەلۆيرا جارىلقاسىنوۆا