قازاق ەلىندە ءوتىپ جاتقان دۇنيەجۇزىلىك كوشپەندىلەر ويىنىنا قاتىسقانىمنىڭ ءوزى ۇلكەن مارتەبە - قىتايلىق قازاق بالۋان

استانا. KAZINFORM - استانا قالاسىندا ءوتىپ جاتقان 5-دۇنيەجۇزىلىك كوشپەندىلەر ويىندارىنا قىتاي ەلىندە تۇراتىن قانداستارىمىز دا سىنعا ءتۇسىپ، ءوز شەبەرلىكتەرىن ءپاش ەتىپ جاتىر.

بۇگىن قازاق كۇرەسىنەن باستالعان جارىس اياسىندا قىتايدا تۋىپ-وسكەن قانداسىمىز ەراسىل شايكەن ۇلى ەسىمدى بالۋاننان شاعىن سۇحبات الۋدىڭ ءساتى ءتۇستى.

- ەراسىل، ءوزىڭىزدى قىسقاشا تانىستىرا كەتسەڭىز.

- اتى-ءجونىم ەراسىل شايكەن ۇلى. قىتايدىڭ قازاقستانمەن شەكەرالاس تارباعاتاي قالاسىندا دۇنيەگە كەلدىم. مىنە، بۇگىن ءساتى ءتۇسىپ، قازاق ەلىنە كەلىپ، وسىندا العاش رەت ءوتىپ جاتقان 5- دۇنيەجۇزىلىك كوشپەندىلەر ويىنىنا قاتىسىپ جاتىرمىن. 74 كەلى سالماقتا سىنعا ءتۇسىپ جاتىرمىن.

- ءبىرىنشى رەت كەلىپ تۇرسىز با؟

- ءيا، ءبىرىنشى كەلۋىم.

- قازاق ەلى قالاي ەكەن؟ نەسىمەن قىزىقتىرىپ جاتىر؟

- وتە كەرەمەت! استانا قانداي كوركەم، قانداي تازا قالا. كوشپەندىلەر ويىنىن دا وتە جوعارى دەڭگەيدە ۇيىمداستىرىپ جاتقانى تاڭعالدىردى. وسىنداي، قازاق ەلىندە ءوتىپ جاتقان دۇنيەجۇزىلىك دودادا باق سىناپ جاتقانىمدى ماقتان تۇتامىن. بۇل مەن ءۇشىن ۇلكەن مارتەبە.

- قىتاي قۇراماسىنان قانشا بالۋان كەلدىڭىزدەر؟

- قازاق كۇرەسى مەن بەلبەۋ كۇرەسىنە قاتىسۋعا جالپى 9 بالۋان كەلدىك. قازاق كۇرەسىنەن ءبىرىنشى بەلدەسۋىمدى ءساتتى باستاپ ەدىم، وكىنىشكە قاراي، ەكىنشى بەلدەسۋىمدە قارسىلاسىما جول بەرىپ قويدىم. ەندى الداعى ۋاقىتتا بەلبەۋ كۇرەسىنەن تاعى دا سىنعا تۇسەتىن بولامىن.

- قىتايدا وسى 5- دۇنيەجۇزىلىك كوشپەندىلەر ويىنىنا ىرىكتەۋ قالاي ءوتتى؟ قانداي جەتىستىگىڭىزدىڭ ارقاسىندا قۇراماعا ەندىڭىز؟

- قىتايدا وسى كوشپەندىلەر ويىنىنا ارنالعان ارنايى ىرىكتەۋ جارىستار وتكەن بولاتىن. سول سىنداردان ءوز سالماعىمدا سۇرىنبەي ءوتتىم. ءبىر ەمەس، بىرنەشە جارىسقا قاتىسىپ، بارلىعىندا جاقسى كورسەتكىشتەرگە قول جەتكىزدىم. ناتيجەسىندە 5- دۇنيەجۇزىلىك كوشپەندىلەر ويىنىنا قاتىسۋعا مۇمكىندىك تۋدى.

- ول جاقتا قانداي جەتىستىگىڭىز بار؟

- ول جاقتا قىتاي كۇرەسى دەگەن كۇرەس بار. سول كۇرەس ءتۇرى بويىنشا ءوز سالماعىمدا چەمپيونمىن. قازاق كۇرەسىمەن دە ءجيى اينالىسامىن.

- قىتاي كۇرەسى مەن قازاق كۇرەسىنىڭ قانداي ايىرماشىلىعى بار؟

- ءادىس جاساۋ جاعى مەن ۇپاي بەرۋ جاعىندا ايىرماشىلىقتار كورىنەدى.

- سۇحباتىڭىزعا راقمەت!

اۆتور

كۇنسۇلتان وتارباي