قازاق انيماتسياسىن دامىتۋدىڭ بەس جىلدىق جوسپارى ازىرلەنىپ جاتىر
استانا. KAZINFORM - ەلىمىزدە جىل سايىن 5-7 انيماتسيالىق فيلم ءتۇسىرىپ، پروكاتقا شىعارۋ جوسپارلانىپ وتىر. بۇل تۋرالى مادەنيەت جانە اقپارات ءمينيسترى ايدا بالايەۆا ءمالىم ەتتى.
- ماڭىزدى مىندەتتەردىڭ ءبىرى - بالالارعا ارنالعان ساپالى انيماتسيالىق كونتەنت ازىرلەۋ. وسى ورايدا «قازاق فيلم» كينوستۋدياسى قازاق انيماتسياسىن دامىتۋ بويىنشا 5 جىلدىق جوسپار ازىرلەپ جاتىر، - دەدى ايدا بالايەۆا ەلوردادا وتكەن ارداگەرلەر كەڭەسىنىڭ پلەنۋمىندا.
ءمينيستردىڭ پايىمداۋىنشا، جىلىنا 5-7 انيماتسيالىق فيلم شىعارۋ جوسپاردا بار.
- سونىمەن قاتار پرەزيدەنتتىڭ ۇلتتىق قۇرىلتايدىڭ ەكىنشى وتىرىسىندا بەرگەن تاپسىرماسى اياسىندا «ە-كينو» ءبىرىڭعاي مونيتورينگ جۇيەسى ازىرلەندى. بۇل جۇيە كينو سالاسىنداعى اشىقتىقتى ارتتىرۋعا، ەل بويىنشا كاسسالىق تۇسىمدەردىڭ ءادىل ءبولىنۋىن قامتاماسىز ەتۋگە باعىتتالعان، - دەيدى ۆەدومستۆو باسشىسى.
بۇگىن ەلوردادا رەسپۋبليكالىق ارداگەرلەر ۇيىمى كەڭەسىنىڭ كەزەكتى پلەنۋمى ءوتتى. وعان ەلىمىزدىڭ بارلىق وڭىرىنەن ارداگەرلەر كەڭەسىنىڭ ءتوراعالارى قاتىستى.
بۇعان دەيىن ايدا بالايەۆا ەل كينوتەاترلارىندا كورسەتىلەتىن فيلمدەردىڭ مازمۇنىنا باقىلاۋ كۇشەيەتىنىن ءمالىم ەتتى. وسى ورايدا كينو تۋرالى زاڭعا ءبىرقاتار وزگەرىس ەنگىزىلمەك.
ەسكە سالا كەتسەك، بىلتىر ءماجىلىس دەپۋتاتى دانابەك يسابەكوۆ وتاندىق انيماتسيانىڭ قازىرگى جاي-كۇيى تۋرالى دەپۋتاتتىق ساۋال جولداپ، بالالار جات يدەولوگيا قۇربانىنا اينالعانىن ايتقان ەدى.
