QAZAQ AIR اۆياكومپانياسى رەسەيگە رەيستەرىن توقتاتتى

نۇر-سۇلتان. قازاقپارات - QAZAQ AIR اۆياكومپانياسى رەسەيگە بارلىق رەيستەرىن توقتاتتى، دەپ حابارلايدى قازاقپارات.

كومپانيانىڭ باسپا ءسوز قىزمەتىنەن ءمالىم ەتكەندەي، «QAZAQ AIR اۆياكومپانياسى ساقتاندىرۋ ۇيىمىنان رەسەي تەرريتورياسىندا جانە ونىڭ اۋە كەڭىستىگىندە ساقتاندىرۋ وتەلىمى جۇرگىزىلمەيتىنى تۋرالى حابارلاما الدى.

اتالعان جاعدايعا بايلانىستى اۆياكومپانيا رەسەي تەرريتورياسى اۋەسىندە ساقتاندىرۋ وتەلىمى تۋرالى ماسەلە شەشىمىن تاپپايىنشا رەسەيگە اۆيارەيستەردى ورىنداۋعا قاۋقارسىز. وسى سەبەپتى نوۆوسيبيرسكىگە بۇگىنگى (12- ناۋرىز) رەيس ورىندالمايدى»، - دەدى مەكەمەدەن.

جولاۋشىلارعا بيلەت قۇنى تولىق قايتارىلۋدا. بيلەتتەردى قايتارۋ ساتىپ العان جەرلەرى بويىنشا جۇزەگە اسىرىلىپ جاتىر. ەگەر ۇشۋ قۇجاتى اۆياكومپانيادا ساتىپ الىنعان بولسا، [email protected] ەلەكتروندى پوشتاسىنا حابارلاسۋ قاجەتتىگى ايتىلدى.

«الداعى كۇندەرى كەستەدە بولۋى مۇمكىن وزگەرىستەر تۋرالى جولاۋشىلاردى حاباردار ەتىپ وتىرامىز. QAZAQ AIR اۆياكومپانياسى ۇشۋلار قاۋىپسىزدىگى بويىنشا قازاقستاندىق جانە حالىقارالىق ستاندارتتاردىڭ بارلىق تالابىن ورىنداپ وتىر»، - دەدى كومپانيانىڭ باسپا ءسوز قىزمەتىنەن.

ەسكە سالايىق، 11- ناۋرىز كۇنى Air Astana كومپانياسى رەسەيگە ۇشاتىن بارلىق رەيستى توقتاتتى.