قاۋىپتى تاكسي جۇرگىزۋشىلەرىن انىقتاپ، جازالاۋ قيىن - مينيستر

استانا. KAZINFORM - ۇكىمەت وتىرىسىندا ىشكى ىستەر ءمينيسترى ەرجان سادەنوۆ ينتەرنەت ارقىلى تاكسي قىزمەتىن كورسەتۋشىلەردىڭ جۇمىسىن زاڭمەن رەتتەۋ قاجەتتىگىن ايتتى.

«جولاۋشىلاردى تاسىمالداۋ سالاسى دا قاۋىپتى دەڭگەيدە. بار نورمالار ساقتالمايدى. ينتەرنەت-تاكسي جۇرگىزۋشىلەرى پايدا تابۋ ءۇشىن ۇيقىسىز جانە دەمالىسسىز كولىك جۇرگىزەدى. مەديتسينالىق تەكسەرۋدەن وتپەيدى، كولىكتىڭ تەحنيكالىق جاعدايى تەكسەرىلمەيدى. وسىلايشا، ادامداردىڭ ومىرىنە قاۋىپ توندىرەدى. دەمالىس، مەرەكە كۇندەرى پويىزعا بيلەتتەردىڭ جوقتىعىنان، تاكسي جوعارى سۇرانىسقا يە بولادى. «قاۋىپتى» تاكسي جۇرگىزۋشىلەرىن انىقتاۋ جانە جاۋاپقا تارتۋ قيىن»، - دەدى ە. سادەنوۆ.

وسىعان بايلانىستى كەلەسى جىلدان باستاپ تاكسي قىزمەتىمەن اينالىساتىن ينتەرنەت- اگرەگاتورلارعا قويىلاتىن تالاپتار كۇشەيتىلمەك.

«ينتەرنەت- اگرەگاتورلاردىڭ ءرولى تەك تاپسىرىس بولۋمەن شەكتەلەدى. سوندىقتان كەلەسى جىلدان باستاپ ولارعا تاسىمالداۋ تالاپتارىن باقىلاۋ جۇكتەلەدى. بۇعان، سيفرلىق دامۋ مينيسترلىگى، ەڭبەك مينيسترلىگى، كولىك مينيسترلىگى جانە اكىمدىكتەر قاتىسۋى قاجەت»، - دەدى ەرجان سادەنوۆ.

سونداي-اق، ول ءوڭىر اكىمدەرىن قالالار اراسىندا قاتىنايتىن قوعامدىق كولىك سانىن كوبەيتىپ، باعاسىن سۋبسيديا ارقىلى ارزانداتۋعا شاقىردى.

«كولىك مينيسترلىگى مەن اكىمدىكتەرگە كەلەسىدەي جۇمىستاردى ۇيىمداستىرعانى دۇرىس. بىرىنشىدەن، قالا ارالىق جولاۋشىلار كولىگىن دامىتۋ كەرەك. ەكىنشىدەن، دەمالىس، مەرەكە كۇندەرىن ەسكەرىپ، سۇرانىسقا يە باعىتتار بويىنشا رەيس سانىن كوبەيتۋ قاجەت. ۇشىنشىدەن، سۋبسيديا ارقىلى جولاقىنى ارزانداتۋ كەرەك. تورتىنشىدەن، ەڭبەك جانە دەمالىس رەجيمىن باقىلاۋ قۇرالدارىن ورناتۋ ۇسىنىلادى»، - دەدى مينيستر.

اۆتور

ەسىمجان ناقتىباي