قاتتى جەلدەن ەلورداعا قانداي زالال كەلىپ جاتىر

استانا. KAZINFORM - استانا قالاسىنىڭ توتەنشە جاعدايلار دەپارتامەنتى اۋا رايىنا بايلانىستى (جەلدىڭ ەكپىنى 26 م/س دەيىن) تابيعي سيپاتتاعى ءبىر توتەنشە جاعداي تىركەلگەنىن حابارلايدى.

قاتتى جەلدەن ەلوردانىڭ بىرنەشە اۋدانى جارىقسىز قالدى.

«ت ج د جوسپارلاۋ جانە جەدەل باسقارۋ ورتالىعىنا بولعان وقيعالار بويىنشا 19 حابارلاما كەلىپ ءتۇستى. ونىڭ ىشىندە: مۇنارا كرانىنىڭ قۇلاۋى-1، شاتىر كونسترۋكسيالارىنىڭ قيراۋى – 8، اكىمشىلىك عيماراتتاردىڭ شاتىرىنىڭ قيراۋى – 2، بالكون كونسترۋكسياسىنىڭ بۇزىلۋى-1، عيماراتتار مەن اعاشتاردىڭ قاپتاماسىنىڭ فراگمەنتتەرىمەن اۆتوموبيلدەردىڭ زاقىمدانۋى – 6، باسقا دا زاقىمدار - 1»، - دەلىنگەن حابارلامادا.

اقپاراتتا ايتىلعانداي، توتەنشە جاعداي ينسپەكتورلارى قاتتى جەلدەن قيراعان ورىندارعا بارىپ، بەلگىلەپ جاتىر.

«6-7 -قاراشادا استانا قالاسىندا قاتتى جەل، كوكتايعاق، بوران كۇتىلەتىنى تۋرالى داۋىلدى ەسكەرتۋ جاريالاندى. وڭتۇستىك- باتىس جەل 15-20 م/س، ەكپىنى 23-28، كەيدە 30 م/س جانە ودان دا قاتتى بولۋى ىقتيمال. 6-قاراشادا ساعات 21-00-دەن باستاپ اۋا رايىنىڭ قولايسىزدىعىنا بايلانىستى (قاتتى قار، بوران، كورىنۋدىڭ شەكتەلۋىنەن) «استانا - پەتروپاۆل»، ساعات 23-00 «ەكاتەرينبۋرگ- الماتى» جانە 7-قاراشادا 01-03 «استانا - پاۆلودار وبلىسىنىڭ شەكاراسى رەسپۋبليكالىق ماڭىزى بار اۆتوجولدار بارلىق قوزعالىس جابىلدى»، - دەگەن مالىمەت الدىق ت ج د- دان.

بۇگىن تاڭعى ساعات 8-30-دان باستاپ اۋا رايى تۇراقتالىپ، استانا قالاسىنان رەسپۋبليكالىق ماڭىزى بار بارلىق اۆتوجول بويىنشا قوزعالىس قايتا اشىلدى.

وسىعان وراي استانا قالاسى ت ج د بۇرشاق پەن قاتتى جەل كەزىندە جاراقات پەن جاراقات الماۋ ءۇشىن قاتتى جەل كەزىندە ازاماتتار قاۋىپسىزدىك شارالارىن ساقتاۋدى ۇسىنادى:

- عيماراتتاردان شىعۋعا اسىقپاڭىز (مۇمكىندىگىنشە ءۇي-جايلاردا بولىڭىز)؛

- بالالاردى ەرەكشە باقىلاۋعا الىڭىز جانە ولاردى قاراۋسىز قالدىرماۋ ماڭىزدى؛

- ەگەر قاتتى جەل كەزىندە سىرتتا بولساڭىز، جاقىن ماڭداعى كىرەبەرىستە نەمەسە دۇكەندە پانالاڭىز؛

- ۇيلەردىڭ قابىرعالارىنا جاقىن جەردە قاتتى جەلدەن جاسىرىنباڭىز، ويتكەنى شاتىرلاردان شاتىر ماتەريالدارى قۇلاپ كەتۋى مۇمكىن؛

- قوعامدىق كولىكتىڭ اشىق ايالدامالارىندا، بيلبوردتاردىڭ استىندا، اعاشتاردا، اياقتالماعان عيماراتتاردا جاسىرۋعا بولمايدى؛

- قاتتى جەل كەزىندە ەلەكتر جەلىسىنىڭ استىندا تۇرىپ، ۇزىلگەن ەلەكتر سىمدارىنا جاقىنداۋ وتە قاۋىپتى؛

- جەكە اۆتوكولىكتى اعاشتاردان قاۋىپسىز قاشىقتىقتا قويۋ ۇسىنىلادى.

توتەنشە جاعدايلار كەزىندە «101» جانە «112» نومىرىنە حابارلاسۋ كەرەك.

ايتا كەتسەك، كەشەدەن بەرى ەلوردادا قاتتى جەل سوعىپ، قولايسىز اۋا رايى قالا تۇرعىندارىن ابىگەرگە سالىپ جاتىر.

اۆتور

داۋلەت ىزتىلەۋ