قاتەرلى ىسىكتىڭ سەبەبىن انىقتاۋ مۇمكىن ەمەس - ونكولوگ
استانا. KAZINFORM - دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سايكەس، 2022 -جىلى الەمدە 20 ميلليون ادامنان قاتەرلى ىسىك انىقتالعان.
2050 -جىلعا قاراي بۇل كورسەتكىش %77- عا ءوسىپ، 35 ميلليونعا جەتەدى دەپ بولجانىپ وتىر. سەبەبى الەم حالقىنىڭ سانى ارتىپ، قارتايىپ كەلەدى، ال ونكولوگيالىق اۋرۋلار بۇكىل ادامزات ءۇشىن سوزىلمالى دەرتكە اينالۋدا. قازاقستان دا بۇل ۇدەرىستەن تىس ەمەس.
ق ر پرەزيدەنتى ءىس باسقارماسىنا قاراستى مەديتسينالىق ورتالىق اۋرۋحاناسىنىڭ باس ونكولوگى نازار سەيداليننىڭ ايتۋىنشا، ادامزات ءالى كۇنگە دەيىن وبىردىڭ ناقتى قانداي سەبەپتەن پايدا بولاتىنىن بىلە الماي وتىر، تەك اسەر ەتۋشى فاكتورلار بەلگىلى.
- قاتەرلى ىسىكتىڭ پايدا بولۋىنا اسەر ەتەتىن فاكتورلاردى ەكىگە بولۋگە بولادى. ءبىرىنشىسى، باسقارىلمايتىن فاكتورلار: گەنەتيكا، ەكولوگيا. بۇل فاكتورلاردى ءبىز وزگەرتە المايمىز. ەكىنشىسى، باسقارىلاتىن فاكتورلار: ءومىر سالتىمەن بايلانىستى ادەتتەر. ەڭ باستى قاۋىپتى ادەتتەر: تەمەكى شەگۋ، الكوگول تۇتىنۋ، سەمىزدىك، فيزيكالىق بەلسەندىلىكتىڭ تومەندىگى. ادامنىڭ پسيحولوگيالىق جاعدايى دا ۇلكەن ءرول اتقارادى. ويتكەنى پسيحولوگيالىق تۇراقسىزدىق، سترەسس، مازاسىزدىق سياقتى فاكتورلار ادامنىڭ ءومىر سالتىنا تىكەلەي اسەر ەتەدى، - دەدى دارىگەر.
ونكولوگيالىق اۋرۋلاردىڭ ناقتى سەبەبى تولىق زەرتتەلمەگەنىمەن، نەگىزگى مەحانيزم بەلگىلى: اعزاداعى جاسۋشالار مۋتاتسياعا ۇشىراپ، باقىلاۋسىز كوبەيە باستايدى. يممۋندىق جۇيە ۇنەمى باقىلاپ، قاتەرلى جاسۋشالاردى جويۋعا تىرىسادى. الايدا ادامنىڭ ءومىر سالتى دۇرىس بولماسا، يممۋنيتەت السىرەيدى جانە قاتەرلى ىسىك جاسۋشالارى كوبەيە بەرەدى.
بۇعان دەيىن قازاقستاندا قاتەرلى ىسىكتىڭ نە سەبەپتى كوبەيىپ جاتقانى تۋرالى تالداۋ جازعان ەدىك.
