قاڭتار وقيعاسى - پرەزيدەنت قاسىم-جومارت توقايەۆقا قارسى قاستاندىق - ءماجىلىس دەپۋتاتى
ەكى جىل بۇرىنعى قاڭتار وقيعاسى - پرەزيدەنت قاسىم-جومارت توقايەۆقا قارسى قاستاندىق، مەملەكەتتىك توڭكەرىس ارەكەتى. بۇل پىكىردى ءماجىلىس دەپۋتاتى ەرلان سايروۆ ايتتى، دەپ حابارلايدى Kazinform.
«بيىل قاڭتار وقيعالارىنا ەكى جىل تولدى، بۇل قازاقستاننىڭ ساياسي تاريحىنداعى ۇلكەن تراگەديالى كەزەڭ سانالادى. قاڭتار وقيعالارى – ق ر پرەزيدەنتى قاسىم-جومارت توقايەۆقا قارسى قاستاندىق، مەملەكەتتىك توڭكەرىس ارەكەتى. ويتكەنى قاسىم-جومارت توقايەۆ بيلىك باسىنا كەلگەننەن كەيىن دەموكراتياعا بەت الدى، سول كەزدەگى ريەۆانشيستىك توپتار ءوزىنىڭ كوررۋپتسيالىق قارجىسىن، وعان قوسا بيلىكتى قولىنان جىبەرگىسى كەلمەدى. سوندىقتان ولار ەكى جىل بويى ءارتۇرلى قاسكۇنەمدىك جاساپ كەلدى. مۇنىڭ سوڭى قاڭتار وقيعاسىنا ۇلاستى»، - دەدى ساراپشى Kazinform تىلشىسىنە بەرگەن سۇحباتىندا.
ە. سايروۆ پرەزيدەنتتىڭ كەشە Egemen Qazaqstan گازەتىنە بەرگەن سۇحباتىندا قاڭتارعا قاتىستى بارلىق سۇراققا تولىققاندى جاۋاپ بەرگەنىن اتاپ ءوتتى.
«ساياسي تاريحقا قاراساق، قانداي دا ءبىر مەملەكەتتە ەسكىنى اڭسايتىن ازاماتتار ولار بيلىكتى ۇستاپ قالۋ ءۇشىن قولدان كەلگەننىڭ بارلىعىن ىستەيدى. سوندىقتان قاڭتارعا قاتىستى شىندىق ءبىر-اق نارسە - 30 جىل ىشىندە قوردالانىپ قالعان الەۋمەتتىك-ەكونوميكالىق پروبلەمالار، حالىقتىڭ كەدەيلەنىپ كەتۋى جانە حالىقتىڭ وسى الەۋمەتتىك ادىلەتسىزدىكتى كورۋى. ياعني رەسۋرستاردىڭ بارلىعى جەكەلەنگەن توپتىڭ، ونىڭ ىشىندە تۇڭعىش پرەزيدەنت نۇرسۇلتان نازاربايەۆتىڭ تۋىستارىنىڭ، ونىڭ اينالاسىنداعى ادامداردىڭ قولىنا شوعىرلاندى. وسىنىڭ بارلىعىن كورگەن حالىق كوشەگە شىقتى. مىنە، وسىنى قاسكۇنەم توپتار ءوز مۇددەسىنە پايدالانۋعا تىرىستى. سوندىقتان قاڭتار وقيعالارىنىڭ نەگىزگى سەبەپتەرى - 30 جىلداعى حالىققا قارسى ساياسات. ەكىنشىدەن - قاستاندىق ويلاۋشىلاردىڭ پرەزيدەنت توقايەۆقا قارسى ناقتى ءىس-قادامدارى»، - دەدى ول.
دەپۋتات ايتقانداي، قاڭتار وقيعالارىنان الاتىن ەڭ نەگىزگى ساباق - مەملەكەتتىڭ ساياساتى حالىقتىڭ مۇددەسىنە جۇمىس ىستەۋى كەرەك.
«مەملەكەتتىڭ بۇكىل ەكونوميكالىق رەسۋرستارىنىڭ بارلىعى حالىقتىڭ باسىم كوپشىلىگىنە قىزمەت ەتۋى كەرەك. قازاقستانداعى ازاماتتاردىڭ بارلىعىنا ەڭبەك ەتۋىنە، كاسىپكەرلىكپەن اينالىسۋعا، ءوزىنىڭ شىعارماشىلىق پوتەنتسيالىن كورسەتۋگە جان-جاقتى مۇمكىندىك اشىلۋى كەرەك. ەگەر وسىنداي ۇيلەسىمدى مەملەكەت بولسا، مۇنداي وقيعالار ەشقاشان قايتالانبايدى»، - دەيدى ەرلان سايروۆ.
ەسكە سالا كەتسەك، 2022-جىلدىڭ 2- قاڭتارىندا جاڭاوزەندىكتەردىڭ سۇيىتىلعان گاز باعاسىنىڭ كوتەرىلۋىنە بايلانىستى باستالعان بەيبىت ميتينگ از ۋاقىتتىڭ ىشىندە ەلىمىزدىڭ بۇكىل ايماعىنا تاراپ، ونىڭ سوڭى مەملەكەتتىك توڭكەرىسكە اينالا جازدادى.
بۇعان دەيىن Kazinform اگەنتتىگى قاڭتار قاسىرەتىنە قاتىستى دەرەكتەر مەن اتىشۋلى ىستەرگە شولۋ جاساعان ەدى.
