قاسىم-جومارت توقايەۆ و ا پرەزيدەنتتەرىنىڭ گەرمانيا ەكونوميكاسى شىعىس كوميتەتىنىڭ مۇشەلەرىمەن كەزدەسۋىنە قاتىستى

پرەزيدەنت ورتالىق ازيا مەملەكەتتەرى باسشىلارىنىڭ گەرمانيا ەكونوميكاسى شىعىس كوميتەتىنىڭ مۇشەلەرىمەن كەزدەسۋىنە قاتىستى، دەپ حابارلايدى اقوردانىڭ باسپا ءسوز قىزمەتى.

Фото: Ақорда
Фото: из открытых источников

قاسىم-جومارت توقايەۆ ورتالىق ازيا ەلدەرى مەن گەرمانيانىڭ ەكونوميكالىق ىنتىماقتاستىعىنىڭ نەگىزگى ماسەلەلەرىنە توقتالدى.

- ءبىزدىڭ ايماق - ەۋرازيا كەڭىستىگىن بايلانىستىرۋشى بىرەگەي ستراتەگيالىق ورتالىق. نەگىزگى ساۋدا-ەكونوميكالىق دالىزدەر ەلدەرىمىزدىڭ اۋماعى ارقىلى وتەدى. قازاقستاندا مول پايدالى قازبالار قورى بار. مۇنىڭ ءبارى گەرمانيامەن جانە جالپى ەۋروپا وداعىمەن ساۋدا-ينۆەستيتسيا سالاسىنداعى ىنتىماقتاستىقتى نىعايتۋعا كەڭ جول اشادى، - دەدى قاسىم-جومارت توقايەۆ.

مەملەكەت باسشىسى گەرمانيامەن اراداعى ايماقتىق ساۋدا-ەكونوميكالىق بايلانىستاردا قازاقستاننىڭ ماڭىزدى ءرول اتقاراتىنىن اتاپ ءوتىپ، ءوزارا قارىم-قاتىناستى نىعايتۋ جانە ونى جاڭا دەڭگەيگە شىعارۋ جونىندە ءبىرقاتار ۇسىنىس ايتتى.

- ءبىز ماڭىزدى شيكىزات تاۋارلارى سالاسىنداعى ىنتىماقتاستىقتى كەڭەيتۋگە مۇددەلىمىز. بۇگىندە سيرەك كەزدەسەتىن مەتالدارعا الەمدىك سۇرانىس ۇسىنىستان ەداۋىر كوپ. مەملەكەتتەردىڭ بولاشاقتاعى تەحنولوگيالىق دامۋى وسى ءۇردىستى كۇشەيتە تۇسەدى. قازاقستان ورتالىق ازيانىڭ باسقا مەملەكەتتەرى سياقتى، ەۋروپا وداعىنا قاجەتتى اسا ماڭىزدى مەتالدار مەن مينەرالداردىڭ وراسان زور قورىنا يە. ولاردى بىرلەسىپ وندىرۋدە عانا ەمەس، قايتا وڭدەۋ ىسىندە دە بۇل باعىتتىڭ پەرسپەكتيۆاسى زور، - دەدى قاسىم-جومارت توقايەۆ.

مەملەكەت باسشىسى كەزدەسۋ قاتىسۋشىلارىنا جۋىردا گەرمانيالىق HMS Bergbau كومپانياسىنىڭ باسشىلىعىمەن گەولوگيالىق بارلاۋ جۇمىستارىن جۇرگىزۋ جانە الداعى ۋاقىتتا ليتيي وڭدەۋ كەشەنىن سالۋ تۋرالى ۋاعدالاستىققا قول جەتكىزىلگەنى جونىندە مالىمەت بەردى. ينۆەستيتسيا كولەمى - 500 ميلليون دوللار

- ونەركاسىپ سالاسىنداعى ىنتىماقتاستىعىمىز دا مۇلدە جاڭا دەڭگەيگە كوتەرىلىپ كەلەدى. Linde كومپانياسىنىڭ كارباميد وندىرىسىنە ارنالعان گازدى تولىق وڭدەۋ جوباسىن جۇزەگە اسىرۋ بۇل ىسكە تىڭ سەرپىن بەرەدى. ينۆەستيتسيانىڭ جالپى كولەمى 1,4 ميلليارد تەڭگەگە باعالانىپ وتىر، - دەدى پرەزيدەنت.

مەملەكەت باسشىسىنىڭ پىكىرىنشە، كومىرسۋتەگى شيكىزاتىن جەتكىزۋ، جاھاندىق ازىق-تۇلىك قاۋىپسىزدىگىن كۇشەيتۋ، كولىك- ترانزيت جانە قارجى سالالارىنداعى كووپەراتسيا ءوزارا قارىم-قاتىناستىڭ باسقا دا باسىم باعىتتارىنىڭ قاتارىنا كىرەدى.

پرەزيدەنت كەزدەسۋگە قاتىسۋشىلاردىڭ نازارىن ورنىقتى دامۋ جانە جاسىل ەكونوميكا سالالارىندا بىرلەسە جۇمىس ىستەۋدىڭ ماڭىزدىلىعىنا اۋداردى.

- قازاقستان ايماقتىق كليمات ماسەلەسىن ىلگەرىلەتۋگە جان-جاقتى اتسالىسۋعا دايىن. ءبىز نەمىس سەرىكتەستەرىمىزدى 2026-جىلى ب ۇ ۇ اياسىندا قازاقستاندا وتەتىن ايماقتىق كليماتتىق سامميتكە قاتىسۋعا شاقىرامىز. ءبىز 2060-جىلعا قاراي كومىرتەگى بەيتاراپتىعىنا قول جەتكىزۋ جونىندە مىندەتتەمە الدىق. الايدا ول ءۇشىن بىزگە ەكونوميكانى ايتارلىقتاي جاڭعىرتىپ، «جاسىل» تەحنولوگياعا 600 ميلليارد دوللاردان استام ينۆەستيتسيا تارتۋ قاجەت، - دەدى قاسىم-جومارت توقايەۆ.

پرەزيدەنت ءسوزىنىڭ سوڭىندا اتالعان كەزدەسۋدىڭ قورىتىندىسى ورتالىق ازيا ەلدەرى مەن گەرمانيا اراسىنداعى ەكونوميكالىق ىنتىماقتاستىقتىڭ كوكجيەگىن كەڭەيتەتىنە سەنىم ءبىلدىردى.

جيىندا ايماق مەملەكەتتەرى باسشىلارىمەن قاتار، گەرمانيا ەكونوميكاسى شىعىس كوميتەتىنىڭ باسقارما ءتوراعاسى كاترينا كلااس- ميۋلحويزەر، سونداي-اق Linde، Knauf، Aurubis، German Seed Alliance GmbH، Ernst Klett AG جانە باسقا دا نەمىس كومپانيالارىنىڭ توپ-مەنەدجەرلەرى بايانداما جاسادى.

سوڭعى جاڭالىقتار