قاسىم-جومارت توقايەۆ سلوۆاكيا پرەمەر- ءمينيسترىن اقوردادا قارسى الدى
استانا. KAZINFORM - مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن سلوۆاكيا پرەمەر- ءمينيسترى روبەرت فيتسونى قارسى الدى.
الدىمەن قاسىم-جومارت توقايەۆ پەن روبەرت فيتسو ءبىر- بىرىنە رەسمي دەلەگاتسيا مۇشەلەرىن تانىستىردى. وسىدان كەيىن مارتەبەلى مەيماننىڭ ساپارىنا وراي سالتاناتتى راسىمدەر زالىندا ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءان ۇرانىن ورىندادى.
ءان ۇرانداردى تىڭداپ بولعاننان كەيىن قاسىم-جومارت توقايەۆ پەن روبەرت فيتسو كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. قۇرمەتتى قاراۋىل باستىعىمەن قوشتاستى.
قازىرگى ۋاقىتتا جوعارى دەڭگەيدەگى كەلىسسوزدەر ءوتىپ جاتىر. كەلىسسوزدەر بارىسىندا قازاقستان پرەزيدەنتى مەن سلوۆاكيا ۇكىمەتىنىڭ باسشىسى قازاق-سلوۆاك سەرىكتەستىگىن كەڭەيتۋ پەرسپەكتيۆاسىن تالقىلاماق.
بۇعان دەيىن Kazinform اگەنتتىگىنىڭ اناليتيكالىق شولۋشىسى قازاقستان مەن سلوۆاكيا بايلانىسىنىڭ كوركەيۋىن جان-جاقتى سارالاپ كورگەن ەدى.
