قاسىم-جومارت توقايەۆ: جاناشىرلىق، قامقورلىق، باۋىرمالدىق - ءبىزدىڭ ۇلتتىق قاسيەتىمىز

Фото: әкімдік
Фото: әкімдік

استانا. KAZINFORM - مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ ءۇشىنشى وتىرىسىنداعى سوزىندە ەل ىرگەسى بىرلىك جانە ىنتىماعىمەن بەرىك ەكەنىن اتاپ ءوتتى، دەپ حابارلايدى اقوردانىڭ باسپا ءسوز قىزمەتى.

«تاعى ءبىر ىرگەلى قۇندىلىق - بىرلىك جانە ىنتىماق. ءبىزدىڭ كۇشىمىز - بىرلىكتە. جۇرتىمىز باسىنا تۇسكەن تاۋقىمەتتىڭ ءبارىن مىزعىماس بىرلىكتىڭ ارقاسىندا جەڭىپ كەلەدى. وراسان زور سىن-قاتەرلەر پايدا بولعان قازىرگى زاماندا ىنتىماق-بىرلىكتىڭ ماڭىزى ارتا ءتۇستى.

قازاقستان - ءبارىمىزدىڭ قاسيەتتى قارا شاڭىراعىمىز. سوندىقتان ءاربىر ازامات ەل تاعدىرىنا ءوز تاعدىرىنداي قاراۋعا ءتيىس. ءبىزدىڭ كۇشىمىز - ىنتىماقتا. ەلىمىزدىڭ الەۋمەتتىك ساياساتى وسى قۇندىلىققا نەگىزدەلگەن. مەملەكەت تە، قوعام دا كومەككە شىن مۇقتاج ادامداردى قولداۋعا قاشاندا دايىن.

ءبىزدىڭ ەرىكتىلەرىمىزدىڭ ەرەن ەڭبەگى - جاناشىر بولۋدىڭ شىنايى ۇلگىسى. ولار كەز كەلگەن ساتتە وزگەلەرگە رياسىز كوڭىلمەن كومەكتەسۋگە ۇمتىلادى. بيزنەس وكىلدەرى جانە باسقا دا ازاماتتارىمىز ءتۇرلى قايىرىمدىلىق شارالارعا بەلسەنە اتسالىسادى. بۇل دا - تىلەۋلەس بولۋدىڭ ايقىن كورىنىسى.

حالقىمىزدىڭ قانىنا سىڭگەن جاناشىرلىق، قامقورلىق، باۋىرمالدىق سياقتى اسىل قاسيەتتەر ءبىزدىڭ ۇلتتىق ەرەكشەلىگىمىز بولىپ قالا بەرەدى»، - دەدى ق ر پرەزيدەنتى.

سوڭعى جاڭالىقتار