قاسىم-جومارت توقايەۆ فرانسيانىڭ سىرتقى ساۋدا دەلەگات-ءمينيسترى لوران سەن-مارتەندى قابىلدادى
استانا. KAZINFORM - مەملەكەت باسشىسى استانا حالىقارالىق فورۋمىنىڭ اياسىندا فرانسيا سىرتقى ساۋدا دەلەگات-ءمينيسترى لوران سەن-مارتەنمەن، فرانسيا ۇلتتىق اسسامبلەياسى شەتەلدىك ىستەر جونىندەگى كوميسسياسىنىڭ پرەزيدەنتى برۋنو فۋكسپەن، سونداي-اق EDF SUEZ جانە Sanofi كومپانيالارىنىڭ جەتەكشىلەرىمەن كەزدەستى. بۇل تۋرالى اقوردا حابارلادى.
پرەزيدەنت فرانسيا قازاقستاننىڭ ەۋروپا وداعى ەلدەرى اراسىنداعى نەگىزگى ساۋدا جانە ينۆەستيتسيالىق سەرىكتەسى ەكەنىن اتاپ ءوتتى. سوڭعى جىلدارى ەكىجاقتى ساۋدا كولەمى جانە ەلىمىزگە كەلەتىن فرانتسۋز ينۆەستيتسياسى ۇدايى ارتىپ كەلەدى. بۇل ەكونوميكالىق بايلانىستاردى نىعايتۋعا تاراپتاردىڭ ورتاق ۇمتىلىسىن بايقاتادى. مەملەكەت باسشىسى وسىنداي وڭ ديناميكانى ساقتاۋ قاجەت ەكەنىن ايتتى.
قاسىم-جومارت توقايەۆ 17 كەلىسىمگە قول قويىلعان قازاق-فرانسۋز بيزنەس-فورۋمىنىڭ ناتيجەسىن جوعارى باعالاپ، ۋاعدالاستىقتاردى ۋاقتىلى ورىنداۋدىڭ ماڭىزىنا نازار اۋداردى.
اڭگىمەلەسۋ بارىسىندا ەنەرگەتيكا، اتوم ونەركاسىبى، دەنساۋلىق ساقتاۋ، فارماتسيەۆتيكا، سۋ رەسۋرستارىن باسقارۋ جانە باسقا دا سالالاردا ءوزارا ىقپالداستىقتى دامىتۋ ماسەلەلەرى تالقىلاندى. مەملەكەت باسشىسى ورايلى ءساتتى پايدالانا وتىرىپ، فرانسيا پرەزيدەنتى ەممانيۋەل ماكرونعا ىستىق ىقىلاسىن جولدادى.
لوران سەن-مارتەن استاناعا 40 تان استام فرانسۋز كومپانياسىنىڭ جەتەكشىلەرى كەلگەنىن، ءارتۇرلى سالانى قامتيتىن ۇجىمدار ەلىمىزبەن ىسكەرلىك بايلانىستاردى ىلگەرىلەتۋگە نيەتتى ەكەنىن جەتكىزدى.
وتكەن جىلدىڭ قورىتىندىسى بويىنشا قازاقستان مەن فرانسيا اراسىنداعى ساۋدا اينالىمىنىڭ كولەمى 5,5 ميلليارد دوللارعا جەتتى. بۇل تاۋار اينالىمىنىڭ 31 پايىزعا ۇلعايعانىن كورسەتەدى. 2005-جىلدان 2024-جىلعا دەيىن فرانسيانىڭ ەلىمىزگە قۇيعان تىكەلەي ينۆەستيتسيا كولەمى 20 ميلليارد دوللاردى قۇرادى.
