قاسىم-جومارت توقايەۆ گەوساياسي شيەلەنىستەرگە قاتىستى قازاقستاننىڭ ۇستانىمىن مالىمدەدى

قازاقستان پرەزيدەنتى جاھاندىق گەوساياسي احۋالدىڭ ۋشىعۋىنا، قاقتىعىستاردىڭ كوبەيۋىنە ءبارىنىڭ الاڭداپ وتىرعانىن ايتتى.

- الەمدەگى كوپتەگەن تۇيتكىلگە قاتىستى مەملەكەتتەرىمىزدىڭ ۇستانىمى ۇقساس. ەكى ەل دە كەز كەلگەن شيەلەنىس بەيبىت جانە ديپلوماتيالىق جولمەن شەشىلۋى كەرەك دەگەن قاعيداتتى قاتاڭ ۇستانادى، - دەدى قاسىم-جومارت توقايەۆ.

بۇگىن قازاقستان مەن كيپر پرەزيدەنتتەرى ب ۇ ۇ، ە ق ى ۇ جانە باسقا دا حالىقارالىق ۇيىمدار اياسىندا ءتيىمدى جۇمىس ىستەۋگە كەلىسكەن. بەيبىتشىلىك پەن تۇراقتىلىقتى قامتاماسىز ەتۋگە بەلسەنە اتسالىسۋعا ۋاعدالاسقان.

- قازاقستاننىڭ ۇستانىمى بويىنشا: بارلىق ەل ب ۇ ۇ جارعىسىن، حالىقارالىق قۇقىقتىڭ نەگىزگى قاعيداتتارىن قاتاڭ ساقتاۋعا مىندەتتى. قازاقستان باسقا ەلدەردىڭ اۋماقتىق تۇتاستىعىن قۇرمەتتەيدى جانە بۇكىل الەم مەملەكەتتەرىن وسى قاعيداتقا باسىمدىق بەرۋگە شاقىرادى، - دەدى قاسىم-جومارت توقايەۆ.

ايتا كەتەيىك، 2-4-ماۋسىم كۇندەرى مەملەكەت باسشىسى قاسىم-جومارت توقايەۆتىڭ شاقىرۋىمەن كيپر رەسپۋبليكاسىنىڭ پرەزيدەنتى نيكوس حريستودۋليديستىڭ قازاقستانعا رەسمي ساپارى وتەدى. تاۋەلسىزدىك سارايىندا قاسىم-جومارت توقايەۆ كيپر پرەزيدەنتىن سالتاناتپەن قارسى الدى.

بۇعان دەيىن قاسىم-جومارت توقايەۆ كيپر پرەزيدەنتىن 1-دارەجەلى دوستىق وردەنىمەن ماراپاتتادى.

سونداي-اق قاسىم-جومارت توقايەۆ كيپردەگى سەرىكتەستەرىن ترانسكاسپي جانە ورتا ءدالىز جوبالارىنا اتسالىسۋعا شاقىردى.