قاسىم-جومارت توقايەۆ رەسەي پرەزيدەنتىنە بالقاشتا ا ە س سالۋدا باتىل قولداۋ كورسەتكەنى ءۇشىن العىس ايتتى
استانا. KAZINFORM - مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتينگە بالقاشتا ا ە س سالۋ شەشىمىندە باتىل قولداۋ كورسەتكەنى ءۇشىن العىس ايتتى.
قازاقستان پرەزيدەنتىنىڭ ايتۋىنشا، ەنەرگەتيكا سالاسىن ىنتىماقتاستىقتاعى اسا تابىستى باعىتتاردىڭ ءبىرى رەتىندە اتاپ وتۋگە تولىق نەگىز بار.
- مەنىڭ ويىمشا، بۇگىن قول قويىلعان بالقاشتا اتوم ەلەكتر ستانتسياسىن سالۋ جونىندەگى كەلىسىمنىڭ ماڭىزى ايرىقشا زور. وسى اۋقىمدى جوبانى ىسكە قوسۋعا جەكە باتىل قولداۋ كورسەتكەنى ءۇشىن رەسەي فەدەراتسياسىنىڭ پرەزيدەنتىنە العىسىمدى بىلدىرەمىن. بۇل جوبا عىلىم، ءبىلىم بەرۋ جانە تەحنولوگيالىق ىنتىماقتاستىقتىڭ قوزعاۋشى كۇشىنە اينالادى. سونداي-اق ەنەرگەتيكا مەن جالپى يندۋسترياداعى جاڭا قوسالقى سالالاردىڭ دامۋىنا سەرپىن بەرەدى. ارينە، بۇل ەڭ الدىمەن قازاقستانعا قاتىستى، - دەدى قاسىم-جومارت توقايەۆ تاۋەلسىزدىك سارايىندا ر ف پرەزيدەنتىمەن كەلىسسوزدەردەن كەيىنگى ب ا ق وكىلدەرىنە ارنالعان بريفينگتە.
ايتا كەتەيىك، 27-29-مامىر كۇندەرى رەسەي فەدەراتسياسى پرەزيدەنتى ۆلاديمير پۋتيننىڭ قازاقستانعا مەملەكەتتىك ساپارى وتەدى. مەملەكەتتەر باسشىلارى بۇل ساپاردا قازاقستان مەن رەسەي اراسىنداعى جان-جاقتى ستراتەگيالىق سەرىكتەستىكتىڭ جانە وداقتاستىق قاتىناستاردىڭ قازىرگى جاي-كۇيىن، سونداي-اق ونى نىعايتۋ پەرسپەكتيۆاسىن تالقىلايدى.
بۇگىن مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتيندى تاۋەلسىزدىك سارايىندا رەسمي قارسى الدى.
