قاستاندىق، تەمىر كۇمبەز، حارريستىڭ ارەكەتسىزدىگى - دونالد ترامپتىڭ يلون ماسكپەن سۇحباتى

استانا. قازاقپارات - «Tesla Motors» باس اتقارۋشى ديرەكتورى يلون ماسك رەسپۋبليكالىق پارتيا اتىنان پرەزيدەنتتىككە كانديدات دونالد ترامپتان دۇيسەنبى كۇنى كەشكە «X» الەۋمەتتىك مەديا-پلاتفورماسىندا سۇحبات الدى.

بۇل تۋرالى اگەنتتىكتىڭ مەنشىكتى ءتىلشىسى حابارلايدى.

سۇحبات جەرگىلىكتى ۋاقىت بويىنشا ساعات 20:00-دە تىكەلەي ەفيردە باستالۋى كەرەك ەدى، ءبىراق تەحنيكالىق قيىندىقتار تۋىندادى.

يلون ماسكتىڭ پايىمداۋىنشا، كوپتەگەن تىڭداۋشىلارعا پلاتفورماعا كىرۋگە DDOS شابۋىلى سەبەپ بولۋى مۇمكىن. ازىرگە تەحنيكالىق اقاۋ قولدان جاسالعان با، الدە سۇحباتقا قاتىسقىسى كەلگەن تىڭدارمانداردىڭ كوپتىگىنەن بە، ول جاعى بەلگىسىز.

اڭگىمە دونالد ترامپقا قاستاندىق جاساۋ جانە زاڭسىز كوشى-قون تۋرالى سۇراقتان باستالدى.

«بۇل ءبىر عاجايىپ بولدى. ەگەر سول كەزدە باسىمدى بۇرىپ قالماسام، ءسىزدى قانشا جەردەن ۇناتسام دا قازىر وسىلاي سويلەسىپ وتىرماس ەدىم. مەن ونىڭ وق ەكەنىن جانە ونىڭ قۇلاعىما تيگەنىن بىردەن ءتۇسىندىم. مەنىڭ ويىمشا، قۇدايعا سەنبەيتىندەر ويلانۋى كەرەك»، - دەدى دونالد ترامپ وزىنە جاسالعان قاستاندىق تۋرالى ايتا وتىرىپ.

سونداي-اق، دونالد ترامپ ەندى قۇدايعا بۇرىنعىدان دا شىنايى سەنەتىنىن ايتادى، بۇل ونىڭ ءدىني سايلاۋشىلارىنا جاعارى ءسوزسىز.

پرەزيدەنتتىككە ۇمىتكەر قازان ايىندا تاعى ءبىر سايلاۋالدى ءىس-شارا وتكىزۋ ءۇشىن پەنسيلۆانياداعى باتلەر قالاسىنا ورالۋدى جوسپارلاپ وتىرعانىن ايتتى. ويتكەنى، الدىڭعى كەزدەسۋدە شابۋىل جاسالعاندىقتان ءىس- شارا كەنەتتەن توقتاتىلدى.

ترامپ باتلەردە سايلاۋشىلارمەن كەزدەسۋدەگى ءسوزىن «بۇعان دەيىن ايتقانىمداي» دەگەن سوزدەن باستايتىنىن ايتىپ ازىلدەدى، ال يلون ماسك «ءسىزدى دورەكى تۇردە توقتاتقانعا دەيىن» دەپ ازىلگە قوسىلدى.

سونىمەن قاتار دونالد ترامپ ا ق ش-تاعى زاڭسىز ميگراتسيا ماسەلەسىن قوزعادى. ايتۋىنشا، ەلگە 20 ميلليونعا جۋىق زاڭسىز ميگرانت كەلگەن جانە ولار قاۋىپتى ادامدار.

«سىزگە ايىنا ميلليونداعان ادام كەلەدى، ال ول ورنىنان تۇرىپ، بىردەڭە جاساعالى جاتقانداي كەيىپ تانىتادى»، - دەدى دونالد ترامپ كامالا حارريسكە قاراتا.

ول 13-شىلدەدەگى زاڭسىز ميگراتسيا دەرەكتەرىن كورسەتەتىن دياگرامماعا قاتىستى بولجام جاسادى.

«زاڭسىز ميگراتسيا مەنىڭ ءومىرىمدى ساقتاپ قالدى»، - دەپ ازىلدەدى دونالد ترامپ.

دونالد ترامپ دەموكرات قارسىلاسى كامالا حارريس پەن ا ق ش پرەزيدەنتى دجو بايدەندى سىنعا الدى. كامالا حارريسكە دەگەن نارازىلىق ونىڭ دەموكراتيالىق پارتيا اتىنان پرەزيدەنتتىككە ۇمىتكەر بولعاننان بەرى ۇلكەن سۇحبات بەرگىسى كەلمەۋىمەن بايلانىستى بولدى.

دونالد ترامپ دجو بايدەننىڭ پرەزيدەنتتىك جارىستان شىققانىنا وكىنىش ءبىلدىردى، ول ا ق ش پرەزيدەنتىمەن ريەۆانش وتكىزگىسى كەلگەن ەدى. ول يلون ماسكقا بەرگەن سۇحباتىندا دج. بايدەن توڭكەرىستىڭ سالدارىنان ا ق ش- تاعى پرەزيدەنتتىك جارىستان شىعۋعا ءماجبۇر بولعانىن ءمالىم ەتتى.

«مەن بايدەندى پىكىرتالاستا ويسىراتا جەڭگەنىم سونشالىق، ول كەتۋگە ءماجبۇر بولدى. دج. بايدەننىڭ كەتۋى - امەريكا قۇراما شتاتتارىنىڭ پرەزيدەنتىنىڭ توڭكەرىسى بولدى»، - دەپ اتاپ ءوتتى دونالد ترامپ دجو بايدەننىڭ كانديداتۋراسىن الىپ تاستاۋعا قاتىستى.

دونالد ترامپ ا ق ش- تا «تەمىر كۇمبەز» زىمىرانعا قارسى قورعانىس جۇيەسىن قۇرۋ قاجەتتىگىنە تاعى دا توقتالدى.

«نەگە بىزدە «تەمىر كۇمبەز» بولماسقا؟ يزرايلدە بار»، - دەيدى دونالد ترامپ.

ودان بولەك، ترامپ ا ق ش- تىڭ ءبىلىم مينيسترلىگىنە نارازىلىعىن جەتكىزدى.

«مەن ءبىلىم مينيسترلىگىن جاۋىپ، ءبىلىم بەرۋدى شتاتتارعا قايتارعىم كەلەدى»، - دەدى د. ترامپ.

پرەزيدەنتتىككە ۇمىتكەردىڭ پىكىرىنشە، امەريكالىق ستۋدەنتتەر بۇكىل الەمدەگى قۇرداستارىمەن سالىستىرعاندا ارتتا قالدى. ءبىلىم مينيسترلىگىن جويۋدىڭ باستى ارتىقشىلىقتارىنىڭ ءبىرى - ءبىلىم بەرۋ شىعىندارىن ەكى ەسە ازايتۋ.

سۇحبات بارىسىندا دونالد ترامپ ونىڭ اكىمشىلىگى امەريكالىقتارعا تاريحتاعى ەڭ اۋقىمدى سالىق جەڭىلدىكتەرىن جاساعانىن مالىمدەدى.

سۇحباتتىڭ ەكىنشى جارتىسىندا يلون ماسك مەملەكەتتىك شىعىنداردى ەسەپتەۋدە ءوز كومەگىن ۇسىندى، ال دونالد ترامپ ونىڭ قاتىسۋىن قابىل الاتىنىن ايتتى. مامىر ايىندا امەريكالىق ب ا ق د. ترامپ جەڭىسكە جەتكەن جاعدايدا ونىڭ اكىمشىلىگىندە كەڭەسشى لاۋازىمىن ۇسىنۋدى قاراستىرىپ جاتقانىن حابارلاعان ەدى.

سونىمەن قاتار د. ترامپ جاساندى ينتەللەكتىگە قاتىستى الاڭداۋشىلىق تانىتتى، سەبەبى ج ي ەلەكتر ەنەرگياسى شىعىنىن تالاپ ەتەدى.

«بۇل مەنىڭ جاعامدى ۇستاتادى، ءبىراق جاساندى ينتەللەكت قازىرگى ءبىزدىڭ ەل وندىرىسىنەن ەكى ەسە كوپ ەنەرگيانى قاجەت ەتەدى، بۇعان سەنىڭىز»، - دەدى دونالد ترامپ.

«X» پلاتفورماسىنىڭ ەسەپتەۋىنشە، 2 ساعاتتان استام ۋاقىتقا سوزىلعان سۇحباتتى 1 ميلليوننان استام ادام قارادى.

اتالعان سۇحبات د. ترامپتىڭ سايلاۋ ناۋقانىن جانداندىرۋعا كومەكتەسۋگە ارنالعان، ويتكەنى ونىڭ دەموكراتتىق باسەكەلەسى، ۆيتسە- پرەزيدەنت كامالا حارريس قوعامدىق ساۋالناما بويىنشا العا شىقتى.

اۆتور

داۋلەت ىزتىلەۋ