قارتتار ءۇيىنىڭ 101 جاستاعى تۇرعىنى ۇزاق جاساۋدىڭ سىرىن ايتتى
الماتى. KAZINFORM - الماتىداعى «شاڭىراق» الەۋمەتتىك قىزمەتتەر ورتالىعىنىڭ جۇمىس ىستەپ تۇرعانىنا شيرەك عاسىرعا جۋىقتادى. وندا قارتتار مەن ءبىرىنشى، ەكىنشى توپتاعى مۇگەدەكتەر تۇرادى.

Kazinform ءتىلشىسى قارتتار ءۇيىن پانالاعان جاندارمەن تانىسىپ، ورتالىقتىڭ احۋالىن ءبىلىپ قايتتى.
الماتىداعى «شاڭىراق» ورتالىعىندا قازىر 298 قارت تۇرىپ جاتىر. ونىڭ وتىز پايىزى - قازاق، قالعانى وزگە ۇلت وكىلدەرى.

قارتتار ءۇيى - سان قيلى تاعدىرلار مەكەنى. كەيبىرىنىڭ جۇبايى مەن بالالارى قايتىس بولىپ، جالعىز قالعان. ەندى ءبىرى وتباسىن قۇرماعان. ءبىراق، كوپشىلىگىنىڭ بالالارى دا، نەمەرەلەرى دە بار. ءبىر سوزبەن ايتقاندا، تاعدىر تالكەگىنە تۇسكەن ءاربىر تۇرعىننىڭ باستان كەشكەن ءوز وقيعاسى بار.
«شاڭىراق» ورتالىعىن پانالاعان اتا-اجەلەردى اڭگىمەگە تارتىپ كوردىك. كوبى باس تارتتى. دەگەنمەن بىرەر تۇرعىنمەن سۇحباتتاسۋدىڭ ءساتى ءتۇستى. سونىڭ ءبىرى - ايىمتورى تايعارينوۆا.

- اقمولا وبلىسىنىڭ تۋماسىمىن. ءۇيدىڭ ۇلكەنىمىن. اۋىلدان قالاعا جەتىنشى سىنىپتى بىتىرگەن سوڭ كەتتىم. وزىمنەن كەيىنگى باۋىرلارىم مەن ءسىڭىلىم سول اۋىلدا قالدى. قازىر ءبارى وتباسىلى، بالالى-شاعالى. اتا-انام قايتىس بولعاننان كەيىن ارامىز سۋىپ كەتتى، - دەيدى ول.
ايىمتورى تايعارينوۆا - كاسىبي اكتريسا. شىمكەنتتەگى جۇمات شانين اتىنداعى قازاق دراما تەاترىندا كوپ جىل جەمىستى ەڭبەك ەتتى. كەيىن الماتىداعى قۋىرشاق تەاترىندا جانە عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا جۇمىس ىستەدى.

- تەاتر ساحناسىندا تالاي باستى ءرولدى سومدادىم. باقىتتى ەدىم. ءبىراق، ءتۇرلى سەبەپتەرگە بايلانىستى ول جەردەن كەتتىم. تۇسىنىكسىز جاعدايلاردى باستان كەشىردىم. زەينەتكە شىقتىم. مارقۇم جولداسىم سونداي كەرەمەت جان ەدى. الماتىنىڭ ورتالىعىندا ءوز باسپانامىز بولدى. الايدا، ودان دا ايىرىلىپ قالدىق. كۇيەۋىم قاتتى اۋىردى. اقشا جەتپەدى. سودان كەيىن ۇيگە ءبىر جىگىتتى تۇرعىزدىق. ول اي سايىن پاتەر اقىسى رەتىنە 30 مىڭ تەڭگە بەرىپ تۇردى. سول جىگىت مەنى الداپ، قۇجاتتارعا قول قويدىرىپ ءۇيدى ساتىپ جىبەردى. ءسويتىپ، دالادا قالدىم. بارار جەرىم، باسار تاۋىم قالمادى، - دەيدى اكتريسا.

جاسى 90-عا تاياعان اجەي سوڭعى 15 جىلدان بەرى وسى قارتتار ۇيىندە تۇرىپ جاتىر.

- وسى جەرگە كەلگەلى ومىرىمدە كورمەگەن ءىلتيپاتتى، سىي-قۇرمەتتى كوردىم. اي- اپاي دەپ ءبارى سىيلاپ تۇرادى. جاعدايىم جاقسى، - دەيدى ايىمتورى اجەي.
قايرات قالياقپەروۆ - ەكىنشى توپ مۇگەدەگى. قارتتار ۇيىندە 2014-جىلدان بەرى تۇرادى.

- جاسىم 59-دا. سەمەيدەن كەلدىم. اجىراسقانمىن. ۇلىم بار. بۇرىن بالامدى كورىپ، ارالاسىپ تۇراتىنمىن. سوڭعى جىلدارى كەزدەسپەيتىن بولدىق. جاقىندا 19 جاسقا تولدى. ۇلكەن جىگىت بولدى. ساعىندىم، - دەپ كۇرسىنەدى قايرات قالياقپەروۆ.
ايتۋىنشا، ۋاقىتىن مونشاقتان ءتۇرلى زاتتار جاساۋمەن وتكىزەدى.

- سۋمونشاقتان ساندىك بۇيىمدار توقيمىن. ءتۇرلى كادەسىيلار جاسايمىن. سوسىن ولاردى ساتامىن. سۇرانىس جوعارى، تاپسىرىس بەرۋشىلەر كوپ. وزىمە ۇنايدى، مونشاقتاردى وسى جەردە تەگىن بەرەدى، - دەيدى كەيىپكەر.
قارتتار ۇيىندە تۇرىپ جاتقانداردىڭ ەڭ ۇلكەنى - 101 جاستا. سىرلى اياقتىڭ سىرى كەتسە دە، سىنى كەتپەس» دەگەندەي ءوز بەتىنشە ءجۇرىپ-تۇرا الماسا دا، كوزى كورمەسە دە، اجەيدىڭ كوكىرەگى سايراپ تۇر.
ءبىر ۇل، ءبىر قىزىم بار. قازىر ەكەۋى دە زەينەتكەر. الماتىدا تۇرادى. ماعان قارايتىنداي شامالارى جوق. سوندىقتان بالالارىما رەنجىمەيمىن. نەمەرە-شوبەرەلەرىم كەلىپ تۇرادى، - دەيدى نادەجدا كلەنوۆا.
عاسىر جاساعان كەيۋانادان ۇزاق ءومىر ءسۇرۋدىڭ سىرىن سۇرادىق.
- ەشكىمگە جاماندىق ويلاماڭدار، - دەپ قىسقا قايىردى ول.

ورتالىق وتباسىنىڭ ورنىن باسا المايتىنى انىق. دەسە دە، قاريالار ءۇشىن بارلىق جاعداي جاسالعان. كەڭ بولمە، تازا كيىم، ۋاقىتىلى تاماق، ەمدىك شارالارى.
- ورتالىقتاعى قاريالار مەن مۇگەدەكتەرگە جەتى ءتۇرلى ارنايى الەۋمەتتىك قىزمەت كورسەتىلەدى. ولار - الەۋمەتتىك-تۇرمىستىق، الەۋمەتتىك-مەديتسينالىق، الەۋمەتتىك-ەڭبەك، الەۋمەتتىك-پسيحولوگيالىق، الەۋمەتتىك-ەكونوميكالىق، الەۋمەتتىك-مادەني جانە الەۋمەتتىك-قۇقىقتىق قىزمەتتەر. ورتالىق تۇرعىندارى ءتورت ۋاقىت تاماقپەن قامتاماسىز ەتىلگەن. جايلى ءومىر ءسۇرۋ ءۇشىن بارلىق جاعداي جاسالعان. زەينەتكەرلەر مەن مۇگەدەكتەر تاۋلىك بويى ورتالىق قىزمەتكەرلەرىنىڭ باقىلاۋىندا. قازىر ورتالىقتا 298 قىزمەت الۋشى تۇرادى، ونىڭ ىشىندە 109 ادام - 1,2,3 توپ مۇگەدەكتەرى. 30 پايىزى - قازاق، - دەيدى قاليبەك اقىلبەك «شاڭىراق» ورتالىعىنىڭ ديرەكتورى.

دارىگەرلەر قىزمەت الۋشىلاردىڭ دەنساۋلىعىن ۇنەمى قاداعالاپ وتىرادى. ءبارى № 10 ەمحانادا تىركەلگەن. نەگىزىنەن مەديتسينالىق قىزمەتتەردىڭ كەپىلدىك بەرىلگەن كولەمىن الادى.
مەكەمە باسشىسىنىڭ ايتۋىنشا، ارنايى ەرەجەگە سايكەس زەينەتاقىنىڭ %70 ورتالىقتىڭ شوتىنا تۇسەدى.

ال زەينەتكەرلەر مەن مۇمكىندىگى شەكتەۋلى جانداردىڭ قولىندا تيىسىنشە 45 مىڭ تەڭگە قالادى. ولار بۇل اقشانى ءوز قالاۋىنشا جۇمساي الادى.
ايتا كەتەيىك، «شاڭىراق» الەۋمەتتىك قىزمەت كورسەتۋ ورتالىعى 2001 -جىلى اشىلعان. الماتىنىڭ مامىر شاعىن اۋدانىندا ورنالاسقان عيمارات 3 بلوكتان تۇرادى.
اۆتور
الما مۇقانوۆا