قاراعاندى تۇرعىنى ۇلتارالىق ارازدىقتى قوزدىردى دەگەن كۇدىكپەن قاماۋعا الىندى
قاراعاندى. KAZINFORM - قاراعاندىدا الەۋمەتتىك جەلىدەگى جاريالانىمنان كەيىن ۇلتارالىق ارازدىقتى قوزدىرۋ فاكتىسى بويىنشا قىلمىستىق ءىس قوزعالدى. كۇدىكتى دەپ تانىلعان 22 جاستاعى قالا تۇرعىنى ۇستالىپ، سوت شەشىمىمەن ەكى ايعا ۋاقىتشا ۇستاۋ يزولياتورىنا قامالدى.
الەۋمەتتىك جەلىدە جاريالانعان بەينە قوعام نارازىلىعىن تۋدىردى. تەرگەۋ دەرەكتەرىنە سۇيەنسەك، وندا قازاق ۇلتى مەن مۇسىلماندارعا قاتىستى قورلايتىن جانە ارانداتۋشى سيپاتتاعى سوزدەر ايتىلعان. بۇل قوعامدا ۇلكەن رەزونانس تۋعىزىپ، قۇقىق قورعاۋ ورگاندارىنىڭ نازارىن اۋدارتتى.
قاراعاندى وبلىستىق پوليتسيا دەپارتامەنتىنىڭ حابارلاۋىنشا، جاريالانىم الەۋمەتتىك جەلىگە مونيتورينگ جاساۋ بارىسىندا انىقتالعان. ماتەريالدار بىردەن پروتسەسسۋالدىق شەشىم قابىلداۋ ءۇشىن ءتيىستى تەرگەۋ ورگاندارىنا جىبەرىلدى. اتالعان دەرەك بويىنشا ق ر قىلمىستىق كودەكسىنىڭ 174-بابى 1-بولىگىنە سايكەس قىلمىستىق ءىس قوزعالدى. بۇل باپ - الەۋمەتتىك، ۇلتتىق، رۋلىق، ناسىلدىك، تەكتىك نەمەسە ءدىني الاۋىزدىقتى قوزدىرۋ ءۇشىن جاۋاپكەرشىلىكتى كوزدەيدى.
- تەرگەۋ بارىسىندا كۇدىكتىنىڭ ەل اۋماعىنان تىس جەرگە شىعۋعا دايىندالىپ جاتقانى بەلگىلى بولدى. وسىعان بايلانىستى ونى قاماۋعا الۋ تۋرالى ءوتىنىش بەرىلىپ، 22 -شىلدەدە قاراعاندى قالاسىنىڭ تەرگەۋ سوتى بۇلتارتپاۋ شاراسىن سانكسيالادى. قازىرگى تاڭدا كۇدىكتى ەكى اي مەرزىمگە قاماۋعا الىندى، - دەلىنگەن پ د رەسمي حابارلاماسىندا.
بۇعان دەيىن كۇدىكتىنىڭ الەۋمەتتىك جەلىدە كوپشىلىكتەن كەشىرىم سۇراعان ۆيدەوسى تاراعان بولاتىن. الايدا بۇل ارەكەت تەرگەۋ ورگاندارىنىڭ شەشىمىنە ىقپال ەتپەدى. قازىر ءىس اياسىندا كەشەندى لينگۆيستيكالىق جانە ءدىنتانۋ ساراپتامالارى تاعايىندالدى. تەرگەۋ اياقتالعان سوڭ، زاڭعا سايكەس ناقتى پروتسەسسۋالدىق شەشىم قابىلدانادى.
ايتا كەتۋ كەرەك، قىلمىستىق كودەكستىڭ 174-بابى بويىنشا 2 جىلدان 7 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان. ساراپشىلاردىڭ ايتۋىنشا، مۇنداي ىستەر ەتنوسارالىق تۇراقتىلىق پەن قوعامدىق كەلىسىمگە تىكەلەي اسەر ەتەتىندىكتەن، اسا مۇقيات قاراۋدى تالاپ ەتەدى.
قازىرگى ۋاقىتتا بۇل جاعداي قۇقىق قورعاۋ ورگاندارىنىڭ باقىلاۋىندا. پوليتسيا دەپارتامەنتى تەرگەۋ بارىسى تۋرالى قوعامدى ۋاقتىلى اقپاراتتاندىرىپ وتىرۋعا ۋادە بەردى.
ەسكە سالا كەتەيىك، بىلتىر الماتىدا الەۋمەتتىك جەلىدە ۇلتارالىق ارازدىقتى قوزدىرعان ايەل ادام ۇستالعان بولاتىن.
اۆتور
ايزادا اگيلبايەۆا
