قاراعاندى-استانا جولىندا اۋا رايى ناشارلاعاندا جىلدامدىقتى قانشاعا دەيىن تومەندەتۋ قاجەت
استانا. KAZINFORM - ەندى اۋا رايى قولايسىز بولعان كەزدە جۇرگىزۋشىلەرگە جىلدامدىقتى ساعاتىنا 60 ك م دەيىن تومەندەتۋگە تۋرا كەلەدى. ەرەجە بۇزعاندارعا 5-تەن 40 ا ە ك- كە دەيىن ايىپپۇل سالىنۋى مۇمكىن.

قاراعاندى-استانا اۆتوماگيسترالىندە، باسقا دا رەسپۋبليكالىق جىلدام جۇرەتىن جولدارداعىداي، قولايسىز اۋا رايى جاعدايلارىندا رۇقسات ەتىلگەن جىلدامدىقتى وزگەرتەتىن جول بەلگىلەرى ورناتىلادى.
جاڭا ەرەجەگە سايكەس، كورىنۋ ناشارلاعان نەمەسە كوكتايعاق بولعان جاعدايدا جۇرگىزۋشىلەر جىلدامدىقتى ساعاتىنا 60 شاقىرىمعا دەيىن تومەندەتۋگە مىندەتتى.
بۇل شارا جول-كولىك وقيعالارىنىڭ قاۋىپ-قاتەرىن ازايتۋعا جانە توتەنشە جاعدايلاردىڭ الدىن الۋعا باعىتتالعان.
- قولايسىز اۋا رايى جاعدايىندا رەسپۋبليكالىق ماڭىزداعى جولداردا ەرەكشە جىلدامدىق رەجيمى ەنگىزىلەدى. جىلدامدىقتى شەكتەۋ بۇزۋشىلىقتارىن تىركەۋ ءۇشىن جىلدامدىق رەجيمى مەن ورتاشا جىلدامدىقتى باقىلاۋ كامەرالارىمەن بىرىكتىرىلەتىن بولادى.
ادەتتەگى جاعدايدا اۋا رايى جاقسى بولعان كەزدە تراسساداعى ەڭ جوعارى جىلدامدىق بۇرىنعىسىنشا قالادى - 140 ش م/ساع، - دەپ اتاپ ءوتتى اكىمشىلىك پوليتسيا باسقارماسى باستىعىنىڭ ورىنباسارى پودپولكوۆنيك ەلجاس جارتىبايەۆ.
ورتاشا جىلدامدىققا كەلەر بولساق، پوليتسيا دەپارتامەنتى ونىڭ ءجۇرىپ وتكەن جولدى ۋاقىت ارالىعىنا ءبولۋ ارقىلى ەسەپتەلەتىنىن ءتۇسىندىردى. جولدىڭ تىك سىزىقتى ۋچاسكەلەرىندە بۇل كورسەتكىشتىڭ ارتۋى اۆتوماتتى جۇيەلەرمەن تىركەلەتىن بولادى. قازىر ولار تەستىلىك رەجيمدە رەسپۋبليكانىڭ 13 اۆتوجولىنا ورناتىلعان. ەرەجە بۇزعانى ءۇشىن ايىپپۇل 5-تەن 40 ا ە ك- كە دەيىن بولادى.
ازىرگە وڭىردە مۇنداي بۇزۋشىلىقتار تىركەلمەگەن، سەبەبى قاجەتتى جابدىقتار ءالى ورناتىلماعان.
زاڭناماداعى وزگەرىستەر تۋرالى تاعى نە ءبىلۋ كەرەكتىگى تۋرالى وڭىرلىك كوممۋنيكاتسيالار قىزمەتىندە وتكەن بريفينگتە ايتىلدى. اۋەسقويلار ءۇشىن اكىمشىلىك جاۋاپكەرشىلىكتىڭ سارالانۋى وزگەردى.
- ا ق ب ت ك- ءنىڭ 592-بابى 3-1 جانە 5-تارماقتارمەن تولىقتىرىلدى. ەگەر بۇرىن جىلدامدىقتى ارتتىرۋدىڭ ەڭ جوعارى شاماسى 40 شم/ساع جانە ودان جوعارى بولىپ، ول ءۇشىن ءبىر عانا ايىپپۇل بولسا، ەندى جىلدامدىقتى 40-60 ش م/ساع دياپازونىندا ارتتىرعان جۇرگىزۋشى 20 ا ە ك (78640 تەڭگە) تولەيدى.
ال ساعاتىنا 60 شاقىرىمنان اسقانى ءۇشىن زاڭدا 40 ا ە ك (157280 تەڭگە) مولشەرىندە ايىپپۇل قاراستىرىلعان. وسى مولشەردەن قايتا اسىپ كەتكەن جاعدايدا ايىپپۇل 60 ا ە ك (235920 تەڭگە) دەيىن وسەدى، - دەپ ناقتىلادى ەلجاس جارتىبايەۆ.
بۇل جاڭالىق قالا سىرتىنداعى جولداردا ءاربىر ءۇشىنشى ادام جىلدامدىقتى ارتتىرۋ سالدارىنان قازا بولاتىن ج ك و تالداۋىن ەسكەرە وتىرىپ ەنگىزىلدى.
ەسكە سالساق، وتكەن اپتادا كۇن رايىنىڭ قولايسىزدىعى سالدارىنان قاراعاندى-استانا تاس جولىندا مىڭنان اتسام كولىك كەپتەلىپ قالعان بولاتىن.
اۆتور
ايزادا اگيلبايەۆا