قانات بوزىمبايەۆ: ءبىز ارالدى قۇتقارۋ قورىنىڭ رەفورماسىنان زور ءۇمىت كۇتەمىز
استانا. KAZINFORM - پرەمەر-ءمينيستردىڭ ورىنباسارى قانات بوزىمبايەۆ استانا حالىقارالىق فورۋمىندا قازاقستاننىڭ سۋ شارۋاشىلىعىن دامىتۋ باعىتىنداعى ساياساتتى قالاي ۇيلەستىرىپ وتىرعانىن باياندادى.
ۆيتسە-پرەمەر قازاقستان ارالدى قۇتقارۋ حالىقارالىق قورىنىڭ اياسىنداعى ىنتىماقتاستىققا ەرەكشە نازار اۋداراتىنىن اتاپ ءوتتى. رەسمي استانا ۇيىم اياسىندا موينىنا العان مىندەتتەمەلەردى بەرىك ۇستاناتىنىن ايتقان ول قوردىڭ قۇرىلىمى مەن شارتتىق-قۇقىقتىق بازاسىن ودان ءارى جەتىلدىرۋ باعىتىنداعى باستامالارىن قولدايتىنىن ايتتى.
- ءبىز ارالدى قۇتقارۋ حالىقارالىق قورىن رەفورمالاۋ باعىتىندا كەلەشەك ۋاعدالاستىقتاردان زور ءۇمىت كۇتەمىز. بۇل ورتالىق ازياداعى ماڭىزدى ۇيىمعا مۇشە ەلدەردىڭ ءبارىنىڭ مۇددەسىن ەسكەرە وتىرىپ، تيىمدىلىگىن ارتتىرۋعا باعىتتالعان، - دەپ اتاپ ءوتتى قانات بوزىمبايەۆ.
پرەمەر-ءمينيستردىڭ ورىنباسارى سۋ سالاسىنداعى مەملەكەتتىك ساياساتتىڭ نەگىزگى باعىتتارىن اتادى. قازاقستان 42 جاڭا سۋ قويماسىن سالىپ، قولدانىستاعى 30 سۋ قويماسىن رەكونسترۋكتسيالاۋدى، سونداي-اق 14 مىڭ شاقىرىمنان استام سۋارۋ ارنالارىن جاڭعىرتۋدى جوسپارلاپ وتىرعانىن ءمالىم ەتتى. بۇل شارالار سۋارمالى جەر كولەمىن ارتتىرىپ، توتەنشە جاعدايلارعا توتەپ بەرۋگە جانە ەكونوميكانىڭ ءتۇرلى سالالارىن تۇراقتى سۋمەن قامتاماسىز ەتۋگە مۇمكىندىك بەرەتىنى دە ايتىلدى.
قانات بوزىمبايەۆ سۋ سەكتورىن سيفرلاندىرۋ باعىتىندا ءبىرىڭعاي سۋ كاداسترىن تۇزگەن Hydro.gov.kz سيفرلىق پلاتفورماسى قۇرىلىپ جاتقانىن اتاپ ءوتتى.
ايتا كەتەيىك، ەلوردادا استانا حالىقارالىق فورۋمى ءوتىپ جاتىر.
