قاشاعان، قاراشىعاناق، تەڭىز جوبالارى: وپەراتورلارعا جەرگىلىكتى قامتۋدى ارتتىرۋ مىندەتتەلدى

استانا. KAZINFORM - ەنەرگەتيكا مينيسترلىگى تەڭىز، قاشاعان جانە قاراشىعاناق جوبالارىنىڭ وپەراتورلارىنا وتاندىق وندىرۋشىلەردى تارتۋعا باعىتتالعان ناقتى ستراتەگيالىق مىندەتتەر جۇكتەدى.

ەنەرگەتيكا مينيسترلىگى جەرگىلىكتى قامتۋدى دامىتۋ ساياساتىنىڭ جاڭا، ايتارلىقتاي تالاپشىل كەزەڭىنە كوشەتىنىن مالىمدەدى.

ەنەرگەتيكا ءمينيسترى ەرلان اقكەنجەنوۆتىڭ توراعالىعىمەن وتكەن حالىقارالىق مۇناي-گاز ماشينا جاساۋ سالاسىن دامىتۋ ورتالىعى (IMBC) قاۋىمداستىعى كەڭەسىنىڭ وتىرىسىندا ءىرى مۇناي-گاز وپەراتورلارى - «تەڭىزشيەۆرويل»، «نورت كاسپيان وپەرەيتينگ كومپاني» جانە «قاراشىعاناق پەترولەۋم وپەرەيتينگتىڭ» ساتىپ الۋ پراكتيكاسىن تۇبەگەيلى وزگەرتۋگە باعىتتالعان ناقتى ءىس-شارالار كەشەنى ۇسىنىلدى.

ەكونوميكانى ءارتاراپتاندىرۋ بويىنشا ستراتەگيالىق ماقساتتارعا قول جەتكىزۋ ءۇشىن جۇمىستىڭ قارقىنىن ەداۋىر جەدەلدەتۋ دە تاپسىرىلدى. مينيستر بۇعان دەيىنگى كەلىسىمدەر مەن پارلامەنت ماجىلىسىندەگى تىڭداۋلار قورىتىندىسى بويىنشا بەرىلگەن تاپسىرمالاردىڭ ناقتى ورىندالۋىن قامتاماسىز ەتۋ ءۇشىن بار كۇش-جىگەردى سالۋ كەرەك ەكەنىن دە باسا ايتتى.

- ءبىز سەرىكتەستەرىمىزدىڭ قازاقستان ەكونوميكاسىنا قوسقان ۇلەسىن جوعارى باعالايمىز. سونىمەن قاتار جاڭا مىندەتتەردى ورىنداۋ ءۇشىن الەۋەتىمىزدىڭ جەتەتىنىن كورىپ وتىرمىز. ءبىزدىڭ تۇجىرىمدامالىق ماقساتىمىز - ءىرى جوبالاردىڭ اينالاسىندا ءوزىن-ءوزى قامتاماسىز ەتەتىن ونەركاسىپتىك كلاستەر قالىپتاستىرۋ. بۇل بۇگىندە ۇلتتىق ەكونوميكانىڭ تۇراقتىلىعىنا تىكەلەي اسەر ەتەتىن ماسەلە، - دەدى ەنەرگەتيكا ءمينيسترى ەرلان اقكەنجەنوۆ.

وسىعان وراي، وپەراتورلارعا ناقتى مىندەتتەر قويىلدى. 2025-جىلدىڭ قىرگۇيەك ايىندا اقتاۋ قالاسىندا وتەتىن مۇناي- گاز ماشينا جاساۋ فورۋمى اياسىندا وتاندىق جەتكىزۋشىلەرمەن ءبىرقاتار كەلىسىمشارتتارعا قول قويۋ جوسپارلانعان. سونىمەن قاتار ءاربىر وپەراتوردىڭ كەمىندە بەس ۇزاقمەرزىمدى كەلىسىمشارتى وتاندىق وندىرۋشىلەرمەن جاسالۋى كەرەك.

سونداي-اق حالىقارالىق OEM- وندىرۋشىلەرىنىڭ ءوندىرىسىن ەلىمىزدە جەرگىلىكتەندىرۋ بويىنشا جۇمىستى جالعاستىرۋ قاجەت. بۇل ءۇشىن بارلىق قولجەتىمدى تەتىك، سونىڭ ىشىندە «ينۆەستيتسيالىق ايىرباس شارتى» سىندى قۇرالدار قولدانىلۋى ءتيىس.

بۇل باستامالار IMBC- ءتىڭ 109 مىڭنان استام تاۋار پوزيتسياسى بويىنشا جۇرگىزگەن اناليتيكالىق تالداۋىنا جانە 200 دەن استام جەرگىلىكتى كاسىپورىندى قامتىعان اۋديتتىڭ ناتيجەلەرىنە سايكەس جۇرگىزىلەدى. ناقتى شارالاردىڭ ورىندالۋى ەنەرگەتيكا ءمينيسترىنىڭ تىكەلەي باقىلاۋىندا بولادى. مۇنان بولەك، وپەراتورلار مەن قازاقستان ۇكىمەتى اراسىنداعى ءوزارا بايلانىستىڭ تيىمدىلىگىن باعالاۋدا نەگىزگى كورسەتكىشتەردىڭ ءبىرى رەتىندە قارالادى.

ايتا كەتەلىك ەنەرگەتيكا مينيسترلىگى كومىر ونەركاسىبىنىڭ ماسەلەلەرىن جەدەل باسقارۋعا كىرىسكەنى تۋرالى جازعان ەدىك.