ق م د ب مەشىتتە بالانى ۇرعان يمامدى جۇمىستان شىعاردى
قازاقستان مۇسىلماندارى ءدىني باسقارماسىنىڭ الماتى وبلىسى بويىنشا وكىلدىگى ەڭبەكشىقازاق اۋدانى شەلەك اۋىلىنداعى مەشىتتە بولعان وقيعاعا تۇسىنىك بەردى، دەپ حابارلايدى قازاقپارات ءتىلشىسى.
الەۋمەتتىك جەلىدە تاراعان ۆيدەودا مەشىتتە ناماز وقۋعا كەدەرگى كەلتىرگەن كىشكەنتاي بالانى ساپتا تۇرعان يمام ۇرىپ جىبەرگەن، بالا سوققىدان قۇلاپ تۇسەدى.
وقيعا الماتى وبلىسى ەڭبەكشىقازاق اۋدانى شەلەك اۋىلىنداعى «حيدايات» مەشىتىندە بولعانى انىقتالدى.
«كەلەڭسىز وقيعادان كەيىن ەڭبەكشىقازاق اۋدانىنىڭ اكىمشىلىك قىزمەتكەرلەرى، شەلەك اۋىلىنىڭ تۇرعىندارى، ءدىن قىزمەتكەرلەرى، مەشىت جاماعاتى جانە بالانىڭ اتا- اناسىنىڭ قاتىسۋىمەن ارنايى كەزدەسۋ ءوتتى. جيىندا "حيدايات" مەشىتىنىڭ يمامى ءوز قاتەلىگىن مويىنداپ، بالانىڭ اتا- اناسىنان، سونداي- اق كوپشىلىكتەن كەشىرىم سۇرادى. بالانىڭ زاڭدى وكىلدەرى يمامنىڭ كەشىرىمىن قابىل الىپ، ەكى تاراپ ءوزارا بىتىمگە كەلدى»، - دەپ حابارلادى ق م د ب- نىڭ الماتى وبلىسى بويىنشا وكىلدىگىنەن.
سونداي - اق قازاقستان مۇسىلماندارى ءدىني باسقارماسى وسى جاعدايعا بايلانىستا ءتيىستى قورىتىندى شىعارىپ، ورەسكەل ارەكەتكە جول بەرگەن ءدىن قىزمەتكەرىنە شارا قولدانعانى ايتىلدى.
«باس ءمۇفتيدىڭ بۇيرىعىمەن «حيدايات» مەشىتىنىڭ يمامى جۇمىستان شىعارىلدى. الداعى ۋاقىتتا مۇنداي وقيعالار ورىن الماس ءۇشىن، وزگە يمامدارمەن ءتيىستى ءتۇسىندىرۋ جۇمىستارى جۇرگىزىلۋدە»، - دەلىنگەن مالىمەتتە.
اۆتور
الما مۇقانوۆا
Посмотреть эту публикацию в Instagram
