ق ف ف ادىلەت بارمەنقۇلوۆتىڭ باسشىلىقتان كەتكەنىن راستادى

استانا. KAZINFORM - قازاقستان فۋتبول فەدەراتسياسىنىڭ باسپا ءسوز قىزمەتى ادىلەت بارمەنقۇلوۆتىڭ فەدەراتسيا پرەزيدەنتتىگىنەن كەتكەنىن راستادى.

«ول مالىمەتتى راستايمىز. ءسال كۇتسەڭىزدەر، سايتقا رەسمي اقپارات شىعادى»، - دەدى فەدەراتسياداعىلار.

بارمەنقۇلوۆ قازاقستان فۋتبول فەدەراتسياسىنىڭ تىزگىنىن ۇستاپ تۇرعان كەزدە سپورتشىلارمەن، اسىرەسە، ۇلتتىق قۇراما جىگىتتەرىمەن ەمىن-ەركىن قارىم-قاتىناس ورناتا الاتىن فۋنكسيونەر رەتىندە كوزگە ءتۇستى. ونىڭ كەزىندە فۋتبولدان ۇلتتىق قۇرامانىڭ باس باپكەرى بولىپ كەلگەن موگامەد اديەۆ قازاق فۋتبولىنىڭ ءباسىن ءبىراز دەڭگەيگە كوتەردى. الايدا ونىڭ ورنىنا مەملەكەتتىك تىلگە قاتىستى داۋعا ىلىگىپ ۇلگەرگەن ستانيسلاۆ چەرچەسوۆتىڭ سايلانۋىن ادىلەت بارمەنقۇلوۆتىڭ جۇمىسىنداعى قاتەلىك رەتىندە باعالايتىن ساراپشىلار كوپ. سپورت جۋرناليستەرى ءا. بارمەنقۇلوۆتى قازاقستان پرەمەر ليگاسىندا لەگيونەرلەردىڭ سانىن ارتتىرعان باسشى رەتىندە سىناپ ءجۇردى.

ايتا كەتەيىك، ادىلەت نازارباي ۇلى ق ف ف باسشىلىعىنا 2022 -جىلى 28- اقپاندا تاعايىندالعان بولاتىن.

وعان دەيىن 2020-2022 - «قازاق مىس كورپوراتسياسى» ج ش س باسقارما ءتوراعاسىنىڭ ورىنباسارى، «Kazakhmys Smelting» ج ش س باس ديرەكتورى بولىپ جۇمىس ىستەدى.

ەڭبەك جولىن ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىنىڭ ە ە م ماتەماتيكالىق قامتاماسىز ەتۋ كافەدراسىنىڭ اسسيستەنتى (1993-1995) بولىپ باستاعان.

1995-1999 - «Tamos Education» ج ا ق ءبىلىم بەرۋ مەكەمەسىنىڭ ديرەكتورى؛

1999-2000 - «Tamos» فيزيكا-ماتەماتيكا مەكتەبىنىڭ ديرەكتورى؛

2000-2002 - «مۇناي جانە مۇناي ونىمدەرىن ساراپتاۋ جانە سەرتيفيكاتتاۋ ورتالىعى» ج ش س باس ديرەكتورى؛

2001-2005 - «تايماس» كومپانيالار توبىنىڭ پرەزيدەنتى؛

2005-2006 - «اتامەكەن» قازاقستاننىڭ جالپى ۇلتتىق كاسىپكەرلەر جانە جۇمىس بەرۋشىلەر وداعى باسقارماسىنىڭ مۇشەسى؛

2006 - «ەۋرازيالىق زەرتتەۋلەر ينستيتۋتى» قورىنىڭ باس ديرەكتورى؛

2007-2012 - قازاقستان رەسپۋبليكاسى كولىك جانە كوممۋنيكاتسيا مينيسترلىگى كولىكتىك باقىلاۋ كوميتەتىنىڭ ءتوراعاسى؛

2012 - قازاقستان رەسپۋبليكاسى كولىك جانە كوممۋنيكاتسيا مينيسترلىگى كولىك جانە قاتىناس جولدارى كوميتەتىنىڭ ءتوراعاسى؛

2012-2014 - «ارقا» باسقارۋشى ينۆەستيتسيالىق كومپانياسى» ا ق باسقارما ءتوراعاسى، قاراعاندى وبلىسى اكىمىنىڭ كەڭەسشىسى؛

2014-2016 - «قازاق مىس كورپوراتسياسى»، «Kazakhmys Holding» ج ش س كوممەرتسيالىق ديرەكتورى؛

2016-2022 - «Kazakhmys Smelting (قازاقمىس سمەلتينگ) » ج ش س باس ديرەكتورى بولدى.

ەسكە سالا كەتەيىك، بۇعان دەيىن قازاقستان فۋتبول فەدەراتسياسىنىڭ ۇلتتىق قۇراما باپكەرىنىڭ جالاقىسىنا قاتىستى مالىمدەمە جاساعانىن جازعان ەدىك.

اۆتور

ەسىمجان ناقتىباي