نيدەرلاند العاش رەت يزرايلدى ۇلتتىق قاۋىپسىزدىككە قاتەر توندىرەتىن ەل دەپ تانىدى

استانا. KAZINFORM - نيدەرلاند لاڭكەستىككە قارسى اگەنتتىگىنىڭ بايانداماسىندا يزرايل مەن ا ق ش قاۋىپ- قاتەر توندىرەتىن ەلدەر اتالدى، دەپ حابارلايدى Kazinform مەنشىكتى ءتىلشىسى.

نيدەرلاند تاريحىندا العاش رەت يزرايلدى ۇلتتىق قاۋىپسىزدىككە قاتەر توندىرەتىن ەلدەر تىزىمىنە قوستى. بۇل تۋرالى ادىلەت جانە قاۋىپسىزدىك مينيسترلىگى جانىنداعى قاۋىپسىزدىك جانە لاڭكەستىككە قارسى ۇلتتىق ۇيلەستىرۋشى (NCTV) - ەلدىڭ لاڭكەستىكپەن كۇرەس جونىندەگى باس اگەنتتىگى بايانداماسىندا حابارلاندى.

بايانداما «شەتەلدىك مەملەكەتتەر تاراپىنان قاۋىپ-قاتەردى باعالاۋ» دەپ اتالادى، وندا يزرايل مەن ا ق ش ارەكەتتەرى نيدەرلاند قاۋىپسىزدىگى مەن ەگەمەندىگىنە قاۋىپ ءتوندىرۋى مۇمكىن ەلدەر رەتىندە اتالدى.

اتاپ ايتقاندا، يزرايل ەل بيلىگىنىڭ كەلىسىمىنسىز نيدەرلاند ازاماتتارىنىڭ جەكە دەرەكتەرى بار قۇجاتتاردى تاراتىپ، جالعان اقپارات تاراتۋ ناۋقاندارىن قولدانىپ ەلدەگى قوعامدىق پىكىر مەن ساياسي شەشىمدەرگە ىقپال ەتۋگە ارەكەتتەنگەن دەلىنەدى.

«ماككابي» جانكۇيەرلەرى

بايانداماعا سايكەس، 2024 -جىلدىڭ قاراشاسىندا امستەردامدا «ماككابي تەل-اۆيۆ» كلۋبىنىڭ جانكۇيەرلەرى تۋدىرعان تارتىپسىزدىكتەردەن كەيىن يزرايل بيلىگى گوللانديالىق تىلشىلەر مەن شەنەۋنىكتەرگە نيدەرلاند ازاماتتارىنىڭ جەكە دەرەكتەرى بار ماتەريالداردى تاراتقان. بۇل ادىلەت جانە قاۋىپسىزدىك مينيسترلىكتەرىندە، سونداي-اق سىرتقى ىستەر مينيسترلىگىندە الاڭداۋشىلىق تۋدىردى. ولار زارداپ شەككەندەرگە قاتىستى قۋدالاۋ، قورقىتۋ جانە ءتىپتى ىقتيمال زورلىق-زومبىلىق قاۋپى تۋرالى ەسكەرتتى.

-ءبىز اقپاراتتىق كەڭىستىككە ىقپال ەتۋ جانە مەملەكەتارالىق ءوزارا ءىس-قيمىلدىڭ ءداستۇرلى ارنالارىن اينالىپ ءوتۋ ارەكەتتەرىن بايقاپ وتىرمىز، - دەلىنگەن حابارلامادا.

سوتقا قوقان-لوققى كورسەتۋ

قۇجاتتا سونداي-اق يزرايل مەن ا ق ش تاراپىنان گااگاداعى حالىقارالىق قىلمىستىق سوتقا (ح ق ك) قاۋىپ ءتونىپ تۇرعانى اتاپ وتىلگەن. باياندامادا سوتقا قارسى قىسىم مەن قوقان-لوققى ونىڭ جۇمىسىنا كەرى اسەرىن تيگىزۋى مۇمكىن ەكەندىگى اتاپ ءوتىلدى.

ەسكە سالا كەتسەك، 2024 -جىلى سوت يزرايل پرەمەر-ءمينيسترى بينيامين نەتانياحۋ مەن بۇرىنعى قورعانىس ءمينيسترى يواۆ گالانتتى پالەستينا اۋماعىندا اسكەري قىلمىس جاسادى دەگەن كۇدىكپەن قاماۋعا الۋعا وردەر بەرگەن بولاتىن. وسىدان كەيىن ا ق ش سوتقا سانكسيا سالدى، ال يزرايل تاراپى قىسىم جاساۋ ناۋقانىن كۇشەيتتى.

بىلتىر مامىر ايىندا ح ق س يزرايل مەن ا ق ش بيلىگى يزرايل باسشىلىعىنىڭ وكىلدەرىن تۇتقىنعا الۋعا وردەر بەرگەن جاعدايدا سوتتىڭ زارداپتارى تۋرالى ەسكەرتكەننەن كەيىن وعان قارسى قوقان-لوققىنى توقتاتۋدى تالاپ ەتكەن.

اۋماعىندا حالىقارالىق سوت پەن بۇۇ حالىقارالىق سوتىن قوسا العاندا حالىقارالىق سوت ورگاندارى ورنالاسقان نيدەرلاند ولاردىڭ تاۋەلسىزدىگى مەن ۇزدىكسىز جۇمىس ىستەۋىن قامتاماسىز ەتۋ ءۇشىن ءوزىنىڭ ەرەكشە جاۋاپكەرشىلىگىن اتاپ كورسەتەدى.

باقىلاۋشىلاردىڭ اتاپ وتۋىنشە، بۇل بايانداما بىرنەشە ەۋروپالىق ەل، سونىڭ ىشىندە نيدەرلاند، يرلانديا جانە يسپانيانىڭ گازا سەكتورىنداعى جالعاسىپ جاتقان اسكەري وپەراتسياعا جانە سەكتورداعى گۋمانيتارلىق جاعدايدىڭ ناشارلاۋىنا بايلانىستى يزرايلدى سىناۋىنىڭ كۇشەيۋى تۇسىندا جاسالعان.

«نون گراتا» مينيسترلەرى

گوللانديالىق ب ا ق- تىڭ حابارلاۋىنشا، نيدەرلاند بيلىگى يزرايل ۇكىمەتىنىڭ مۇشەلەرى - قارجى ءمينيسترى بەتسالەل سموتريچ پەن ۇلتتىق قاۋىپسىزدىك ءمينيسترى يتامار بەن-گۆيردىڭ ەلگە كىرۋىنە تىيىم سالعان.

Algemeen Dagblad گازەتىنىڭ مالىمەتىنشە، نيدەرلاندتىڭ سىرتقى ىستەر ءمينيسترى كاسپەر ۆالدەكامپ پارلامەنتكە حات جولداپ، وندا بۇل تىيىم ەكى يزرايلدىك ساياساتكەردىڭ دە «تۇرعىنداردى پالەستينا حالقىنا قارسى بىرنەشە رەت زورلىق-زومبىلىق كورسەتۋگە شاقىرۋى جانە… گازادا ەتنيكالىق تازالاۋدى تالاپ ەتۋىنە» بايلانىستى ەكەنىن اتاپ ءوتتى.

— ماعان بۇكىل ەۋروپادا تىيىم سالىنسا دا، مەن ەلىمىز ءۇشىن كۇرەسۋدى، حاماس- تى جويىپ، جاۋىنگەرلەرىمىزدى قولداۋدى جالعاستىرامىن. ءبىزدىڭ جاۋلارىمىز - قاتىگەز ولتىرۋشىلەر مەن زورلاۋشىلار، ءبىراق ەۋروپادا ءوزىن قورعاعان ادام كىنالى. ولار سول جەردە لاڭكەستەردى قابىلدايدى، ءبىراق ەۆرەي ءمينيسترىن - جوق، - دەپ جازدى بەن- گۆير نيدەرلاند شەشىمىنە جاۋاپ رەتىندە X- تەگى پلاتفورماسىندا.

كىرۋگە تىيىم سالۋ تۋرالى شەشىم نيدەرلاند پرەمەر- ءمينيسترى ديك سحوف ەل يزرايلدىڭ عىلىمي جوبالارىن قارجىلاندىرۋدى ءىشىنارا توقتاتۋ تۋرالى ە و باستاماسىن قولداۋمەن قاتار، يزرايلگە قارسى ۇلتتىق شارالار ەنگىزۋدى قاراستىرىپ جاتقانىن مالىمدەگەننەن كەيىن كوپ ۇزاماي قابىلداندى.

اۆتور

زارينا تۋعانبايەۆا