ناۋرىزدا ەلباسىنىڭ قاتىسۋىمەن «Nur Otan» ساياسي كەڭەسىنىڭ كەڭەيتىلگەن وتىرىسى وتەدى

نۇر-سۇلتان. قازاقپارات - ناۋرىزدا ەلباسىنىڭ قاتىسۋىمەن پارتيا ساياسي كەڭەسىنىڭ كەڭەيتىلگەن وتىرىسى وتەدى.

بۇل تۋرالى سىبايلاس جەمقورلىققا قارسى ءىس-قيمىل اگەنتىگىنىڭ القا ماجىلىسىندە «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ءمالىم ەتتى، دەپ حابارلايدى قازاقپارات ءتىلشىسى.

«Nur Otan» پارتياسى سىبايلاس جەمقورلىققا قارسى ءىس-قيمىل بويىنشا جۇمىستى جۇيەلى تۇردە جۇرگىزىپ كەلەدى. ماسەلەن، 2014-جىلى پارتيانىڭ ساياسي كەڭەسىندە قوعامدىق تالقىلاۋدان سوڭ، 2025-جىلعا دەيىنگى سىبايلاس جەمقورلىققا قارسى ءىس-قيمىل باعدارلاماسى قابىلداندى. كەيىننەن باعدارلاما قازاقستاننىڭ سىبايلاس جەمقورلىققا قارسى ستراتەگياسىنىڭ نەگىزى بولدى. «Nur Otan» پارتياسى فراكسياسىنىڭ باستاماسىمەن سىبايلاس جەمقورلىققا قارسى ءىس-قيمىل اقپاراتقا قول جەتكىزۋ، قوعامدىق كەڭەستەر تۋرالى جانە باسقا دا زاڭدار قابىلداندى. بۇگىندە 80 پايىزدان استام مەملەكەتتىك قىزمەت اۆتوماتتاندىرىلدى، ەلىمىزدىڭ بارلىق ايماعىندا حالىققا قىزمەت كورسەتۋ ورتالىقتارى جۇمىس ىستەيدى، سيفرلىق تەحنولوگيالار ەنگىزىلۋدە. «ءبىر تەرەزە» قاعيداتى بويىنشا قۇقىق قورعاۋ قىزمەتتەرىنىڭ ورتالىقتارى اشىلۋدا»، - دەپ توقتالدى ب. بايبەك اگەنتتىكتىڭ 2019-جىلدىڭ قورىتىندىسىنا ارنالعان القا ماجىلىسىندە.

وسى ورايدا ول پارتيانىڭ بارلىق دەڭگەيدەگى رەسۋرستارى قوعامدا جالپى جەمقورلىققا قارسى مادەنيەتتى قالىپتاستىرۋعا باعىتتالعانىن ايتتى.

«پارتيا تۇراقتى نەگىزدە جۇرتشىلىقتى قاتىستىرا وتىرىپ، سىبايلاس جەمقورلىققا قارسى ءىس-قيمىل ماسەلەسىن ءوز الاڭدارىندا جاريالى تۇردە تالقىلايدى. بيىل ناۋرىزدا ەلباسىنىڭ قاتىسۋىمەن پارتيا ساياسي كەڭەسىنىڭ كەڭەيتىلگەن وتىرىسى وتكىزىلەدى. قارالاتىن ماسەلەلەردىڭ ءبىرى - پارتيانىڭ سىبايلاس جەمقورلىققا قارسى ءىس-قيمىلى جانە پارتياشىلىك ءتارتىپتى ساقتاۋ جايى.

سىبايلاس جەمقورلىققا قارسى ءىس-قيمىل جونىندەگى پارتيالىق باعدارلامانىڭ ءبىرىنشى كەزەڭىنىڭ جۇزەگە اسىرىلۋ قورىتىندىسى شىعارىلادى. بيىل ءبىز پارتيانىڭ سىبايلاس جەمقورلىققا قارسى ءىس-قيمىل باعدارلاماسىنىڭ 2025-جىلعا دەيىنگى ەكىنشى كەزەڭىن ىسكە اسىرۋدى باستايمىز»، - دەدى باۋىرجان بايبەك.