نۇرتورە ءجۇسىپ: بالالارعا ارنالعان قارجى كولەمى دە ۇلعايا تۇسەدى

депутат
Фото: Parlam.kz

استانا. KAZINFORM - سەنات دەپۋتاتى نۇرتورە ءجۇسىپ ۇلتتىق قوردان بالالارعا بولىنەتىن قارجى تۋرالى Facebook الەۋمەتتىك جەلىسىندەگى پاراعىندا ءوز ويلارىن ورتاعا سالدى.

«پرەزيدەنت قاسىم-جومارت توقايەۆ «ۇلتتىق قور - بالالارعا» دەگەن باستاما كوتەرىپ، وسى ماقساتتى جۇزەگە اسىرۋ ءۇشىن قۇقىقتىق تەتىكتەردى رەتتەپ بەردى. 2024-جىلى ۇلتتىق قوردان وسى ماقساتقا بولىنگەن قاراجاتتىڭ جالپى سوماسى - 695 ميلليون دوللار. بۇل قاراجاتتى ەلىمىزدەگى 6 ميلليون 919 مىڭ 131 بالاعا بولگەندە 100 دوللار 50 تسەنتتەن كەلەدى ەكەن. ال ۇلتتىق قور قاراجاتى كوبەيگەن سايىن بالالارعا ارنالعان قارجى كولەمى دە ۇلعايا تۇسەدى. بۇگىن ارنايى اشىلعان ەسەپشوتتارعا العاشقى تولەم ءتۇستى. بۇل اتا-انالاردىڭ ەرتەڭگى كۇنگە دەگەن سەنىمىن ارتتىرادى» - دەپ جازدى سەناتور.

سەنات سپيكەرى ماۋلەن اشىمبايەۆ بۇگىن جۋرناليستەرگە بەرگەن سۇحباتىندا ۇلتتىق قوردان بالالارعا ءتۇسىپ جاتقان تولەم كولەمى بويىنشا ءبىرقاتار تۇسىنىكتەمە بەردى.

- ءبىز جىل وتكەن سايىن ۇلتتىق قور قاراجاتىن كوبەيتۋگە جانە ۇنەمدەۋگە مۇددەلى بولۋىمىز كەرەك. سوندا بالالارعا باعىتتالعان ينۆەستيتسيالىق تابىس كولەمى دە ارتا تۇسەدى، - دەدى.

مەملەكەت باسشىسى بۇعان دەيىن الداعى ۋاقىتتا ىشكى جالپى ءونىم كولەمىن 2 ەسە ارتتىرۋ تۋرالى ايتقان بولاتىن. ەل ومىرىندەگى ناقتى وزگەرىستەر وسىلايشا وڭ ناتيجە بەرە باستايتىنى انىق.

سوڭعى جاڭالىقتار