نەكە قيۋعا ءوتىنىش بىلدىرگەندەر تەگىن كەڭەس الىپ، ارنايى نۇسقاۋلىقپەن تانىسادى - مينيستر
قازاقستاندا نەكە قيۋعا ءوتىنىش بىلدىرگەن جۇپتار وتباسىن جوسپارلاۋ تۋرالى كەڭەس الىپ، ارنايى نۇسقاۋلىقپەن تانىسۋعا مىندەتتەلەدى.

بۇل تۋرالى ق ر مادەنيەت جانە اقپارات ءمينيسترى ايدا بالايەۆا ۇكىمەت وتىرىسىندا ايتتى، دەپ حابارلايدى Kazinform ءتىلشىسى.
«پروفيلاكتيكالىق جۇمىستاردىڭ نەگىزى - وتباسىن سانالى تۇردە قۇرۋعا مۇمكىندىك جاساۋ. وسىعان وراي، ب ۇ ۇ حالىق قورىمەن بىرلەسىپ استانا مەن شىمكەنت قالالارىندا پيلوتتىق جوبا ىسكە قوسىلدى. وندا نەكە قيۋعا ءوتىنىش بىلدىرگەن ازاماتتارعا وتباسىن جوسپارلاۋ، پسيحولوگيا، رەپرودۋكتيۆتى دەنساۋلىق، ورتاق بيۋدجەتتى جوسپارلاۋ جانە باسقا دا ماڭىزدى ماسەلەلەر بويىنشا تەگىن كەڭەس بەرۋ، وقىتۋ قاراستىرىلعان. ناتيجەسى ءساتتى بولسا، وسى تاجىريبەنى بارلىق وڭىرلەرگە ەنگىزۋدى قولعا الامىز»، - دەدى ايدا بالايەۆا ۇكىمەت وتىرىسىندا.
سونىمەن قاتار، جىل سوڭىنا دەيىن «باقىتتى قازاقستاندىق وتباسى» ينتەراكتيۆتى نۇسقاۋلىعى ازىرلەنەدى. نەكەگە تۇراتىن جۇپتاردىڭ وتباسىلىق داستۇرلەرى مەن رۋحاني- ادامگەرشىلىك قۇندىلىقتارى تۋرالى اقپاراتتار «ەلەكتروندىق ۇكىمەت» جۇيەسىندە بەينەروليك تۇرىندە كورسەتىلەدى.
نەكەگە تۇرۋعا ونلاين ءوتىنىش بەرگەن ازاماتتار وسى نۇسقاۋلىقپەن مىندەتتى تۇردە تانىسىپ شىعۋى ءتيىس.
«قازىر ەلىمىزدە وتباسى ساياساتى بويىنشا 469,3 ميلليون تەڭگەنى قۇرايتىن 156 الەۋمەتتىك جوبا بار. بولىنگەن قارجىنىڭ %40 تۇرمىستىق زورلىق- زومبىلىقتىڭ الدىن الۋعا بولىنگەن، %25 جاستار اراسىندا وتباسىلىق قۇندىلىقتاردى ناسيحاتتاۋعا، %10 حالىق اراسىندا رەپرودۋكتيۆتى دەنساۋلىقتى ساقتاۋعا، %15 جاعدايى تومەن وتباسىلارمەن پروفيلاكتيكالىق جۇمىستارعا، %10 باسقا باعىتتارعا جۇمسالۋدا»، - دەپ ءتۇسىندىردى مينيستر.
بۇعان دەيىن ا. بالايەۆا ستاتيستيكا كوڭىل كونشىتپەيتىنىن، 4 جىلدا تۇرمىستىق زورلىق- زومبىلىقتان 869 ادام كوز جۇمعانىن ايتقان ەدى.
سونداي- اق، ق ر ىشكى ىستەر ءمينيسترىنىڭ ورىنباسارى يگور لەپەحا قازاقستاندا تۇرمىستىق زورلىق- زومبىلىق جازاسى قالاي كۇشەيتىلگەنىن ايتىپ بەرگەن ەدى.