بورانبايەۆ مەملەكەتكە قايتارعان اقشا قانداي ماقساتتا قولدانىلادى؟
قارجى مونيتورينگى اگەنتتىگى وكىلى قايرات بورانبايەۆ مەملەكەتكە قايتارعان اقشا قانداي ماقساتتا قولدانىلاتىنىن ايتتى.
ۆەدومستۆو مالىمەتىنشە، قايرات بورانبايەۆقا قاتىستى جۇرگىزىلىپ جاتقان سوتالدى تەرگەۋ اياسىندا ول ءوز ەركىمەن ىنتىماقتاستىق ورناتۋ نيەتى بارىن مالىمدەگەن. ال بورانبايەۆقا تيەسىلى كومپانيالار شەتەلدەن قايتارىلعان قاراجات ەسەبىنەن ءبىلىم بەرۋ ينفراقۇرىلىمىن قولداۋ قورىنا 66 ميلليون ا ق ش دوللارىن، ياعني 30 ميلليارد تەڭگەدەن اسا قارجى اۋداردى.
ايتا كەتەيىك، كوگىلدىر وتىندى اكەلۋ كەزىندە قاراجات ۇرلاۋ دەرەگى بويىنشا جۇرگىزىلگەن تەرگەۋ اياسىندا بورانبايەۆ 14,5 ميلليارد تەڭگە كولەمىندە ماتەريالدىق شىعىندى دا وتەگەن بولاتىن.
«بۇل قاراجات قولدانىستاعى زاڭناماعا سايكەس ءبىلىم بەرۋ سالاسىن قولداۋعا، مەكتەپتەر مەن باسقا دا وقۋ ورىندارىن سالۋعا جانە قايتا جاڭارتۋعا، بۇكىل رەسپۋبليكا بويىنشا الەۋمەتتىك سالاعا باعىتتالادى»، - دەلىنگەن حابارلامادا.
ەسكە سالايىق، بۇعان دەيىن تەرگەۋ شەڭبەرىندە جالپى قۇنى 90 ميلليارد تەڭگەدەن اساتىن اكتيۆتەردى، ونىڭ ىشىندە مۇناي كەن ورنىن، گاز تاراتۋ كومپانياسىن، سەرۆيس سالاسىنداعى كاسىپورىندى، قوناق ءۇي جانە ساۋدا-ويىن-ساۋىق كەشەندەرىن، فيتنەس ورتالىقتار جەلىسىن، كەڭسە ءۇي-جايلارىن جانە باسقا دا اكتيۆتەردى مەملەكەت مەنشىگىنە ەرىكتى تۇردە قايتارۋ جونىندە شارالار قابىلدانعانى حابارلانعان ەدى.
